Belə görünür, Ermənistanda get-gedə reallığı dərk etməyə başlayırlar. Söhbət İkinci Qarabağ müharibəsində ermənilərin məğlubiyyətindən sonra onlar üçün ağır qəbul olunan reallıqdan gedir. İlk əvvəl nə baş verdiyini anlamaq istəmirdilər. Çünki uzun illər işğal altında saxladıqları əraziləri sürətlə itirdikləri üçün bir növ şokda idilər. Lakin zaman keçdikcə, bəzi məsələləri anlamağa başlayıblar.
Vəziyyət o yerə gəlib çatıb ki, İkinci Qarabağ müharibəsində ermənilərin məğlubiyyətindən sonra hətta bəzi üzdə olan separatçılar da reallığı qəbul etməyə məcbur olub. Bu baxımdan separatçıların “parlamentinin deputatı” Metakse Akopyan da bu açıqlamaları ilə diqqət çəkir: “Stepanakerti (Xankəndi) tərk edirsən, adam dəli olur. Hər tərəfdə Azərbaycan bayrağı... Yolda üç azərbaycanlı rahat şəkildə böyürtkən yeyir... Şuşi... çox dəyişib və çox eybəcər olub... Siz isə, Araik (Arutünyan) və Nikol (Paşinyan), asfalt çəkirsiz, xalqın başına çəkic atırsız və yalan danışırsız... yalan, yalan, yalan... Bu, sizcə, xilas edəcək?”.
Bax, budur vəziyyət. Azərbaycan Ordusunun qələbəsi bütün mənalarda reallıqları dəyişir.
“Ermənilərin xəstə iddiaları ilə sahib olduqları resurslar uzlaşmır”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlının sözlərinə görə, bu onu göstərir ki, ermənilərin mövcud yeni vəziyyəti qəbul etməkdən başqa çıxış yolu yoxdur: “Çünki onlar aborigen xalq deyillər. Onlar imperiya siyasətinin tərkib hissəsi olaraq Qafqaza köçürülüblər. Əsrlər boyu bu torpağın sahiblərini qovub çıxardılar, yurdlarını xaraba qoydular. Ona görə də başqasının evinə girəndə bilməli idilər ki, nə vaxtsa onları oradan çıxaracaqlar. Ermənilər hər zaman saxta tarix yazırlar, obyektiv tarixi isə öyrənmək istəmirlər. Ermənilər nəinki Cənubi Qafqaza, həm də Şimali Qafqaza köçürülüblər. Ona görə də onlar vətənsiz xalqdır. Erməniləri ona görə Şimali Qafqaza köçürdülər ki, yerli xalqları sıxışdırsınlar. Çeçenləri, inquşları 1944-cü ildə Stalin dövründə sürgün edəndə erməniləri ora köçürdülər ki, saxta bir qurum yaratsınlar. Ancaq Stalinin ölümündən sonra çeçenlərin öz vətənlərinə qayıtması onların planlarını alt-üst etdi. Ona görə də ermənilər öz separatçı məqsədlərindən əl çəkməlidirlər. Heç bir qüvvə Qarabağı Azərbaycandan qopara bilməz. Onların xaricdə nə qədər himayədarları olsa da, vəziyyəti dəyişə bilməyəcəklər. Çünki ermənilərin xəstə iddiaları ilə sahib olduqları resurslar uzlaşmır. 30 il idi Qarabağı işğal altında saxlayırdılar. Bu müddət ərzində nə orada əhalinin sayını artıra bildilər, nə də iqtisadi inkişafa nail oldular. Bax, budur reallıq. O baxımdan ermənilər separatçılıq fəaliyyətindən və torpaq iddialarından əl çəkməlidirlər. Bu ərazilərdə yaşamaq istəyirlərsə qonşu xalqlara hörmət etsinlər”.
Professor bildirdi ki, düşmənçilik hissi ilə yaşamaq erməniləri məhvə aparır.
Vidadi ORDAHALLI
