Nikol Paşinyanın həyat yoldaşı Anna Akopyan sosial şəbəkədə paylaşımına görə qəzəbə səbəb olub. Belə ki, Ermənistanın Baş nazirinin həyat yoldaşı Anna Akopyan müharibədə ölən hərbçilərin məzarının fotosunu paylaşaraq, “Sizə güclü, ədalətli, firavan vətən borcluyuq və bu borcu çox tez ödəməsək, əbədi olaraq lənətlənəcəyik. Sizi analarınız qədər sevirəm, analarınız kimi sizinlə fəxr edirəm, analarınız qədər darıxıram, analarınız qədər yanınıza gəlmək istəyirəm. Ancaq sizə borcluyuq, yalnız onu ödədikdən sonra görüşəcəyik” deyə fikirlərini yazıb.
Məhz onun bu paylaşımından sonra sosial şəbəkənin erməni seqmenti onu “alçaq” adlandıraraq, guya güclü ordunun olduğunu dedikləri halda əsgərləri “bonus kimi” xərcləməkdə ittiham ediblər.
Yazının altında Annanın ünvanına çoxsaylı təhqir dolu şərhlər yazılıb:
“Bunkerlərdə gizlənəndə heç ağrı hiss etmədinizmi?”.
“Ağrınız varsa, niyə müharibə əsnasında bir neçə qadınla əsgər-əsgər oynadınız, gəlin, yaşlı anaların yanında oturun, əllərindən tutun, o zaman səmimiyyətinizə inanacağam”.
“Təsvir edilə bilməyən, sonsuz bir alçaqlıq. Bu izaholunmazdır”.
“Əlbəttə ki, söz yazmaq asandır, amma əslində indiki hakimiyyət özünü mükafatlandırmaq və parlamentin təhlükəsizliyini artırmaq barədə düşünür”.
“Böyük bir kütləni zombiləşdirmisinizsə, bu hamımızın beyinsiz olduğumuz anlamına gəlmir, əməllərinizin həddi yoxdur, xanım Erato”.
“Komanda məntəqələrindəki ekranlarda erməni əsgərlərinin necə həlak olduğuna baxanda vicdanın ağrıdımı?”
Qeyd edək ki, Paşinyanın arvadı bu ittihamlar qarşısında səhifəsini bağlayaraq səssiz qalmağı üstün tutub.
Görünən odur ki, A.Akopyan cəmiyyətin ovqatını nəzərə almadan yazdığı statusla özünü gülünc vəziyyətə salıb.
“Erməni cəmiyyətində ciddi məğlubiyyət sindromu mövcuddur və bu hələ uzun müddət davam edəcək”
Məsələyə münasibət bildirən hərbi ekspert İbrahim Rüstəmlinin sözlərinə görə, Paşinyanın arvadı bir neçə dəfə bənzər səhvlər buraxıb: “Hər dəfə də cəmiyyətdə ciddi qınaqla üzləşib. Sanki bu qadın fərqində deyil ki, işğalçı Ermənistan ordusu necə ciddi məğlubiyyətə uğrayıb. Müharibənin bitməsindən 8 ay keçsə də, erməni cəmiyyətində ciddi məğlubiyyət sindromu mövcuddur və bu hələ uzun müddət davam edəcək. Bütün bunlarla yanaşı, kimin nə deməsindən asılı olmayaraq Ermənistanın üzləşdiyi məğlubiyyətin məsuliyyəti Paşinyanın üzərindədir. Çünki Paşinyan baş nazir olandan sonra təhrikedici addımlar atıb və müharibənin başlanmasına birbaşa zəmin yaradıb. A.Akopuyan zənn edir ki, Nikol 20 iyun seçkilərində qalib gəldiyi üçün bir sıra məsələlər arxa plana keçib. Çünki məğlub liderin seçkidə yenidən qalib gəlməsi bunları əməllicə çaşdırıb. Ancaq bunlar anlamırlar ki, Ermənistanda seçicilərin 50 faizi seçkidə iştirak etməyib. Bu o deməkdir ki, səsverməyə qatılmayan seçicilər nə Paşinyana, nə də revanşistlərə stavka edib. Paşinyanın seçkilərdə iştirak edən seçicilərin 54 faiz səsini alması o demək deyil ki, ona güclü etimad göstərilib. Qətiyyən bu belə deyil. Paşinyan və onun ailəsi 44 günlük müharibədə uğradıqları məğlubiyyətin ölkədə yaratdığı mənəvi-psoxoloji böhranın fərqinə varmaq istəmirlər. O üzdən, saxta çağırışları cəmiyyətdə belə qəzəblə qarşılanır”.
Hərbi ekspert hesab edir ki, bu baxımdan Ermənistanda böhran hələ davam edəcək.
Vidadi ORDAHALLI
