Rusiyanın Ermənistandakı səfiri Sergey Kopırkin ölkənin İctimai Televiziyasına müsahibəsində bildirib ki, Rusiya sərhədçilərinin Azərbaycan-Ermənistan sərhədinə yerləşdirilmədsinə başlanıb. Onun sözlərinə görə, Rusiya sərhədçilərinin Azərbaycanla sərhəddə yerləşdirilməsi ideyası Zəngəzurda (Sünik) qismən həyata keçirilib.
S. Kopırkin qeyd edib ki, Ermənistan-Azərbaycan sərhədinin problemli bölgələrinə yerləşdirilmək üçün Rusiyadan xeyli sayda əlavə heyət gətirilib. O, iyun ayında Zəngəzura səfər etdiyini, Rusiya və Ermənistan sərhədçilərinin sərhəd postlarını yoxladığını deyib. Səfir deyib ki, Rusiya sərhədçilərinin, Rusiya bayrağının olması sabitliyin qorunması və hər hansı bir gərginliyin qarşısını almaq üçün vacibdir. O bildirib ki, gündəlik problemlər yaranırsa, onların həllində Rusiya sərhədçiləri iştirak edir: “Digər problemli ərazilərə gəldikdə isə, məsələlər Rusiyanın fəal iştirakı ilə müzakirə olunur. Bu problemin əhəmiyyətini başa düşürük, Rusiya müvafiq addımlar atmağa hazırdır. Amma bu, üçtərəfli formatda müzakirə tələb edən bir məsələdir. Praktiki işlər aparılır”.
Məlumat üçün qeyd edək ki, bu günlərdə Ermənistanın Baş naziri Nikol Paşinyan KTMT-yə Ermənistan-Azərbaycan sərhədi boyunca monitorinq missiyası yerləşdirməyi təklif edib. O qeyd edib ki, KTMT çərçivəsində bunu həyata keçirməyin mümkünsüz olduğu şəraitdə, ATƏT-in Minsk Qrupunun həmsədrləri də daxil olmaqla, beynəlxalq səviyyədə tanınmış digər formatlar qəbul edilə bilər.
Maraqlıdır, baş verənləri ekspertlər necə dəyərləndirir?
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafovun fikrincə, Ermənistan müstəqil dövlət olsaydı, özü öz sərhədlərini qoruyardı: “Məlum olur ki, Ermənistan sözdə müstəqildir. Praktiki baxımdan isə müstəqil dövlət deyil. Ötən il Ermənistan 44 günlük Vətən savaşı dönəmində Rusiya və KTMT-ni müharibəyə cəlb etməyə çalışdı. Ancaq Paşinyanın bu cəhdləri alınmadı. Ona görə ki, Azərbaycan öz sərhədləri daxilində real müharibəni apardı, Ermənistan sərhədlərini keçmədi. Ən nəhayət, Rusiya da daxil olmaqla, KTMT-nin digər üzvləri Qarabağ məsələsinin mahiyyətindən xəbərdar idilər və bu səbəbdən loyal mövqe sərgilədilər. İndiki mərhələdə sərhədlərlə bağlı Paşinyanın Rusiyaya müraciət etməsi hakimiyyətin narahatlığından irəli gəlir. Çünki Azərbaycan Zəngəzur dəhlizinin açılmasında israrlıdır və lazım olsa bunu zorla edəcək. Ermənistan da bütün bunlardan bərk narahatdır. Çünki Vətən savaşında ordumuzun gücünü gördü. Ona görə də bu kimi amillərdən çıxış edərək sərhədə Rusiya ordusunu gətirmək istəyir. Bununla Paşinyan həm də Ermənistan-Rusiya münasibətlərini Putinin görmək istədiyi müstəvi üzərinə gətirmək niyyəti güdür. Moskva razılaşmasının şərtlərinə diqqət yetirsək görərik ki, sənəddə Zəngəzur dəhlizinin məhz Rusiya sərhədçiləri tərəfindən qorunması öz əksini tapıb. Sadəcə olaraq, Paşinyan rus qoşunlarını gətirməklə Azərbaycan-Ermənistan sərhədlərinin delimitasiyası və demarkasiyası məsələsində Bakını israrlı mövqeyindən çəkindirmək istəyir. Eyni zamanda, bu minvalla Zəngəzur dəhlizinin açılmasını yubatmaq istəyir. Həmçinin Rusiyanı Qərblə şantaj edir ki, gəlməsəniz başqa alternativlərə müraciət ediləcək”.
Politoloq hesab edir ki, bu cür vasitələrlə Ermənistan Azərbaycana təzyiq edə bilməyəcək.
Vidadi ORDAHALLI
