Baş prokuror Kamran Əliyev parlamentin növbədənkənar iclasında deyib ki, deputat Eldəniz Səlimovun toxunulmazlığının ləğv edilməsi ilə bağlı parlamentə təqdimatımın kifayət qədər əsasları olub.
K.Əliyev bildirib ki, bu gün bəşəriyyəti koronavirus bəlası bürüyüb: “Ölkəmizdə virusun qarşısının alınması istiqamətində ciddi tədbirlər görülür və müsbət nəticələr əldə edilib. Bütün dövlət qulluqçuları, vətəndaş cəmiyyəti bu məsələdə birləşib. Bu sahədə hüquq-mühafizə orqanlarının, xüsusilə daxili işlər orqanlarının üzərinə böyük məsuliyyət düşür. Təəssüflər olsun ki, deputat Eldəniz Səlimov polisin karantin qaydalarına əməl olunmasını tələb etməsi barədə qohumlarından məlumat alaraq həmin polis əməkdaşını evindən kafeyə çağırtdırıb və məlum hadisə baş verib. Məsələ araşdırılıb, cinayət işi qaldırılıb. Cinayət işinin aparılması üçün Eldəniz Səlimovun toxunulmazlığının ləğv edilməsi zəruridir”.
Beləliklə, Baş Prokurorluğun təqdimatı əsasında Milli Məclisin İntizam Komissiyası və plenar iclası müzakirə açaraq qərar çıxarıb.
Deputat Eldəniz Səlimovun hərəkəti parlament üçün çox böyük bir ləkədir. Milli Məclisin İntizam Komissiyasının sədri Eldar İbrahimov parlamentin avqustun 3-də keçirilən növbədənkənar iclasında belə deyib.
O qeyd edib ki, bu məsələ komissiyada geniş müzakirə olunub və Eldəniz Səlimovun toxunulmazlığının ləğv edilməsi üçün kifayət qədər əsasların olduğu müəyyən edilib: “Biz bundan sonra Milli Məclisin şərəfli adını qorumalıyıq. Hər kəs qanun qarşısında bərabərdir və öz əməlinə görə cavab verməlidir. Bu hadisə bizim hər birimiz üçün dərs olmalıdır”.
Fəzail Ağamalı bildirib ki, Milli Məclisin üzvü öz səlahiyyətini aşıb. Onun sözlərinə görə, “Milli Məclisin deputatı polis zabitini yanına çağırıb və onu döyüb. Üstəlik hələ deyib ki, fəxr elə səni Milli Məclisin deputatı döyüb”.
İclasda deputat Tahir Kərimli Eldəniz Səlimovu müdafiə etsə də, Milli Məclisin sədri Sahibə Qafarova deputat Tahir Kərimlinin fikirlərinə sərt reaksiya verib. Deputat Tahir Kərimli Milli Məclisin iclasında Eldəniz Səlimovun toxunulmazlığının ləğv edilməsi ilə bağlı müzakirələrdə çıxışı zamanı “deputatın yiyəsi yoxdur”, kimi fikir səsləndirib.
Milli Məclisin sədri Sahibə Qafarova isə bildirib ki, deputatın yiyəsi xalqdır: “Şəxsən mən sizi iclasdan sonra kabinetimə dəvət edəcəyəm. Sizi 10 dəqiqəlik səsə qulaq asmağa məcbur edəcəyəm. Mən özüm kabinetdən çıxacağam, siz ona qulaq asarsınız. Sizin çıxışınız məni məyus etdi”.
Müzakirələrdən sonra məsələ səsə qoyulub və Eldəniz Səlimovun deputat toxunulmazlığı ləğv edilib
Qeyd edək ki, polis əməkdaşını döydüyü üçün Eldəniz Səlimova qarşı Azərbaycan Respublikası Cinayət Məcəlləsinin 309.2-ci (vəzifə səlahiyyətlərini aşma) maddəsi ilə cinayət işi başlanıb.
Baş prokuror Eldəniz Səlimova qarşı cinayət işinin maddəsinə də aydınlıq gətirib, niyə 315-ci yox, 309-cu maddənin tətbiq edildiyini izah edib. K.Əliyev bildirib ki, hadisə baş verən zaman həmin polis əməkdaşı vəzifə başında olmayıb:
“Bilirsiniz ki, həmin vaxt polis əməkdaşı vəzifəsinin icrasında olmayıb, onu zəng edib ora çağırıb, ona görə də 315-ci (Hakimiyyət nümayəndəsinə qarşı müqavimət göstərmə və ya zor tətbiq etmə ) maddəsinin tətbiqi uyğun deyil. Əgər hadisə polis vəzifə başında olan zaman baş versəydi, bu maddənin tətbiqi nəzərdən keçirilə bilərdi”.
Milli Məclisin qərarı ilə deputat toxunulmazlığı ləğv edilən Eldəniz Səlimov saxlanılıb və Binəqədi rayon məhkəməsində hakim qarşısına çıxarılıb.
Məhkəmənin qərarına əsasən, E.Səlimov barəsində 3 ay həbs-qətimkan tədbiri seçilib.
Xatırladaq ki, iyul ayının 29-da saat 01 radələrində Xaçmaz şəhərində yerləşən “Starıy Dvor” restoranında deputat Eldəniz Səlimovun polis əməkdaşına xidməti vəzifələrinin icrası ilə əlaqədar zor tətbiq etməsi barədə Daxili İşlər Nazirliyindən daxil olmuş material Baş Prokurorluqda araşdırılıb.
Toplanmış material üzrə Cinayət Məcəlləsinin 309.2-ci (vəzifə səlahiyyətlərini aşma) maddəsi ilə cinayət işi başlanıb və istintaqın aparılması Baş Prokurorluğun İstintaq İdarəsinə tapşırılıb. Hazırda iş üzrə intensiv istintaq hərəkətləri aparılır.
Hazırladı: Zümrüd VƏLİYEVA
