Uzun illərdir ki, Ermənistanda bütün sferalarda anti-Türk, anti-Azərbaycan ab-havası formalaşdırılıb. Bu ölkədə illərdir aparılan nifrət kampaniyası öz zərərli təsirlərini göstərir. Bütün bunlar faktdır. Amma son zamanlar Ermənistanda diqqətçəkən bir tendensiyanın açıq işartıları görsənməkdədir.
Bəzi erməni ziyalıları, alimləri, blogerləri, mədəniyyət adamları Ermənistanın apardığı anti-Türk siyasətinə qarşı çıxır. Bilirik ki, qardaş Türkiyədə baş verən yanğın terrorunu Ermənistanda, erməni seqmentlərində “toy-bayram”a çevirən ermənilər az olmadı, onlar Türkiyənin faciəsinə sevindiklərini ortaya qoyurlar. Əlbəttə, başqasının faciəsinə sevinmək olmaz. Bu arada erməni prodüsser Armen Qriqoryan Ermənistanda Türkiyədə baş verən yanğınların “toy-bayram” edilməsinə qarşı çıxıb. A.Qriqoryan deyib ki, Türkiyədəki yanğınlara sevinmək qeyri-insanilikdir. O həmçinin xatırladıb ki, Spitak zəlzələsində Azərbaycanın mülki müdafiə çadırı ermənilərdən 50 metr aralıda idi və azərbaycanlılar dəstək göstərirdi. Bundan başqa, məşhur erməni blogeri Roman Baqdasaryan da Türkiyədə baş verən yanğınlara görə sevinən Facebookdakı erməni abunəçilərini psixopat adlandırib.
Bütün bunlar onu göstərir ki, artıq Ermənistanın daxilində anti-Türk təbliğatına qarşı çıxanlar və bu milli xəstəliyin törətdiyi faciənin təsirini duyanlar var.
“Ermənistanın daxilində bu cür səslənişlərin olması təbii qarşılanmalıdır”
Erməni cəmiyyətində anti-Türk təbliğatına qarşı çıxanların olmasının gözlənilməz olmadığını deyən siyasi şərhçi Azər Həsrət hesab edir ki, bu ölkədə hər zaman Ermənistanın bu mənfur siyasətinə qarşı çıxanlar olub, sadəcə, onların səslərini çıxarmağa elə də böyük imkanları olmayıb. “Belə əhval Ermənistanda və ermənilərin arasında həmişə var. Əslində, 30 illik işğal dövründə belə Ermənistanda bu cür adamlar var idi, sadəcə olaraq, onların səsi çox da çıxa bilmirdi. Çünki qaraguruh və eyni zamanda Ermənistana rəhbərlik edən hakimi-mütləq adamlar onlara səslərini çıxarmağa imkan vermirdi. Düzdü, nadir hallarda səslərini çıxaranlar olurdu, amma kütləvi deyildi. Ermənistanın Qarabağ müharibəsində uduzması da elə bu cür adamların hesabınadır. Yəni o adamlar başa düşürlər ki, Türkiyə və Azərbaycanla düşmənçilik əbədi ola bilməz. Yaxud da qonşu ölkənin torpağını işğal edib xoşbəxt olmaq mümkün deyil. Ona görə də həmin adamlar müharibəni uduzmuş Paşinyana səs verdilər, onu növbəti dəfə baş nazir etdilər. Paşinyanın seçkiləri qazanması elə ondan xəbər verir ki, Ermənistan cəmiyyətinin böyük əksəriyyəti Azərbaycan və Türkiyə ilə normal münasibətlər qurulmasının tərəfdarıdı. Bu baxımdan Ermənistanın daxilində bu cür səslənişlərin olması təbii qarşılanmalıdır. Dediyim kimi, bu ölkədə anti-Türk təbliğatına etiraz edənlər həmişə vardı”.
A.Həsrət deyir ki, Ermənistanda da normal düşüncəli insanlar var, lakin bu ölkədə əlində hakimiyyət, pul, imkanlar olan bir qrup vardı, həmin qrup da uzun illər bu ölkəyə, bütün ermənilərə rəhbərlik edirdi, onların qorxusundan belə adamlar da səs çıxarmağa çəkinirdilər. “Amma indi vəziyyət dəyişir, indi Ermənistanın ağlı başında olan kəsimi daha üstündür, daha geniş şəkildə öz fikrini deyə bilir. Bu şəxslər normal insani münasibətləri dilə gətirirlər və açıq şəkildə Türkiyənin faciəsinə sevinməyin qeyri-insanilik olduğunu deyirlər. Düşünürəm ki, bu cür görsənişlər də xalqlar arasında etimadın bərpa olunmasına çox ciddi töhfə verə biləcək”-deyə siyasi şərhçi qeyd etdi.
İradə SARIYEVA
