Ermənistanın Müdafiə naziri Arşak Karapetyan Ermənistan sərhədini keçmək istəyən Azərbaycan hərbçilərinin məhv edilməsi barədə əmr verib.
Milli.az-ın yazdığına görə, Karapetyan bunu Müdafiə Nazirliyinin son kollegiya iclasında deyib. A.Karapetyan çıxışında tabeliyində olan əsgərlərə Ermənistan sərhədini keçməyə çalışan Azərbaycan hərbçilərinə dərhal atəş açmağı və hər vasitə ilə məhv etməyi ciddi şəkildə əmr edib.
Karapetyan bu barədə birlik komandirlərinə qəti xəbərdarlıq edib. O, eyni zamanda, erməni komandirlərin bir santimetr belə irəliləyən Azərbaycan hərbçilərinə görə sərt şəkildə cəzalandırılacaqlarını deyib.
Karapetyanın bu əmrini absurd və cəfəng adlandıran azərbaycanlı ekspertlər deyirlər ki, Azərbaycan hərbçiləri sərhədi keçmir, sərhədi keçən erməni hərbçiləri olur, onların da məqsədlərinin təxribat törətmək olduğu məlumdur. Ekspertlər deyir ki, erməni nazir bu “əmr”lə belə rəy yaratmaq istəyir ki, guya sərhəd insidentlərinin günahkarı Azərbaycan hərbçiləridir, erməni hərbçiləri sakit dayanır. Halbuki, bütün təxribatları törədən erməni hərbçiləridir ki, biz post-müharibə dövründə onlarla belə təxribatın şahidi olmuşuq.
“Karapetyan unudur ki, onun “əmr”ni icra etmək üçün Ermənistanın nə gücü, nə qoşunu, nə də ordusu var, bu ölkə Azərbaycana qarşı hansısa bir addım ata bilmək gücündə deyil”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə şərhində bildirdi ki, seçkilərdən sonra Ermənistanda yeni kabinet formalaşdı və Karapetyan da yeni müdafiə naziri oldu. “Təbii ki, yeni müdafiə naziri kimi Karapetyan özünü göstərməyə çalışır, amma sözdən o yana keçməyə heç bir imkanları yoxdur. Ermənistan ordusu yoxdur. Bunu Karapetyan da, Paşinyan da, başqaları da çox yaxşı bilir. Ermənistan Azərbaycan, Azərbaycan hərbçiləri qarşısında heç nə edə bilmir. Əsasən bunların özlərini göstərmək istədikləri yer Zəngəzurdu. Zəngəzurda da həm köhnə xəritələrə, həm Sovet dövrünün xəritələrinə, həm tarixi reallığa, həm də 10 noyabr razılaşmasına uyğun olaraq Azərbaycan öz hərbçilərini yerləşdirir. Azərbaycan ordusu öz qanuni ərazimizdə dayanıb, sərhəd təxribatlarına bizim ordu yox, erməni hərbçiləri yol verir. Azərbaycan ordusu sərhədi keçmir, odur ki, erməni nazirin hay-küyü faydasızdı, daxili auditoriyaya hesablanıb. Burada qəribə bir məsələ yoxdur. Azərbaycanın öz qanuni haqlarını bərpa etməsi Ermənistan cəmiyyətində birmənalı qarşılanmır və etirazlar var. Buna uyğun da Karapetyan populist mövqe tutmağa çalışır, orduya absurd əmr verir ki, Azərbaycan hərbçiləri bir addım da irəlilsələr dərhal güllələyin, atəş açın. Karapetyanın “əmri” boş, mənasız söz yığınıdır, heç bir gücü yoxdur. Bu, gücsüz tərəfin ortaya qoyduğu dizsiz, zəif, populist mövqedir ki, bu da Ermənistan auditoriyasına hesablanıb. Karapetyan unudur ki, onun “əmr”ini icra etmək üçün Ermənistanın nə gücü, nə qoşunu, nə ordusu var, bu ölkə Azərbaycana qarşı hansısa bir addım ata bilmək gücündə deyil”.
Azərbaycan müdafiə nazirinin son günlər azad edilmiş ərazilərimizə səfərlər etdiyini, yeni yaradılan hərbi hissələrlə tanış olduğunu, ordumuzun döyüq qabiliyyətini yoxladığını, baxış keçirdiyini, əsgərlərimizi təltif etdiyini vurğulayan A.Nağının sözlərinə görə, nazir burada ermənilərin heç bir hərəkətinin cavabsız qalmamalı olduğu barədə hərbçilərimizə göstəriş verib. A.Nağı bildirdi ki, hər zaman Azərbaycan ordusu Azərbaycan dövlətinin maraqlarına uyğun olan addımlar atmağa, bütün təxribatların qarışısını almağa hazır olmalıdır. “Yəni biz hələlik Ermənistanla müharibə vəziyyətində qalırıq və Azərbaycan da, onlar da bunu bilir. Amma Ermənistan sadəcə özü üçün bir çıxış yolu görmür…
A.Nağı xatırlatdı ki, hazırda Azərbaycan, Türkiyə, Gürcüstan xüsusi təyinatlıları Ankarada birgə təlimlər keçir, Ukrayna da prosesdə müşahidəçi qismində iştirak edir, Qara dənizdə Azərbaycanın, Türkiyənin, ABŞ-ın iştirakı ilə təlim keçirilir, istənilən istiqamətdə Azərbaycan özünün hərbi gücünü, hərbi müdafiə qabiliyyətini artırır, düşmən də bunu görür və bu gücün qarşısında heç nə edə bilmədiyindən təxribatlara əl atır. “Ermənistanın müdafiə naziri bu “əmr”lə belə rəy yaratmaq istəyir ki, guya sərhəddə Azərbaycan ordusu təxribat törədir, sərhədi pozur. Diqqəti bu uydurmaya yönəltmək istəyirlər. Çünki bunların başqa bir yolu yoxdur. Ona görə də sərhəd məsələsini qabardırlar ki, guya Azərbaycan tərəfindən sərhədlərinə “təcavüz” edilib, “gərginlik” yaradılıb. Beynəlxalq təşkilatların, böyük dövlətlərin diqqətini bu məsələyə cəlb etmək istəyirlər. Amma burada da Azərbaycan ağılla öz mövqeyini ortaya qoyur, sadəcə diqqətli olmaq lazımdır. İmkan vermək olmaz ki, Ermənistan Azərbaycan hərbi kontingentinin Azərbaycanın öz qanuni ərazisində dayanmasından spekulyasiya, siyasi möhtəkirlik məqsədləri üçün istifadə etsin. Bilirsiz ki, Qazaxın 7 kəndi ilə bağlı məsələ müzakirədədir, Naxçıvan MR-in Sədərək rayonunun Kərki kəndinin məsələsi gündəmdədir. O məsələlərin hamısında Azərbaycan birmənalı və prinsipial mövqeyini saxlamalıdır. Sərhəd məsələsində də xüsusilə. Ermənilər yaxşı bilir ki, Azərbaycan sərhəd məsələsində qətiyyən geri çəkilməyəcək. Ona görə də bu cür boş, mənasız açıqlamalarla nə isə əldə etmək istəyirlər” - deyə A.Nağı qeyd etdi.
İradə SARIYEVA
