Putin də Paşinyana sülh ümidləri ilə baxmağa başladı - dünya düzəlir?...

Vüqar Rəhimzadə: “Paşinyan buna məhkumdur”

img

Məlum olduğu kimi, 10 noyabr 2020-ci il kapitulyasiya aktından bir neçə ay ötsə də, Ermənistan imzaladığı bu sənədin məntiqi davamı kimi Azərbaycanla böyük sülh müqaviləsi imzalamaq istəmir. Çünki hələ də ölkəmizin ərazi bütövlüyünü tanımaqdan israrla yayınır, Qərblə yeni məkrli oyunlar, gedişlər hesabına ATƏT-in Minsk Qrupunu prosesə qatmağa ümid edir.

Təsadüfi deyil ki, iki ölkə sərhədində yaşanan insidentlərin, erməni təxribatlarının arxasında dayanan əsas motiv bununla bağlıdır. Heç şübhəsiz, Azərbaycan bütün bunların fərqindədir və qalib tərəf olaraq buna imkan verməyəcək.

O da məlumdur ki, Nikol Paşinyanın yenidən baş nazir olması rəsmiləşdi. Bu arada Rusiya prezidenti Vladimir Putin Paşinyanı yenidən baş nazir olması münasibətilə təbrik edib və bunları deyib: “Ümid edirəm ki, hökumətinizin fəaliyyəti dost, müttəfiq Rusiya-Ermənistan münasibətlərinin daha da inkişafına, həmçinin Cənubi Qafqazda sülhün, təhlükəsizliyin və sabitliyin möhkəmlənməsinə töhfə verəcək. Öz tərəfimizdən ikitərəfli və regional gündəmin aktual məsələləri üzərində konstruktiv dialoqa və birgə işi davam etdirməyə hazırıq”.

Putin bununla Paşinyana üçtərəfli razılaşmaların alternativinin olmadığı, sülh və sabitlik üçün razılaşmaların icrasının vacibliyi mesajını çatdırır.

Maraqlıdır, bəs ekspertlər bunu necə dəyərləndirir?

  • “Ermənistan üçtərəfli razılaşmanı iqnor etsə, bu həm də Rusiya kimi böyük bir dövlətin nüfuzuna zərbə olacaq”

Məsələyə münasibət bildirən “İki sahil” qəzetinin baş redaktoru Vüqar Rəhimzadə hesab edir ki, Paşinyana ünvanlanan təbrikdə Putin çox diplomatik formada üçtərəfli razılaşmadan irəli gələn məsələlərini həllinin vacibliyini ifadə edib: “Nəzərə alsaq ki, həmin razılaşmalarda Putinin də imzası var, o baxımdan Rusiya maraqlıdır ki, razılaşma həyata keçsin. Çünki burada həm də Rusiya kimi böyük dövlətin nüfuzundan söhbət gedir. Ermənistan üçtərəfli razılaşmanı iqnor etsə, bu həm də Rusiya kimi böyük bir dövlətin nüfuzuna zərbə olacaq. Heç şünbhəsiz, Putin bütün bunların fərqindədir. Ona görə də Paşinyan üçtərəfli razılaşmaları icra etməyə məhkumdur. Əvvəl seçkini bəhanə edib yayına bilirdi. İndi artıq bu amil əldən çıxıb və onun başqa alternativi yoxdur. Putinin də təbrik məktubunda yer alan məlum fikirlər məhz bunu özündə ehtiva edir. Nikola işarə edir ki, dağıdıcılıq mövqeyindən uzaq dursun. Həqiqətən də mesaj verir ki, 10 noyabr və 11 yanvar razılaşmalarından irəli gələn öhdəliklər yerinə yetirilməlidir. Bu baxımdan hesab edirəm ki, Ermənistanın bu öhdəliklərə əməl etməsi labüddür. Baxmayaraq ki, Ermənistan ara-sıra sərhəddə atəşkəsi pozur. Fikrimcə, onun bu oyunları ictimai rəyə hesablanıb. O mənada ki, məğlub tərəf olsa da, guya ortaya mövqe qoyur. Ancaq bütün bunlar əbəsdir”.

Ən nəhayət V.Rəhimzadə onu da qeyd etdi ki, Paşinyanın öz oyununa digər oyunçuları cəlb etmək cəhdləri ona baha başa gələcək.

Vidadi ORDAHALLI

Son xəbərlər