Ermənistan 16 sentyabr 2021-ci ildən etibarən 2 il müddətinə Kollektiv Təhlükəsizlik Müqaviləsi Təşkilatına (KTMT) sədrlik edəcək. Bu barədə hakim “Mənim addımım” blokunun deputatı Ruben Rubinyan deyib.
Ermənistan hər zaman bu qurumu Azərbaycana qarşı yönəltməyə çalışıb, ancaq səyləri fayda verməyib. Sözsüz ki, onlar bu fürsətdən də Azərbaycana qarşı maksimum yararlanmağa çalışacaqlar. Ermənistanın daxili auditoriyasında belə fikirlər səslənir ki, bu ölkə KTMT-yə iki il sədrlik etməsindən yaralanıb, anti-Azərbaycan addımlarını gücləndirməlidir. Biz Tovuz hadisələri zamanı və 44 günlük müharibədə də gördük ki, Rusiya KTMT-ni ölkəmizə qarşı yönəltmək fikrindən uzaqdır. Nikol Paşinyan yenidən KTMT müşahidəçilərini Azərbaycan-Ermənistan sərhədinə dəvət edib və bölgədə stabillik yaradılmasına çağırıb. Yeri gəlmişkən, Paşinyan təklif edir ki, Azərbaycanla bütün sərhəd boyu Rusiya sərhədçilərinin dayaq məntəqələri, eləcə də KTMT-nin monitorinq missiyası yerləşdirilsin və dərhal əlavə edir ki, “KTMT tərəfindən belə missiyanın həyata keçirilməsi mümkün deyilsə, bizim üçün başqa beynəlxalq formatlar, o cümlədən ATƏT-in Minsk Qrupu çərçivəsində formatlar məqbuldur”.
Ermənistanın KTMT-yə iki illik sədrliyi Azərbaycan üçün hansısa narahatlıq yarada bilərmi?
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistanın rotasiya qaydasına uyğun şəklidə KTMT-yə sədrlik etməsi maraqlı dönəmə təsadüf edir: “Bilirik ki, iki ölkənin sərhədində gərginlik hökm sürür. KTMT-nin nizamnaməsi bütün üzv ölkələri güc tətbiqindən çəkinməyə səsləyir. Qurumda sədrliyin rolu simvolikdir, çünki qərarlar konsensus yolu ilə qəbul edilir. Sədrilik edənin istəyi hər hansı bir müstəsna rol oynamır. Ermənistan KTMT-ni sərhədə dəvət edir. Ancaq Azərbaycan öz sərhədini özü qorumaqda maraqlıdır. Belarusun sərhədində NATO-nun cəmləşməsi, Tacikistan sərhədində “Taliban”ın fəallaşması zamanı quruma dəstəklə bağlı müraciətlər oldu. Onda belə bir təklif eşidildi ki, həmin gərgin zonalara KTMT-nin müşahidə məntəqələri yerləşdirilsin. Ancaq bu baş tutmadı. Ermənistan bu yöndə səylərini edəcək. Bir amili də nəzərə almalıyıq ki, quruma üzv ölkələrin ayrı-ayrılıqda Azərbaycanla yüksək səviyyəli münasibətləri var. Əslində bununla Ermənistan bölgəyə 3-cü qüvvələri cəlb etməyi planlayır. Bilir ki, KTMT onun istəyini reallaşdırmayacaq, bu səbəbdən də alternativ kimi başqa ölkələri köməyə çağıracaq. KTMT bu məsələyə dəfələrlə münasibət bildirib ki, iki ölkə arasındakı gərginliyə müdaxilə onların səlahiyyətinə aid deyil. Tərəfləri məsələni dinc yolla nizama salmağa çağırıb. Rusiya siyasətçiləri bunu Ermənistanın hiyləgər planı adlandırır. Ermənistan sədrliyi dönəmində bu mövzunu hər iclasda qaldıracaq. Nəticə olmasa belə, mövzunu gündəmdə saxlamağa çalışacaq. Yenə də arxayınlaşmamalıyıq. Çünki KTMT Rusiyanın nəzarəti altındadır. Ola bilər ki, Rusiya hansısa maraqlıarını təmin etmək üçün KTMT kartından istifadə etməyi də nəzərdən keçirsin”.
Məhəmmədli Qəribli
