Türkiyə Prezidenti Rəcəb Tayyib Ərdoğanın rəhbərliyi ilə keçirilən Milli Təhlükəsizlik Şurasının iclasından sonra verilən bəyanatda bildirilib ki, Cənubi Qafqazda uzun müddətdən sonra yaradılan sülh və rifahı qorumaq üçün Ermənistan öz hücumlarından, təxribatlarından və həqarətlərindən əl çəkərək bu fürsəti dəyərləndirməlidir.
Bəyanatda Ermənistan rəhbərliyinə qəbul etdiyi öhdəliklərinə sadiq qalaraq bölgə ölkələri ilə əməkdaşlıq üçün çağırış edilib. Qeyd edək ki, MTŞ-nin iclası 3,5 saatadək davam edib.
Türkiyənin bu sərt xəbərdarlığından Ermənistan hansı nəticəni çıxarmalıdır?
İctimai Siyasi Proseslər Beynəlxalq Araşdırmalar Mərkəzinin sədri Samir Adıgözəlli “Bakı-Xəbər”ə açıqlamasında bildirdi ki, Türkiyə kimi bir ölkənin Təhlükəsizlik Şurası adından belə bəyanatın verilməsi ciddi mətləblərdən xəbər verir: “Ermənistan uzun müddət bölgədə sülhə təhdid yaradıb. 44 günlük müharibədən sonra regionda yeni reallıqlar yarandı. Türkiyə və Rusiya qonşu ölkələr kimi bu prosesdə yaxından iştirak edib. Ermənistanın müharibə zamanı diz çökməsindən sonra əldə olunan razılaşmalarda da bu iki ölkənin fəallığı olub. Təsadüfi deyil ki, Azərbaycan-Ermənistan sərhədində baş verən gərginliklə bağlı bir müddət əvvəl Rusiya Təhlükəsizlik Şurasında da müzakirələr aparıldı. Bütün bu narahatlığı yaradan Ermənistandır. Çünki onlar üzərlərinə düşən öhdəliyə əməl etmirlər. Əksinə, yeni münaqişə ocaqları yaratmaqla bölgəyə başqa ölkələrin gəlişini, müdaxiləsini təmin etmək istəyirlər. Türkiyədən verilən son mesajda ciddi xəbərdarlıq notları var. Belə də olmalıdır. Nə Azərbaycan, nə də başqa region ölkələri bir ovuc erməninin nazı ilə oynamalıdır. Regonda yaranan reallıqlar bütün region ölkələri üçün əlverişlidir. Kommunikasiyaların bərpası region ölkələri arasında əməkdaşlığı, iqtisadi əlaqələri gücləndirmiş olacaq. Ermənistan bütün bunlardan ciddi nəticə çıxarmalıdır. Türkiyədən verilən mesajdakı kimi, ona verilən şansı qiymətləndirməlidir”.
İSBAM sədri hesab edir ki, Ermənistanın çabalarının nəyə hesablandığı məlumdur: “Qarabağda qalan bir ovuc erməniyə status almaq istəyir. Yenidən Minsk Qrupu formatını bərpa edib, danışıqları həmin məcraya qaytarmağı hədəfləyir. Bütün bunlarla bağlı Azərbaycanın sərt mövqeyi var. Nə status olacaq, nə də Minsk Qrupu formatında danışıqlar. Artıq Ermənistanın manevr və imitasiya imkanları da qalmayıb. Əvvəl danışıqlar predmetində işğal altındakı ərazilərimizlə alver etmək istəyirdi. Hazırda Ermənistan öz sərhədinə kimi geri oturdulub. Yenidən dəmir yumruq görmək istəmirsə, öhdəliklərə əməl etməlidir. Ermənistanın öz daxili rəyində belə insanlar sülh istəyir. Həmin ölkə iqtisadi cəhətdən məhv olur. Yeganə çıxış yolları bu şansdı. Yenidən təcrid yolunu seçəcəklərsə, Ermənistanda əhali belə qalmayacaq”.
Məhəmmədəli QƏRİBLİ
