Ermənistanın baş naziri Nikol Paşinyan yeni müdafiə naziri Arşak Karapetyanı təqdim edərkən bəyan edib ki, Qarabağ münaqişəsi mövcuddur və beynəlxalq ictimaiyyət bu barədə danışır: “ATƏT-in Minsk Qrupunun həmsədrləri aprelin 13-də yaydıqları bəyanatda münaqişənin məlum prinsiplər və elementlər əsasında həll edilməsinin vacibliyinə işarə etdilər.
Yəni beynəlxalq ictimaiyyət özü münaqişənin həllinə olan ehtiyacı düzəldir, buna görə də münaqişənin mövcudluğunu bildirir. Problemin mövcudluğuna dair yanaşmalarımız və mövqelərimiz beynəlxalq ictimaiyyətin mövqeyinə uyğundur”.
Paşinyan iddia edib ki, guya Azərbaycan qoşunlarının Ermənistan ərazisində olması şəraitində iki ölkə sərhədinin demarkasiyası və delimitasiyası mümkün deyil: “Təəssüf ki, sülh təkcə bizdən deyil, həm də bizim və beynəlxalq birliyin regional təhlükəsizliyi təhdid edən ölkələri konstruktiv bir sahəyə gətirmək üçün nə qədər səy göstərəcəyimizdən asılıdır”.
Göründüyü kimi, Paşinyan hələ də “Qarabağ münaqişəsinin mövcudluğundan” danışır və bunu əsaslandırmaqla bağlı absurd arqumentlərlə çıxış edir. Belə görünür ki, 44 günlük müharibədə uğradığı ağır məğlubiyyətdən dərs çıxarmaq istəmir.
“Biz danışıqlarda daha prinsipial mövqe sərgiləməliyik və mövcud yanaşmamızdan bir addım belə geri çəkilməməliyik”
Məsələyə münasibət bildirən AMİP sədri Arzuxan Əlizadənin sözlərinə görə, Paşinyanın bu cür açıqlama ilə çıxış etməsi o deməkdir ki, Ermənistan destruktiv mövqeyindən əl çəkmək niyyətində deyil: “Baxmayaraq ki, 44 günlük müharibədə Ermənistan məğlubiyyətə uğradı, amma yenə öz mənfur niyyətlərindən əl çəkmir. Ermənilər o vaxta qədər xəyal belə etmirdilər ki, 2 ay ərzində Azərbaycan 7 rayonu və Qarabağın əhəmiyyətli hissəsini azad edə biləcək. Ancaq şanlı ordumuzun qəhrəmanlığı sayəsində və əlverişli geosiyasi vəziyyət şəraitində biz buna nail olduq. Ancaq göründüyü kimi, Ermənistan yenə də “Qarabağ münaqişəsindən” danışır. Niyə? Ona görə ki, ATƏT-in Minsk Qrupunun həmsədrləri də bir az aşağı, bir az yoxarı bənzər mövqedən çıxış edirlər. Məhz bu amil Paşinyanı daha da cəsarətləndirir və hər dəfə Qarabağ məsələsinin həll olunmadığını deyir. Məsələ ondadır ki, həmsədr dövlətlər, xüsusən də Fransa və ABŞ bütün vasitələrlə çalışır Minsk Qrupunu yenidən canlandırsınlar. Çox təəssüflər olsun ki, Rusiya onların bu istəyinə qarşı çıxmır. Əksinə, əzəli rəqibləri ilə həmrəylik göstərərək bundan Azərbaycana qarşı bir təzyiq vasitəsi kimi istifadə edir. Prinsipcə, Rusiya buna qarşı olmalıdır. Ona görə ki, 10 noyabr razılaşmasının müəllifi, moderatoru Rusiyadır. Belədə Rusiya digər tərəfləri niyə prosesə şərik qoşmalıdır ki? Donbas məsələsində ABŞ və Fransa ilə tamamilə əks mövqedə olan Rusiya Qarabağ məsələsində yumşaq mövqe sərgiləyir. Ona görə də Paşinyan həmsədrlərin mövqeyindən ilhamlanaraq belə danışır, yoxsa bu dərəcədə irəli getməyə cəsarət etməzdi. Bax, məsələnin kökündə dayanan əsas məqam bununla bağlıdır. Bütün bunlara baxmayaraq, biz danışıqlarda daha ciddi və prinsipial mövqe sərgiləməliyik. Mövcud yanaşmamızdan bir addım belə geri çəkilməməliyik”.
Partiya sədri onu da qeyd etdi ki, biz istənilən ola biləcək təzyiqlərə hazır olmalıyıq.
Vidadi ORDAHALLI
