Həbsdə olan general Rövşən Əkbərovun əməlləri barədə yeni faktlar ortaya çıxıb. Məlum olub ki, illər əvvəl onun haqqında başqa bir cinayət işi də açılıbmış. Belə ki, 2007-2009-cu illərdə hərbi hissə komandiri olduğu dövrdə tabeliyində olan əsgərlər onun evində və obyektlərində işlədilib.
Rəsmi sənədlərdə obyektin mülkiyyətçisi Telman Əkbərov olsa da, rəsmi qaydada N saylı hərbi hissənin giziri İbrahim Həsənov onu icarəyə götürüb. Məlumata görə, Rövşən Əkbərovun atasının adını daşıyan Telman adlı oğlu var. Telmanın adına olan obyektin bir hissəsi mebel sexi, bir hissəsi şirniyyat, bir hissəsi isə mağazadır. İşin ilginc tərəfi budur ki, general əlində olan imkanlardan sui-istifadə edərək həmin obyektdə əsgərləri işlədib. Həmin zaman da yanğın baş verib. Nəticədə bir əsgər ölüb, qalanları isə xəsarət alıb.
Hadisəyə görə cinayət işi gizir Həsənova qarşı açılıb. Ona yanğın təhlükəsizliyi qaydalarını pozma, ehtiyatsızlıqdan zərərçəkmişin ölümünə və ya digər ağır nəticələrə səbəb olma maddəsilə ittiham irəli sürülüb və cinayət məsuliyyətinə cəlb olunub. 2009-cu ildə hərbi hissənin başqa vəzifəli şəxsləri, o cümlədən general Rövşən Əkbərov haqqında da Cinayət Məcəlləsinin 341-ci (vəzifə səlahiyyətlərindən sui-istifadə və ya vəzifə səlahiyyətlərini aşma) maddəsilə cinayət işi açılıb, amma o işə xitam verilməyib.
İndi Rövşən Əkbərovun həbsindən sonra həmin cinayət işi yenidən araşdırılıb. Və bu iş də generala qarşı irəli sürülən ölüm işinə birləşdirilib.
Faktiki olaraq, biz bir əsgərin qanının batdığının şahidi oluruq. Rövşən Əkbərov həbs edilməsəydi, yəqin ki, bu cinayətin də üstü açılmamış qalacaqdı. Həmin cinayət işinin istintaqını aparan qurum bu yöndə səhlənkarlıq edibmi?
Hüquqşünas Mehman Muradlı “Bakı-Xəbər”ə açıqlamasında bildirdi ki, bu məsələ ilə bağlı məlumatlıdır: “Bir faktı qeyd edim ki, heç kim etdiyi cinayətə görə məsuliyyətdən yaxa qurtara bilməz. İstənilən statusda olan adam etdiyi cinayətə görə mütləq cavab verməlidir. Bir neçə gün əvvəl biz Xaçmazdan olan deputat Eldəniz Səlimovla bağlı vəziyyətə şahidlik etdik. Milli Məclisin deputatı bir neçə günün ərzində parlament kreslosunu həbsxana hücrəsinə dəyişməli oldu. Buna səbəb onun etdiyi cinayət oldu. Qeyd edək ki, millət vəkilini məsuliyyətə cəlb etmək bir neçə pilləli prosesdir. Ancaq baş tutdu. Bu analogiyanı ona görə aparıram ki, prinsipial mövqe olsa, istənilən adam, tutduğu vəzifədən asılı olmayaraq, etdiyi cinayətə görə məsuliyyətdən yaxa qurtara bilməz. Rövşən Əkbərovun tutduğu mövqeyə görə onun etdiyi cinayətlərin üstünü ört-basdır ediblər. Hətta onun Ukraynada adam öldürməsi belə, hadisənin üstündən onilliklər keçəndən sonra açıldı. İş burasındadır ki, generalın səhlənkarlığı səbəbindən yanaraq ölən əsgərlə bağlı cinayət təqbinə xitam verilməlidir. Çünki bu, qanunvericiliyin tələbidir. Hətta Rövşən Əkbərovun cinayəti sübuta yetirilsə belə, müddətin uzunluğu bu təqibi həyata keçirməyə imkan vermir. Nəticə isə belə olub ki, araşdırma aparılıb və Rövşən Əkbərovun əməlində Cinayət Məcəlləsinin 341.2.3 (vəzifə səlahiyyətlərindən sui-istifadə və ya vəzifə səlahiyyətlərini aşma, ağır nəticələrə səbəb olduqda) maddəsinin tərkibi olsa da, cinayət məsuliyyətinə cəlbetmə müddəti keçib. Ona görə də Cinayət-Prosessual Məcəllənin 39.1.3 (cinayət məsuliyyətinə cəlbetmə müddətləri keçdikdə) maddəsinə əsaslanaraq, cinayət təqibinə xitam verilib. Deməli, hansısa müstənqtiqin və ya prokurorun səhlənkarlığı səbəbindən bir cinayət əməlinə görə də məsuliyyət müəyyənləşmədi. Hərbçilərlə bağlı istənilən cinayət təqibini Hərbi Prokurorluq həyata keçirir. Hesab edirəm ki, bu işdə edilən səhlənkarlığın izini məhz həmin ünvanda axtarmaq lazımdır”.
Məhəmmədəli QƏRİBLİ
