Ermənistanda hər keçən gün Rusiyaya, bu ölkənin yaratdığı təşkilatlara yönəlik təftiş və tənqid xarakterli yazıların sayı artır. Açıq hiss olunur ki, ermənilər öz gələcəklərini Rusiya ilə yaxın müttəfiq münasibətləri qurmaqda görmürlər. Əsas məqsəd və istəkləri Qərblə yaxın tərəfdaşlıq əlaqələri qurmaqdır.
Bu arada “ArmenianReport” nəşrində “Ermənistanın ölü doğulmuş Kollektiv Təhlükəsizlik Müqaviləsi Təşkilatını tərk etməsinin vaxtı çatıb” başlıqlı yazıda səslənən fikirlər bunu bir daha sübut edir. Yazıda qeyd edilir ki, bu il sentyabrın 16-da Ermənistanın KTMT-yə sədrliyi üzərinə götürəcəyinə baxmayaraq, Ermənistan cəmiyyətində Putin təşkilatının bu abbreviaturu getdikcə daha çox nifrətə səbəb olur: “Əgər 2016-cı ilin aprelinə qədər və 2020-ci ilin iyul ayında Azərbaycan Silahlı Qüvvələrinin Tavuşdakı təxribatından, daha çox isə 44 günlük müharibədən əvvəl bəzi sadəlövh vətəndaşlar blokun nizamnaməsindən və sadəcə insani məntiqdən irəli gələrək KTMT-nin dərhal Ermənistan dövlətinin köməyinə gələcəyini gözləyirdilərsə, bu gün Ermənistanda bu təşkilatı yalnız tənbəllər söymür”.
Daha sonra qeyd edilir ki, bu gün Ermənistan sərhədlərində vəziyyət qeyri-sabitdir və rəsmilər “əsas strateji müttəfiqimiz” Rusiyanı daha da qıcıqlandırmamaq üçün yarıölü KTMT haqqında sərt açıqlamalar verməkdən çəkinirlər: “Ancaq bu o demək deyil ki, sadə vətəndaşlar, hətta müxalifət də susacaq. Müxalufət olaraq Köçəryan, Sarkisyan, Vanetsyan və ölkəmizdəki rusların “beşinci kolonu”nun digər nümayəndələrinin simasında Kremlə yaxın dəstə içərisində olan Paşinyanın rəqiblərini nəzərdə tutmuruq. Ölkəmiz üçün tamamilə gərəksiz olan bu qurum digər təhlükəsizlik strukturlarından, NATO-ya üzv dövlətlərdən, xüsusən ABŞ və Fransadan maddi dəstək almaq üçün ciddi bir maneədir və bu cür dəstək ordumuzun XXI əsrin çağırışları ilə üzləşməsini təmin edə bilər. Ona görə də Ermənistanın ölü doğulmuş KTMT-ni tərk etməsinin vaxtı çatıb”.
Bütün bunlar onu göstərir ki, Ermənistanda Qərbyönümlü hakimiyyət möhkəmləndikcə, ölkənin KTMT-dən uzaqlaşması qaçılmaz olacaq. Çünki bu və ya digər formada cəmiyyət buna hazırlanır.
“Artıq erməni cəmiyyətində KTMT-yə ciddi etimadsızlıq formalaşır və Paşinyan bundan maksimum faydalanmağa çalışır”
Məsələyə münasibət bildirən hərbi ekspert İbrahim Rüstəmlinin sözlərinə görə, Paşinyan 44 günlük Vətən savaşında Ermənistanın uğradığı məğlubiyyətin məsuliyyətini KTMT ilə bölüşmək üçün bütün vasitələrə əl atır: “Təbliğatdan tutmuş, digər bütün vasitələr işə salınır. Hesab edirəm ki, bütün bunlar təsadüfü deyil və planlı şəkildə aparılan siyasətin tərkib hissəsidir. Görünən odur ki, Ermənistan buna doğru gedir. Müharibə bitəndən sonra davamlı olaraq təbliğat aparıldı ki, KTMT Ermənistana yardım etmədi. Halbuki, bunun heç bir hüquqi əsası yox idi. Çünki müharibə Ermənistan ərazisində deyil, Azərbaycan ərazisində gedirdi. Belə olan halda təşkilat necə müdaxilə edi bilərdi? Ondan sonra sərhədlərin delimitasiyası məsələsində KTMT sabotaj edildi. Erməni tərəfi bəyan edir ki, guya Azərbaycan may ayında Ermənistan ərazisinə daxil olub, amma bunu önləməklə bağlı KTMT heç bir fəaliyyət göstərmir. Müşahidələr göstərir ki, bu yöndə davamlı aparılan kampaniya müəyyən mənada öz nəticəsini verir. Artıq erməni cəmiyyətində KTMT-yə ciddi etimadsızlıq formalaşır və Paşinyan bundan maksimum faydalanmağa çalışır. Çox güman ki, sentyabrın 16-da KTMT-yə rəhbərlik Ermənistana keçəndən sonra növbəti hoqqaların şahidi olacağıq. Necə ki, Paşinyan KTMT sədri Yuri Xaçaturovu həbs etməklə təşkilatın imicini yerlə bir etdi, bu dəfə də başqa ssenarilərin işə salınması istisna deyil”.
Hərbi ekspert hesab edir ki, tam əlverişli zəmin yaranan kimi, Ermənistan KTMT-dən çıxa bilər.
Vidadi ORDAHALLI
