Məlum olduğu kimi, Ermənistan Baş naziri Nikol Paşinyan İran prezidenti İbrahim Rəisi ilə görüşüb. Görüşdə bir sıra məsələlər müzakirə olunub.
Bu görüşdə diqqət çəkən məqam odur ki, yalnız ikitərəfli əməkdaşlıq, ticari əlaqələrə diqqət ayrıldı. Nikol Paşinyan İrana iqtisadi partnyor kimi necə yüksək qiymət verdiyini açıq şəkildə dedi, daha sonra isə Qarakilsə-Meğri yolunun tikintisində İran şirkətlərinin iştirakı, Şimal-Cənub avtomobil xətti, elektrik enerjisi sahəsində əməkdaşlıq və s. təkliflərini səsləndirdi. Sonra mədəniyyət, elm, təhsil, səhiyyə sahələrində əməkdaşlıq imkanları müzakirə edildi.
Halbuki, Paşinyan Rəisidən Qarabağla bağlı hər hansı açıqlama gözləyirdi. Xüsusilə İranın Ermənistandakı səfirinin Azərbaycanla sərhədə gəlməsi, ölən ermənilərə görə başsağlığı verməsi, Ermənistanın ərazi bütövlüyünü müdafiə etdiyini canfəşanlıqla bildirməsi fonunda İ.Rəisinin də Qarabağ məsələsinə toxunacağı gözlənilirdi. Lakin İbrahim Rəisi ümumiyyətlə regional təhlükəsizlik, xüsusilə Azərbaycan dövlətinin artıq həll etdiyi Qarabağ münaqişəsi barədə bir kəlmə də demədi. Rəisinin dilindən çıxan yeganə söz bu oldu: “Bölgədə sülhün qorunması Tehran üçün əsas prioritetdir və İran bütün məsələləri dialoq yolu ilə həll etməyi zəruri sayır”.
Rəisi nə sərhəddə baş verənlərə toxundu, nə Qarabağdan danışdı, nə də regionda təhlükəsizliyi təhdid edən “hansısa bir məqam”ın olduğunu bildirdi. O üzdən, Paşinyanın arzusu ürəyində qaldı və bu mövzuda hansısa açıqlama verə bilmədi.
Bütün bunları ekspertlər necə dəyərləndirir?
“Görünən odur ki, Paşinyana belə bir fürsət tanınmadı”
Sözügedən məsələ ilə bağlı fikirlərini “Bakı-Xəbər”lə bölüşən “Səs” Media Qrupunun rəhbəri, politoloq Bəhruz Quliyev İranın yeni prezidentinin sadalanan məsələlərə toxunmamasına müsbət prizmadan yanaşdı: “Rəisinin sözügedən məsələlərdə tutduğu siyasi mövqe Azərbaycanın maraqlarına uyğundur. Bu onu göstərir ki, 44 günlük Vətən müharibəsindən sonra tamamilə yeni reallıqlar yaranıb və İran bunun fərqindədir. Məsələ ondadır ki, müharibədən sonra regionun söz sahiblərindən biri Azərbaycandır. Region dövlətləri, o cümlədən İran İslam Respublikası Azərbaycanı qalib dövlət olaraq tanıyır və buna hörmətlə yanaşır. Azərbaycanın ərazi bütövlüyü ilə bağlı hər hansı bir məsələ müzakirə predmeti ola bilməz. Həqiqətən də bu, çox önəmli məqamdır. Çünki Rəisi həmin məsələlərə bu və ya digər formada toxunsaydı, o zaman Paşinyanın bundan maksimum təbliğat vasitəsi olaraq istifadə etməsinə fürsət yaranardı. Görünən odur ki, Paşinyana belə bir fürsət tanınmadı. Son dövrlər İran-Azərbaycan münasibətlərində müsbət tendensiyalar var. İranın yeni prezidentinin bunları nəzərə alması yaxşı göstəricidir. Sadalanan məqamlara İ.Rəisinin toxunmaması İranın bu baxımdan Azərbaycana yönəlik müsbət reveransı kimi dəyərləndirilməlidir. Ümumiyyətlə, bəzi istisnaları çıxmaq şərti ilə iki ölkə münasibətləri kəskin olmayıb”.
Ümumilikdə, politoloq hesab edir ki, İranın yeni prezidenti Qarabağla bağlı məsələlərə həssaslıqla yanaşacaq və atdığı addımlarda Azərbaycanın maraqlarını nəzərə alacaq.
Vidadi ORDAHALLI
