Avqustun 5-də Fransa prezidenti Emmanuel Makron Azərbaycan prezidenti İlham Əliyevə zəng edib. Söhbət zamanı dövlət başçıları 2020-ci il noyabrın 10-da imzalanmış üçtərəfli Bəyanatdan sonrakı dövrdə regional məsələlər və Bəyanatın müddəalarının həyata keçirilməsi, Ermənistan-Azərbaycan dövlət sərhədindəki vəziyyət və postmünaqişə dövründə regionda sabitlik və təhlükəsizliyin möhkəmləndirilməsinə dair ətraflı fikir mübadiləsi aparıblar. Dövlət başçıları söhbət əsnasında Azərbaycan-Fransa ikitərəfli əlaqələrinin müxtəlif sahələrinə aid məsələləri də müzakirə ediblər.
Qeyd edək ki, Makronla Əliyevin danışığı Fransa prezidentinin Ermənistan baş naziri Nikol Paşinyanla telefon söhbətindən sonraya təsadüf edib. Ermənistan hökumətinin mətbuat xidmətinin məlumatına görə, Makron Paşinyanı baş nazir vəzifəsinə təyin edilməsi münasibətilə təbrik edib. Paşinyan Azərbaycanla sərhəddə vəziyyətin gərgin olduğunu bildirib və fürsətdən istifadə edərək Bakını ittiham edib. İddia edib ki, guya Azərbaycan regionda sabitliyi pozmaq istəyir. O, həmçinin, Azərbaycanda erməni əsirlərə qarşı “saxta” məhkəmə proseslərindən şikayət edib. Daha sonra məlumatda deyilir: “Makron Ermənistan və Azərbaycan arasında sərhədin demarkasiyasının və delimitasiyasının həddindən artıq zəruri olduğunu vurğulayıb. Bu fikirlə razılaşan Ermənistan baş naziri qeyd edib ki, Ermənistan-Azərbaycan sərhədinin demarkasiyası və Dağlıq Qarabağ münaqişəsinin həlli heç bir şəkildə bir-biri ilə kəsişən proseslər deyil. O, sərhəd boyunca KTMT müşahidəçilər missiyasının yerləşdirilməsi və bu mümkün olmadığı təqdirdə alternativ kimi ATƏT-in Minsk Qrupunun həmsədrlərinin müşahidə missiyasının yaradılması təklifini təkrar edib”.
Daha sonra telefon danışığında Paşinyan qeyd edib ki, regional təşəbbüslər ATƏT-in Minsk Qrupunun həmsədri olan bütün ölkələr tərəfindən təsdiq edildiyi təqdirdə uğurlu ola bilər. Tərəflər arasında Qarabağdakı ermənilərə statusun verilməsi məsələsinin də müzakirə olunduğu qeyd edilir. Paşinyanla bu yöndə olan söhbətlərdən sonra Makronun İlham Əliyevlə hansı mövzuları müzakirə etdiyi maraqlı görünür.
Politoloq Rəşad Bayramov “Bakı-Xəbər”ə bildirdi ki, Fransa ikili mövqeyindən əl çəkmir, işğalçıya qəti mövqeyini, Ermənistan tərəfindən beynəlxalq hüququn, konvensiyaların kobud şəkildə pozulmasına etirazını bildirmir: “Bunu Makronun hər iki prezidentlə olan telefon danışığının detalları da sübut edir.Acınacaqlı hal odur ki, ATƏT-in Minsk Qrupunun həmsədr dövlətlərindən biri olan Fransanın prezidenti Emmanuel Makron açıq şəkildə işğalçı Ermənistana dəstək verir. Qarabağ və ətraf rayonlarda hərbi əməliyyatlar başlanandan bəri Fransa prezidentinin tutduğu mövqe və verdiyi bəyanatlar bu ölkənin münaqişənin nizamlanması prosesindəki beynəlxalq mandatına ziddir və neytral vasitəçilik missiyasının tələblərinin kobudcasına pozulmasıdır. Fransa prezidentinin Qarabağda sentyabrın 27-dən başlayan döyüşlərə dair mövqeyində təcavüzkar tərəf Ermənistanı birmənalı müdafiə etməsi ATƏT-in Minsk Qrupunun fəaliyyətinə ciddi zərbədir və bu qurumun fəaliyyətinin siyasi riyakarlıqdan ibarət olduğunu bir daha təsdiqlədi. Paşinyanla telefon danışığında yenidən Azərbaycanın üstündən xətt çəkdiyi mövzuları müzakirə etməsi Fransa prezidentinin erməni sevgisindən xəbər verir. Azərbaycan, əksər dövlətlərlə olduğu kimi, Fransa ilə də sağlam əməkdaşlıqda maraqlıdır, münasibətləri genişləndirməyə çalışır. Lakin bu dövr ərzində Fransa rezidenti Emmanuel Makron və onun ətrafında olan müəyyən qüvvələr Azərbaycan barədə qərəzli mövqe nümayiş etdirdilər və haqsız bəyanatlar yaydılar. İndi də belə bəyanatları səsləndirməyə davam edirlər. Bu vəziyyət Azərbaycan tərəfindən təəssüflə qarşılanır. Biz hər zaman Fransa dövləti və xalqı ilə münasibətlərimizin inkişaf etməsinə çalışmışıq. Çünki Azərbaycan-Fransa münasibətlərinin tarixi qədimdir. Prezident İlham Əliyevlə Emmanuel Makron arasında baş tutan telefon danışığında da ikitərəfli əlaqələr müzakirə edilib. Təbiidir ki, Vətən müharibəsi dövründə və postmüharibə dönəmində Fransanın mövqeyilə də bağlı Əliyevin iradlar bildirdiyi istisna olunmur. Hazırda Azərbaycan-Ermənistan sərhədində davam edən gərginlikdə bir sıra dövlətlər maraqlıdır. Azərbaycan isə təxribatlara qarşıdır və sülh istəyir. Çox güman ki, bu mövzuda da İlham Əliyev Makronun diqqətinə Azərbaycanın qəti mövqeyini çatdırıb. Azərbaycanın prinispial mövqeyi istənilən platformada İlham Əliyev tərəfindən ifadə edilir”.
Məhəmmədəli QƏRİBLİ
