“Ermənilər istəyir ki, 7 kəndin müqabilində Başkəndi geri alsınlar”
Məlum olduğu kimi, Ermənistanın Azərbaycanla həmsərhəd olan Tavuş bölgəsində Rusiya sərhədçiləri yerləşdirilir. Tavuş vilayətinin Əskipara (Voskepar) kəndində Rusiya sərhədçilərinin görünməsi haqda xəbərlər, fotolar daha əvvəldən sosial şəbəkələrdə yayılırdı. Nəhayət Ermənistanın Müdafiə Nazirliyi avqustun 5-də Azərbaycanın Qazax rayonu ilə həmsərhəd olan bu bölgədə, xüsusilə də Əskipara kəndi ərazisində Rusiya sərhədçilərinin yerləşdirilməsi barədə məlumat yaydı. Ancaq nazirlik Rusiya hərbçilərinin yerləşdirilməsinin detalları barədə heç bir məlumat verməyib. Təkcə onu bildirib ki, orda sərhədçilər üçün obyektlər tikiləcək. İndi Ermənistanda bir çox ekspertlər belə düşünür ki, rusların məhz Əskiparada yerləşməsi Qazaxın işğal altında olan 7 kəndinin geri qaytarılmasına hazırlıqdır.
Bu arada çox maraqlıdır ki, parlamentdə hakim “Vətəndaş Müqaviləsi” fraksiyasının üzvü Vahe Qalumyan da Qazaxdakı kəndlərin qaytarılacağına eyham vurub. O, Ermənistan ərazisində hələ də Azərbaycana məxsus torpaqların olduğunu etiraf edib: “Rusiya qoşunlarının Ermənistan sərhədlərində yerləşdirilməsi ilə sülh olacaqsa, bu məqbuldur. Tavuşda Azərbaycan kəndləri var. İstisna etmirəm ki, onlar dəyişdiriləcək. Voskeparda isə atışma olub-olmadığını bilmirəm”.
O dəyişdiriləcək deyərkən nəyi nəzərdə tutub? Söhbət hansı ərazilərin mübadiləsindən gedir?
Məsələyə münasibət bildirən Yeni Yol Partiyasının sədri Ramil Hüseynov erməni deputatın belə bir açıqlama ilə çıxış etməsinə bir neçə aspektdən yanaşdı: “Əvvəla, 44 günlük Vətən savaşında əldə olunan qələbədən sonra Qazaxın məlum kəndlərinin geri qaytarılacağı ehtimalı böyükdür. Çünki bu, 10 noyabr razılaşmasının ilkin variantında öz əksini tapmışdı. Sonra Paşinyan daha pis vəziyyətə düşməsin deyə, həmin razılaşma yazılı mətndən çıxarıldı. Ancaq güman edilir ki, Ermənistan şifahi olaraq bunu öz üzərinə götürüb. Çünki 10 noyabrdan bir müddət sonra Türkiyə prezidenti Rəcəb Tayyib Ərdoğan da sözügedən kəndlərin qaytarılacağını bəyan etdi. Fikrimcə, bu açıqlama təsadüfü səslənməyib. Erməni deputat Vahe Qalumyanın açıqlamalarına gəldikdə isə, burada iki məqsəd ola bilər. Ola bilsin, Qalumyan mübadilə deməklə erməni ictimai rəyini sakitləşdirmək məqsədi güdür. Bununla Paşinyana qarşı ola biləcək etirazları yumşaltmağa çalışır. Çünki nəzərə almaq lazımdır ki, 44 günlük müharibədə Ermənistanın məğlub olması ilə bağlı Paşinyana münasibətdə güclü nifrət yaranıb. Bunun nəticəsi idi ki, 20 iyun seçkilərində seçicilərin 50 faizi iştirak etmədi. Digər tərəfdən, bir müddət əvvəl Paşinyan çıxışların birində Gədəbəyin Başkənd kəndinə toxundu. Ermənilər istəyir ki, 7 kəndin müqabilində Başkəndi geri alsınlar. Ancaq düşünmürəm ki, qalib tərəf olan Azərbaycan buna getsin. Onu da nəzərə almaq lazımdır ki, Ermənistan adlı dövlət tarixi Azərbaycan ərazilərində yaradılıb. O üzdən, bizim onlara veriləsi torpağımız yoxdur”.
Partiya sədri onu da qeyd etdi ki, hər halda, yaxın dövrdə bu kimi məsələlərə aydınlıq gətiriləcək.
Vidadi ORDAHALLI
