Azərbaycan Milli Məclisinin sədri Sahibə Qafarova İran İslam Şurası Məclisinin sədri Məhəmmədbaqer Qalibaf ilə görüş zamanı İran parlamentini Xocalı soyqırımı ilə bağlı sənəd qəbul etməyə çağırıb.
Görüş zamanı Milli Məclisin sədri bildirib ki, artıq Dağlıq Qarabağ münaqişəsi tarixə qovuşub. İndi Azərbaycanın Ermənistanın işğalından azad edilmiş ərazilərində genişmiqyaslı yenidənqurma və bərpa dövrü başlayıb. Spiker Sahibə Qafarova deyib ki, münaqişə başa çatsa da, bir sıra problemlər hələ də qalmaqdadır. Belə ki, Ermənistan 30 il ərzində işğal altında saxladığı və Vətən müharibəsində azad etdiyimiz torpaqlarımızda minalanmış ərazilərin xəritələrini verməkdən imtina edir, bununla da hərbi cinayət törətməkdə davam edir. Beləliklə, onlar məcburi köçkünlərimizin öz doğma yurd-yuvalarına qayıtmasına mane olmaq istəyir, sərhədlərin delimitasiyası məsələsində təxribatlara əl atırlar.
Milli Məclisin sədri diqqətə çatdırıb ki, gələn il - 2022-ci ilin fevral ayının 26-da Xocalı soyqırımının 30-cu ildönümü tamam olacaq. Bu cür insanlıq əleyhinə törədilmiş cinayətlərə hüquqi-siyasi qiymətin beynəlxalq səviyyədə də verilməsi çox vacibdir və İran parlamentinin Xocalı soyqırımı ilə bağlı sənəd qəbul etməsi bəşəriyyəti gələcəkdə buna bənzər hadisələrlə üzləşməkdən qoruya bilər.
Ötən 29 ildə İran Xocalı soyqırımını niyə tanımayıb?
“Bunun bir səbəbi də bu ölkənin bizə münasibətdə ehtiyatlı mövqe tutması ilə bağlıdır”
AVCİYA-nın vitse-prezidenti, siyasi icmalçı, professor Məhərrəm Zülfüqarlı baki-xeber.com-a bildirdi ki, Xocalı soyqırımı dünyanın bir çox ölkələri, o cümlədən də ABŞ-ın bir sıra ştatları tərəfindən tanınıb. M.Zülfüqarlının sözlərinə görə, Azərbaycan Milli Məclisi sədrinin Tehrandakı görüş zamanı bu çağırışı etməsi, əlbəttə ki, bütün mənalarda gərəklidir. M.Zülfüqarlının dediyinə görə, dövlət rəsmilərindən tutmuş sadə vətəndaşalara qədər hər birimiz həqiqətlərimizin beynəlxalq aləmə çatdırılması işində fəal olmalıyıq. “İslam Ölkələri Konfransının iştirakçısı kimi İran Azərbaycanın ərazi bütövlüyünü tanıyıb. Düzdü, ikili mövqe tutub, Azərbaycan və Ermənisanla eyni zamanda münasibətini saxlamaq üçün bir sıra məsələlərdə gözləmə mövqeyi sərgiləyib. Fikrimcə, indiyə qədər İran Parlamenti Xocalı soyqırımının tanıması ilə bağlı sənəd qəbul etməyibsə, bunun bir günahı bizim bu ölkədəki səfirliyimizin üzərinə düşür. Səfirliyimiz İranda bu istiqamətdə geniş iş aparmalı idi. Bu sənədin indiyə qədər qəbul olunmaması ikinci tərəfdən də İranın dini liderindən asılı məsələdir. Bilirsiz ki, İranda prezidentlik, parlament bilavasitə seçkili olsa da, amma əsasən ali dini liderin mövqeyini özündə əks etdirir. İran da embarqoya məruz qalmış ölkə kimi Ermənistanla iqtisadi əlaqələri gizlətmir. Bizimlə müsəlman ölkə kimi münasibətlər qurmaqla yanaşı, Ermənistanla münasibətlərini davam etdirir”.
M.Zülfüqarlının fikrincə, Azərbaycan hər zaman İranla münasibətlərdə bizi birləşdirən mövqelərdən çıxış etməlidir, buna üstünlük verməlidir. “Təxminən 15 il bundan əvvəl ABŞ müharibəyə başlamaq istəyini büruzə verəndə Azərbaycan Prezidenti İlham Əliyev belə bir fikir səsləndirmişdi - İranla Azərbaycan arasında müştərək tarix var, biz müştərək tarixə malik ölkələrik, hər hansı bir ölkə başqa bir ölkə ilə problemini həll etmək istəsə bunun həlli yeri Azərbaycan deyil, biz ancaq əməkdaşlığa hazırıq. Yəni o dövrdə cənab Prezident Amerikaya mesaj verdi ki, sən əgər müharibəyə başlasan, biz sənə 30 milyondan artıq soydaşımızın yaşadığı ölkəni bombalamağa, darmadağın etməyə imkan vermərik. Bu, Azərbaycan rəhbərliyidir. İranda da Azərbaycana dost münasibəti bəsləyən siyasilər var, əhalinin isə mütləq əksəriyyəti Azərbaycana qardaş münasibət bəsləyir. Sadəcə, İran-Azərbaycan münasibətlərində İran rəhbərliyini daim narahat edən bir məsələ var. İranı narahat edən odur ki, şimalda nümunəvi bir Azərbaycan dövləti inkişaf edir və bu dövlət inkişaf etdikcə, tanındıqca, gücləndikcə cənubda olan azərbaycanlılar Azərbaycanın birləşməsi məsələsini önə çəkə bilərlər. İran Azərbaycanın birləşməsindən, bütövləşməsindən ehtiyat edir. İranın parçalanmaması üçün Azərbaycana qısqanclıqla yanaşırlar, buna görə də, Azərbaycanın taleyüklü məsələlərində ehtiyatlı mövqe tuturlar. Xocalı soyqırımının İran tərəfindən tanınmamasının bir səbəbi də bu ölkənin bizə münasibətdə ehtiyatlı mövqe tutması ilə bağlıdır. 44 günlük Vətən müharibəsində də İran gözləmə mövqeyi tutdu və qələbənin qazanıldığı aydın olduqdan sonra Azərbaycana müəyyən dəstək bəyanatları verməyə başladılar...” deyə M.Zülfüqarlı vurğuladı.
İradə SARIYEVA
