Əliyev və Ərdoğana görə məscid imamını mühakimə edirlər...

Tural İrfan: “İslam aləminin din xadimlərinin hər biri həmin adamın müdafisəinə qalxmalıdır”

img

Rusiyada Çelyabinsk kassasiya məhkəməsi Katedral Məsciddə imam köməkçisi çalışan Rinat Yaminevin işinə baxır. O, "VKontakte"-dəki yazılara görə nifrət mühiti yaratmaqda ittiham olunur. Yaminev mətn və videonu rusdilli Day.Az saytından kopyalayıb.

Videoda Azərbaycan Prezidenti İlham Əliyev Dağlıq Qarabağda donuzxanaya çevrilən məscidi ziyarət edib. Mətn bölgədə İslam dini infrastrukturunun kütləvi şəkildə itirilməsindən bəhs edir. Yaminevin ikinci yazısı İslam cəmiyyətinin Fransa prezidenti Emmanuel Makronun Fransada İslamı "nizamlamağın" zəruriliyinə dair təşəbbüslərinə reaksiyası ilə əlaqədardır. Yaminev Türkiyə prezidenti Rəcəb Ərdoğanın və Əl-Əzhər Universitetinin Makronun təşəbbüsünü pisləyən sitatlarını gətirib.

Keçən ilin dekabr ayında bu yazıları qırx beş yaşlı Algeyt Vəliyev görüb və FSB -yə müraciət edib. Müraciətdə qeyd olunur ki, bu yazılar "etnik nifrəti qızışdırır":

"Bu postlar dini hisslərimə təsir edib, mənfi emosiyalar yaradıb. Eyni zamanda ağlı başında olan bir insan kimi başa düşürəm ki, buna görə Ermənistanın sadə vətəndaşları məsuliyyət daşımır. Həmçinin, ermənilər əsasən xristiandırlar və məscid onlar üçün sadəcə bir binadır. Ermənilər bilmədən müsəlmanların dini hisslərinə təsir edə biləcək hər şeyi ora yerləşdirə bilərlər".

Müraciətə əsasən, imam köməkçisinə qarşı inzibati iş açılıb. İndi imam köməkçisi ətrafında yaranmış vəziyyəti siyasi yolla həll etməyə çalışırlar: Azərbaycanın Moskvadakı səfiri Çelyabinsk vilayətinin qubernatoru Anatoli Vekşinlə görüşüb. Danışıqların necə başa çatdığı və məhkəmənin qərarına necə təsir edə biləcəyi məlum deyil.

Rusiyada atılan bu addımı necə şərh etmək olar? Bu, insanların inancına qarşı diskriminasiya sayılırmı?

İlahiyyatçı Tural İrfan “Bakı-Xəbər”ə açıqlamasında bildirdi ki, Rusiyada baş verən bu hadisəni qətiyyətlə pisləmək lazımdır: “Bu təkcə Rusiyada deyil, bütün dünyada əks-təsir verə biləcək bir hadisədir. Din və əqidə azadlığını bu şəkildə boğmaq olmaz. Hələ ki, bu, geniş şəkildə  dünya mediasında yayılmayıb. Ancaq əminəm ki, müsəlman aləmində ciddi rezonansa səbəb olacaq. Ortada ciddi fakt olmaya-olmaya müsəlman dindara qarşı cinayət təqibi həyata keçirilir. Bu işdə siyasi motivin olduğu aydın görünür. Rusiyada bu kimi halların baş verməsi təsadüfi deyil. Jurinovskinin məlum çıxışı, bəzi “jurnalistlərin” ermənipərəst mövqeyi bir-birinə bağlı məsələdir. Bunlar Rusiyadan Ermənistana edilən müsbət  jestlərdi. Bu, bütün  İslam aləminə hörmətsizlikdi. Dindar olan şəxs iki ölkə başçısının fikirini tirajlayıb. Burada hansı qanun pozuntusundan söhbət gedə bilər? Heç bir milli ayrıseçkilikdən söhbət gedə bilməz.  İslam aləminin din  xadimlərinin hər biri həmin adamın müdafisəinə qalxmalıdır. Allahşükür Paşazadə nəyi gözləyir? Niyə çıxıb bəyanat vermir? Həmçinin Türkiyənin din xadimləri fəallıq göstərməlidir. İstisna etmirəm ki, burada Rusiyadakı erməni diasporunun da rolu var”.

İlahiyyatçı hesab edir ki, Azərbaycanın və Türkiyənin əlaqədar qurumları baş verən hadisə ilə bağlı Rusiya rəhbərliyinə müraciət etməlidir.

Məhəmmədəli QƏRİBLİ

Son xəbərlər