Ermənistanın Müdafiə Nazirliyi Azərbaycanla sərhəd (Qazax rayonu istiqaməti) Voskepar kəndində Rusiya sərhədçilərinin yerləşdirildiyini açıqlayıb. Məlumatda deyilir ki, hazırda kənddə Rusiya sərhədçilərinin arxa cəbhə təminatını həyata keçirmək üçün tikinti işləri görülür.
Erməni KİV-nin məlumatına görə, Rusiya sərhədçiləri kənddəki evlərdən birində yerləşiblər, söhbət çox güman ki, bir taqım əsgərdən gedir. Yəni Rusiyanın Voskepar kəndində hərbi iştirakı əsasən simvolik xarakter daşıyır. Bundan əvvəl Ermənistanın baş naziri Nikol Paşinyan bildirmişdi ki, Azərbaycanla sərhəd boyu Rusiya sərhəd qoşunlarının postlarının yerləşdirilməsini təklif edir və bu məsələni rusiyalı tərəfdaşlarla müzakirə edəcək. Paşinyan əsasən dövlət sərhədinin Laçın və Kəlbəcər istiqamətindən keçən hissəsini nəzərdə tuturdu, hansı ki, həmin istiqamətdə tez-tez atışmalar baş verməkdədir. Rusiyada Paşinyanın bu təklifinə ya sükutla reaksiya verdilər, ya da ayrı-ayrı siyasətçilər və ekspertlər səviyyəsində əsasən müsbət yanaşmadılar. Ekspertlər qeyd etdilər ki, sərhəd boyu Rusiya sərhədçilərinin yerləşdirilməsini Azərbaycanla da müzakirə etmək lazımdır, hansı ki, Bakı buna heç cür razılıq verməz.
İndi isə Rusiya sərhədçiləri, bilavasitə Azərbaycanla sərhəddə olmasa da, Ermənistanın Qazax istiqamətindəki sərhəd kəndində yerləşiblər. Bəs bu nədən xəbər verir?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, hərbi əməliyyatlar bitdiyi ilk gündən Rusiya Ermənistanın itirdiyi mövqeləri gücləndirməyə çalışır. Sanki Rusiya Ermənistanın bu şəkildə məğlubiyyətini gözləyirdi ki, həmin ölkədə bütün istəklərini həyata keçirməyə müvəffəq olsun. Artıq Rusiya Ermənistanın bütün zəif yerlərinə öz ordusunu cəmləyir. Dolayısı ilə, Rusiyanın bu şəkildə addımlar atması sülhün bərqərar olmasına deyil, Ermənistanın güclənməsinə xidmət edir. Əks halda Rusiya Ermənistanı üzərinə götürdüyü öhdəlikləri icra etməyə vadar edərdi. Ermənistan həmin öhdəlikləri icra etməkdən yayınır və bunun fonunda Rusiya loyallıq nümayiş etdirir. Ermənistanın İranla və Türkiyə ilə olan sərhədlərini rus hərbçiləri qoruyur. Ermənistan bunu əsas gətirərək istəyir ki, Azərbaycanla sərhədini də onların mühafizəsinə versin. Bu addım sülhə xidmət etməyəcək. Təbiidir ki, Rusiya bunu istəyir, amma dayanıqlı sülhün olması üçün sərhədin dəqiqləşməsi lazımdır. Xüsusən də Qazax rayonunun 90-cı illərin əvvəllərində işğal olunmuş, anklav vəziyyətində olan kəndləri istiqamətində rus hərbçilərinin toplaşması əlavə suallar yaradır. Ermənistandakı bəzi hərbi ekspertlər hesab edir ki, Rusiya sərhədçilərinin Voskepar kəndində iştirakı anklav ərazilərin geri qaytarılmasına hazırlıqdır. Onların qənaətincə, Rusiya sərhədçiləri Azərbaycanın əsas əraziləri ilə Qazaxın həmin anklav kəndləri arasında gediş-gəlişin təhlükəsizliyini təmin etmək üçün ora yerləşdirilə bilərdi. Əks halda Rusiya sərhədçilərinin orada yerləşdirilməsi üçün heç bir tutarlı səbəb yoxdur. Onların qənaəti budur ki, Ermənistan həmin kəndləri qaytarmaqla bağlı güzəştə gedib və məsələ yaxın 1-2 ildə həll oluna bilər. Qeyd edək ki, Paşinyan hökuməti dəfələrlə Qazaxın kəndlərinin qaytarılmasına dair gizli öhdəlik götürməkdə günahlandırılıb. Lakin indiki halda, ola bilsin, Rusiya sərhədçilərinin Voskeparda yerləşdirilməsi sərhəd boyu eskalasiyanın bu istiqamətə də yayılmasını önləmək məqsədi daşıyır. Sadəcə, bəzi ekspertlərin dili ilə ictimai rəyi çaşdırırlar”.
Məhəmmədli QƏRİBLİ
