Ermənistanın Baş naziri Nikol Paşinyan hökumət başçısı seçiləndən sonra ilk xarici səfərini İran İslam Respublikasına edib. Səfər çərçivəsində Nikol Paşinyan İranın yeni seçilən Prezidenti İbrahim Rəisi ilə görüşəcək. O, bundan sonra İran Prezidentinin andiçmə mərasiminə qatılacaq.
Xatırladaq ki, Paşinyanın İrana bundan əvvəlki səfəri bu ilin aprel ayında olub. Onda erməni lider İranın artıq sabiq prezidenti Həsən Ruhani ilə görüşüb.
İyunun 18-də İranda növbəti prezident seçkiləri keçirilib. İranın məhkəmə hakimiyyətinin rəhbəri İbrahim Rəisi prezident seçkilərində qalib gəlib.
Adətən ölkə başçıları ilk xarici səfırlərini özlərinə çox yaxın olan ölkəyə edirlər. Nikol Paşinyanın bu xüsusda İranı seçməsi hansı mətləblərdən xəbər verir? Hər halda, bu səfərə yalnız İranın yeni prezidentinin inauqurasiyası aspektindən yanaşmaq olmaz. Çünki ilk rəsmi səfər başqa simvolik mənalar daşıyır.
Politoloq Əhəd Məmmədli “Bakı-Xəbər”ə açıqlamasında bildirdi ki, bu hadisəyə siyasi qiymət verməzdən əvvəl həmin iki ölkə arasındakı münasibətlərin hansı səviyyədə olmasına diqqət edilməlidir: “Siyəsətdə bəzi jestlər çox mətləblərdən xəbər verir. Asətən dövlət başçısı seçilən ölkə rəhbərləri ilk xarici səfərlərini özlərinin həddən artıq yaxın bildikləri ölkələrə edirlər. Nikol Paşinyanın bu addımı Ermənistan-İran münasibətlərinin hansı səviyyədə yaxın olmasından xəbər verir. Hətta elə hallar var ki, ölkə başçıları protokoldan kənara da çıxırlar. Biz görmüşük ki, ölkəyə gələn ali qonaqları hökümət üzvlərindən biri qarşılayır. Ancaq bir neçə il əvvəl İran prezidenti Ermənistana rəsmi səfər edəndə, onu sabiq prezident Serj Sarkisyanın özü qarşıladı. Həmin vaxt Serj Sarkisyan Ermənistana rəhbərlik edirdi. İran bölgədə balanslı siyasət yürüdür. Yeni prezident də həmin siyasəti davam etdirir. Rəisi bir tərəfdən Azərbaycanı torpaqların azad edilməsilə bağlı təbrik edir, digər tərəfdən isə Ermənistanla belə dərin əlaqələr qurur. Bu addımlar İrana qarşı Azərbaycan ictimai rəyini tam dəyişir. Çünki başqa vaxt müsəlman təəssübkeşi kimi özünü qələmə verən İran bu məsələdə haqsız ölkə ilə bizi eyni tərəziyə qoyur. Biz bunu İranın Ermənistandakı səfirinin son davranışından da gördük. Səfir gedib Ermənistanla bizim sərhəddən Azərbaycana boylanırdı. Bölgədəki təhlükəsizlikdən narahatlığını ifadə edirdi. Təəssüf ki, ərazilərimiz 30 il işğalda qaldığı dönəmdə biz İrandan bu narahatlığı görmədik. Hesab edirəm ki, bu yaxınlıq hər iki ölkənin ümumi maraqlarından irəli gəlir. İranla Azərbaycanı bir çox tellər sıx şəkildə bir-birinə bağlayır. Bizim söydaşlarımızın böyük əksəriyyəti İranda yaşayır. Qonşu ölkə bu amilləri nəzərə alıb siyasət yürütməlidir. Ermənistan dalana dirənmiş bir ölkədir. Kim əl uzadırsa, ona müsbət cavab verir. Təbiidir ki, Azərbaycan istənilən ölkə ilə münasibətini qarşılıqlı anlaşma əsasında qurur. Bizə kim hansı münasibəti bəsləyirsə, adekvat cavabı almalıdır”.
Bu amil Ermənistan-İran münasibətlərinin yeni ölkə başçıları dönəmində də dostluq məcrasında davam edəcəyindən xəbər verir.
Məhəmmədəli Qəribli
