Ermənistan parlamentinin iclasında Milli Məclisin vitse-spikeri Akop Arşakyanla parlament müxalifətinin lideri, keçmiş müdafiə naziri Seyran Ohanyan arasında maraqlı mübahisə baş verib. Vitse-spiker İlham Əliyevin müdrik qərarından danışıb: “İlham Əliyev 2001-ci ildə Azərbaycanda hərbi sənaye ilə məşğul olan nazirlik yaradanda və pilotsuz üçan aparatların istehsalına başlayanda siz Ermənistan ordusunun inkişafı üçün nə etdiniz? Bu istiqamətdə nə etdiniz?”.
Arşakyan sabiq müdafiə nazirindən açıq şəkildə soruşub: “Müharibə zamanı Ermənistanın pilotsuz üçan aparatları harada idi?”.
Parlamentin vitse-spikerinin sözlərinə görə, Seyran Ohanyan xatırlamalıdır ki, məhz onun müdafiə naziri olduğu dövrdə Azərbaycan ordusu ən müasir silahlarla təchiz olunurdu: “Cənab Ohanyan, ağlıma da gələ bilməz ki, siz bilərəkdən heç nə etməmisiniz. Bunu etməyə heç vaxt icazə vermərəm və təklif edirəm ki, siz də Milli Assambleyada çıxış edəndə biz tərəfdən hansısa mövqeyin bilərəkdən gücləndirilməsindən danışmayasınız. Bacardığımızı elədik, eyni şey də sizə aiddir”.
Bu, düşmən tərəfinin Azərbaycanın sözügedən istiqamətdə ağıllı siyasət apardığını etiraf etməsi anlamına gəlir. Bununla belə, revanşistlər məğlubiyyətə görə bütün məsuliyyəti yeni hakimiyyətin üzərinə qoya bilməzlər.
“Cənab Prezidentin səsləndirdiyi fikirlər artıq Ermənistan parlamentinin vitse-spikeri səviyyəsində söylənməkdədir”
Məsələyə münasibət bildirən millət vəkili, politoloq Elman Nəsirovun sözlərinə görə, yaşanan məlum polemikada vitse-spiker Akop Arşakyanın səsləndirdiyi arqumentlər reallığı əks etdirir: “Bütün bunlar bir daha onu göstərir ki, bu gün təkcə Ermənistan cəmiyyətində deyil, ölkə parlamentində və digər qurumlarda da Prezident İlham Əliyevin daxili, xarici, müdafiə sahəsində apardığı uğurlu siyasət müzakirə olunmaqdadır. Ən çox müzakirə olunan məsələlərdən biri onunla bağlıdır ki, necə oldu Azərbaycan Ordusu “yenilməz” hesab edilən Ermənistan ordusunu bu qədər sürətlə məğlub etdi. Faktiki olaraq, ordumuz ildırım sürətli müharibə apardı və qələbə bayrağını yüksəldə bildi. O üzdən, əldə olunan qələbənin səbəbləri, motivləri zaman-zaman erməni ictimaiyyətini narahat etməkdədir. Xüsusən də 20 il Ermənistana rəhbərlik edən Köçəryan-Sarkisyan cütlüyünün yarıtmaz fəaliyyəti daha çox tənqid edilir. Bütün bunlar onu göstərir ki, Prezident İlham Əliyevin söylədiyi fikirlər nə qədər doğru və dürüst şəkildə həqiqəti əks etdirir. Cənab Prezident çıxışlarında dəfələrlə bildirib ki, heç də Paşinyanın ordusunu deyil, məhz Köçəryan və Sarkisyanın yaratdığı ordunu darmadağın edib. Onları ağ bayraq qaldırmağa məcbur edib. Cənab Prezidentin səsləndirdiyi sözügedən fikirlər artıq Ermənistan parlamentinin vitse-spikeri səviyyəsində söylənməkdədir. Demək, Ermənistan parlamentinin rəhbəri də əslində bu cür düşünür. Bu həm də o deməkdir ki, Ermənistanın baş naziri də eyni cür düşünür. Çünki onlar eyni komandanın üzvləridir. Bütün bunlar onu göstərir ki, yaxın perspektivdə elə məhz bu məsələlərlə bağlı müəyyən ölçü götürüləcək. Yəni ordu quruculuğu məsələlərinə çox səhlənkarcasına, hətta deyərdim ki, cinayətkarcasına münasibətlə, korrupsiya ilə bağlı araşdırmalar aparılacaq. Cavabdehlər məhkəmə qarşısına çıxarılacaq. Bu gün Seyran Ohanyanın deputat toxunulmazlığı olsa da, bu onu sona qədər qoruya bilməyəcək”.
Millət vəkili hesab edir ki, onların məhkəmə qarşısına çıxarılması zaman məsələsidir.
Vidadi ORDAHALLI
