İran prezidenti İbrahim Rəisinin andiçmə mərasimində çıxışı zamanı Paşinyanın nümayiş etdirdiyi nəzakətsizlik və diplomatik etiketin pozulması Ermənistan mediasında sərt tənqidlərə səbəb oldu. Tədbirdə iştirak edənlərdən yalnız Paşinyan sinxron tərcümə cihazını söndürərək, smartfonunda sosial şəbəkələrdə əylənməyə başlayıb. Nikol Paşinyanın sosial şəbəkələrdə çox fəal istifadəçi olduğu hamıya məlumdur.
Ermənistanın Respublika Partiyasının sədr müavini, sabiq təhsil naziri Armen Aşotyanın fikrincə, Şərq ölkəsində açıq hörmətsizlik göstərmək və etiket qaydalarını pozmaq bağışlanmaya bilər, bu da, öz növbəsində, İran kimi strateji tərəfdaşla münasibətlərə mütləq təsir edəcək.
Ermənistanın news.am saytının yazdığına görə, A.Aşotyan özünü saxlaya bilməyib və Paşinyanın ünvanına təhqir və hətta alçaldıcı ifadələr işlədib: “Bu axmaq hələ diplomatiyanın nə olduğunu, mədəniyyətin nə olduğunu, tərbiyənin nə olduğunu, məsuliyyətin nə olduğunu anlamayıb. Xüsusilə Şərqdə bu cür hörmətsizlik unudulmaz və bağışlanılmazdır".
Paşinyanın bu cür davranışları nədən xəbər verir?
Psixoloqların qənaəti budur ki, sanki Ermənistanın baş naziri Nikol Paşinyan paralel bir gerçəklikdə yaşayır. Ermənistan rəhbərliyinin bu cür davranışı, belə vurnuxması vəziyyət üzərində nəzarəti itirdiyinə və bundan sonra nə edəcəyini anlamadığına dəlalət edir.
Daha əvvəllər də Nikol Paşinyanın qeyri-adi bir şəkildə davrandığı, gerçəkliyi qeyri-adekvat qiymətləndirdiyi diqqət çəkmişdi. Bütün davranışları Ermənistanın baş nazirinin tamamilə qeyri-adekvat adam olduğunu göstərir. Qışqırıqlar və qəfil isterik hərəkətlər, qeyri-adekvat və ziddiyyətli açıqlamalar, aşıb-daşan emosionallıq - bunlar hamısı Ermənistan baş nazirinin davranışını fərqləndirən xarakterik xüsusiyyətlərdir.
Bir dövlət xadimi üçün uyğun olmayan hərəkətlərə, olduqca normal olmayan ifadələrə tez-tez baş nazirin ətrafı tərəfindən “düzəlişlər edilir”. Bütün bunlar onun ölkəni idarə etmə metodlarında əks olunur.
Emosional təşviş halı ona düzgün təhlil aparmağa imkan vermir, qavrama və dəyərləndirmə sistemində ciddi problemlər yaradır. Dinləmir, daha çox dinlənilmək istəyir.
Jurnalist peşə təfəkkürünə malik olması onda sözün əməldən daha güclü olduğuna inam yaradıb. Halbuki, siyasətdə, dövlət işində, diplomatiyada hər sözün altında güc olmalıdır, N.Paşinyan isə, hətta ixtiyarındakı gücdən də düzgün istifadə edə bilmir. Və bu onun idarəetmə bacarığının zəif olduğu qənaətinə gəlməyə tam əsas verir. Nitqində ilişmələr, bir-birini təkzib edən fikirlər, dil sürüşmələri müşahidə olunur. Görüşlərdə düşdüyü çətin vəziyyətlərdə emosiyalarını idarə edə bilmir. Bunu onun özünə inamsızlıqdan irəli gələn davranışlarında, mimikalarının sürətli dəyişməsində, kəkələməsində görmək olar. Təşviş və həyəcan içərisində sanki kimisə axtardığını, telefondan özünə dəstək aradığını müşahidə etmək mümkündür. Dayaq axtardığını əllərinin duruşunda, özünə inam əskikliyini isə qəddinin əyilməsində görmək olar. Çıxışları zamanı dərin və gərgin mimikalardan istifadə edərək başqalarını inandırmaq üçün çabalayır. Burada əsas emosiya isə qorxu və təşvişdir.
İrandakı tədbirdəki davranışları bir daha deyilənləri sübut edir. Maraqlıdır ki, bütün bu davranışları Paşinyan tərgidə bilmir. Uzun müddətdir dövlətə rəhbərlik edən adamın belə vərdişlərlə vidalaşa bilməməsi isə vəziyyətin xroniki hal aldığına dəlalət edir.
Məhəmmədəli QƏRİBLİ
