Türkiyədəki yanğınlarla mübarizə məqsədilə Azərbaycan Prezidenti İlham Əliyevin tapşırığına əsasən qardaş ölkəyə göndərilən Fövqəladə Hallar Nazirliyinin (FHN) əməkdaşları burada tüğyan edən meşə yanğınlarının söndürülməsi istiqamətində yüksək səviyyəli xidmət aparır. Bu, Türkiyə ictimaiyyəti və rəsmiləri tərəfindən də yüksək qiymətləndirilir.
Xatırladaq ki, iyulun 28-də Antalyanın Manavqat rayonunda başlayan meşə yanğınları qısa müddətdə ölkənin digər bölgələrinə yayılıb. Bir neçə gün ərzində ölkədə 200-dən çox yanğın ocağı qeydə alınıb. Türkiyədə baş vermiş meşə yanğınlarının söndürülməsi prosesində qardaş ölkəyə dəstək məqsədilə göndərilənlər arasında Fövqəladə Hallar Nazirliyinin yanğınsöndürmə qüvvələri də var. Xatırladaq ki, nazirlik Türkiyəyə köməyə 710 yanğınsöndürən-xilasedici və 93 yanğınsöndürən maşın, 1 yanğınsöndürən helikopter və 1 amfibiya-təyyarə göndərib. Yanğın ocaqlarının çoxu nəzarət altına alınsa da, vaxtaşırı olaraq bu və ya digər bölgədən yeni yanğın ocaqları haqda xəbərlər gəlir. Ətraf kəndlərdəki sakinlər tərəfindən azərbaycanlı yanğınsöndürənlərə və xilasetmə qüvvələrinə xüsusi diqqət və qayğının olması da hər addımbaşı özünü göstərir. Hər gün çoxsaylı Türkiyə qəzetləri, telekanalları azərbaycanlı yanğınsöndürənlərin yanğınların yayılmasının qarşısını almaq və yanğın ocaqlarını söndürmək üçün necə döyüşdüyü barədə reportajlar, xəbərlər yayır. Bu reportajlarda, xəbərlərdə azərbaycanlı yanğınsöndürənlər “alov savaşçıları” adlandırılır. Türkiyənin Sazak kənd sakini Coşqun Bayar azərbaycanlı yanğınsöndürənlərlə bağlı qeyd edir: “Azərbaycandan gələn yanğınsöndürənlər Muğla və Marmarisdə yüksək fədakarlıq göstərirlər. Biz bir millət iki dövlətik. Burdakı fəaliyyətimiz yanğın çıxdığı zaman dərhal köməyə getməkdir. Bəzən isə burada yanğınsöndürənlərə, polislərə könüllü olaraq yardım etməkdir. Hazırda kənddən insanlar şəxsi təsərrüfatları ilə birlikdə təxliyə olunublar. Şükürlər olsun ki, bugünədək burada ölən və ya xəsarət alan olmayıb. Biz inanırıq ki, yanğın qısa müddətdə söndürüləcək. Ərazi tamamən yanğından mühafizə olunduqdan sonra isə kənd sakinləri yenidən öz evlərinə qayıdacaqlar”.
Türkiyə mediasının xəbərlərindən birində Muğlanın Milas rayonunun Feslegen məhəlləsində başlayan meşə yanğınlarının küləyin təsiri ilə sürətlə yayılaraq Bayır məhəlləsinə yaxınlaşmasından, azərbaycanlı yanğınsöndürənlərin məhəllənin ətrafında növbə tutaraq alovların evlərə keçməsinin qarşısını almasından bəhs edilir. Qeyd edilir ki, yeni yanğın ocağı sürətlə böyüyüb və yaşayış evlərini təhdid etməyə başlayıb. Günorta saatlarında yanğınsöndürənlər alovun qarşısını ala biliblər, amma axşam saatlarında alovlar yenidən məhəlləyə tərəf yayılmağa başlayıb. Alovları söndürmək üçün 12-yə yaxın helikopter, jandarma və komando birlikləri cəlb olunub. İstanbul Komando Birliyi və Foça Komando Birliyi heyətləri məhəllənin içərisində mövqe tutub, Azərbaycandan gedən yanğınsöndürən heyətləri isə məhəllənin ətrafında alovun evlərə keçməsinin qarşısını almaq üçün keşik çəkiblər. Bildirilir ki, azərbaycanlı yanğınsöndürənlər yerli sakinlərin, meşə təsərrüfatı işçilərinin və könüllülərin də köməyi ilə yanğını söndürmək üçün dayanmadan mübarizə aparırlar. Buna baxmayaraq, Bayır məhəlləsinin hələ də təhlükə altında olduğu bildirilir. Başqa bir xəbərdə isə Muğlada uşaq evlərində qalan və dövlətin himayəsində olan 12 gənc ailənin azərbaycanlı yanğınsöndürənlərin görüşünə getməsindən bəhs olunur.
Yanğınların söndürülməsində könüllü iştirak edən Burak Taylan isə qeyd edir: “Azərbaycandan gələn heyət Türkiyədəki yanğınların söndürülməsində yaxından iştirak edir. Bir gün əvvəl azərbaycanlı qardaşlarımız Aydının Çine bölgəsindəki yanğının söndürülməsində böyük əzmkarlıq göstərdilər. Bu gün də Muğlanın Çayhisar kəndində yanğınların söndürülmasində böyük fədakarlıqla iştirak edirdilər”. Azərbaycanın daim Türkiyənin yanında olduğunu söyləyən B.Taylan bildirib: "Bununla qürur duyuram. Nə vaxt nəyəsə ehtiyacımız olsa, hər zaman yardım əlinizi uzadırsınız. Bu, qardaşlığın və dostluğun bariz nümunəsidir. Yanğınla mübarizə apardığımız çətin günlərdə qardaş azərbaycanlıların yanımızda olması ortaq dəyərlərimizin sarsılmaz olduğunu bir daha dünyaya nümayiş etdirdi. Göstərdiyi diqqətə görə Azərbaycan hökumətinə və xalqına təşəkkürümü bildirirəm". Türkiyə mediasının digər xəbərində isə Aydın bölgəsinin Çine rayonuna bağlı Akçova qəsəbəsinin ətrafında başlayan meşə yanğınından və 200-ə yaxın azərbaycanlı yanğınsöndürənin əllərində bel həmin yanğınları söndürmək üçün dağlarda necə mübarizə aparmasından bəhs olunur.
Hazırda Fövqəladə Hallar Nazirliyinin yanğın-xilasetmə qüvvələri Türkiyənin Kəmərköy, Yunaklı dağ, Kozağac, Köyceğiz, Aydın, Akçaova rayonlarında meşə yanğınlarının söndürülməsi istiqamətində uğurlu fəaliyyətlərini davam etdirir. Nazirliyin Türkiyədəki qüvvələrinə fövqəladə hallar nazirinin müavini, general-leytenant Etibar Mirzəyev rəhbərlik edir. İlkin qiymətləndirmələrə görə, yanğınlar Türkiyə iqtisadiyyatına 35 milyard dollar ziyan vurub. Daha konkret rəqəm isə yanğınlar tam başa çatdıqdan sonra rəsmi eskpert qiymətləndirmələri nəticəsində bəlli olacaq. Amma bütün hallarda dəymiş ziyanın məbləğı böyükdür və bu, Türkiyənin mövcud valyuta ehtiyatlarının yarısından çoxunu təşkil edəcək.
Samirə SƏFƏROVA
