Türk birliyinin Avroittifaq kimi güclənmək perspektivi erməniləri qorxudur...

Elşad Musayev: “Ermənilərin indidən bundan belə narahat olması təsadüfü deyil”

img

Artıq indidən erməni mediası türkdilli dövlətlərin inteqrasiyasından, bunun perspektivindən narahat olmağa başlayıb. Türk dövlətləri birliyinin Avropa İttifaqını üstələyəcəyi proqnozlaşdırılır.

Bununla bağlı “Qraparak” qəzetində bir sıra məqamlara toxunulub: “Belə bir baxış yayılıb ki, Azərbaycan və Türkiyənin məqsədi türkdilli dövlətləri milli, dini zəmində birləşdirməkdir. Ermənistan buna mane olur. Əlbəttə, Ermənistan bu ölkələrin xəyal etdiyi kommunikasiyaların inkişafı üçün maneədir. Onlar (Türkiyə və Azərbaycan) tranzitlik üçün ödəniş etmək istəmirlər, aralarındakı yük daşımalarının hər hansı başqa ölkənin gömrük nəzarəti altında olmasını istəmirlər. Azərbaycan, Qazaxıstan, Özbəkistan, Türkmənistan və Qırğızıstan, türkdilli ölkələr olmaqdan başqa, dənizə çıxışı olmayan ölkələrdir”.

Bununla belə qeyd edilir ki, indi SSRİ yoxdur, lakin başqa birlik yarana bilər: “İstəyirsiz türkdilli dövlətlər birliyi deyin. Nə alınır? Türkiyənin sayəsində Mərkəzi Asiya və Cənubi Qafqazın daha 6 ölkəsi dənizə çıxışı olmayan ölkələr ola bilər. Bundan hansı sinegik effekt alına biləcəyini təsəvvür etmək və ya hesablamaq indi çətindir. Lakin bu yeni birliyin iqtisadi və hərbi potensialının qısa müddətdə Avropa İttifaqını üstələyəcəyindən şübhə etməmək olar”.

Görünən odur ki, ermənilər formalaşan türk birliyinin perspektivindən indidən qorxuya düşüblər.

Məsələyə münasibət bildirən Böyük Azərbaycan Partiyasının sədri Elşad Musayevin fikrincə, ermənilərin indidən bundan belə narahat olması təsadüfü deyil: “Əvvəla, nəhayət ermənilər həqiqəti başa düşməyə başlayıblar. Çünki doğrudan da Azərbaycan və Türkiyə ilə yanaşı, digər türkdilli dövlətlərin dərin əməkdaşlığı, inteqrasiyası gözlənilir. Azərbaycanla Türkiyə arasında əməkdaşlıq dərinləşir. Digər ölkələr də bu birliyin perspektivinə inanır. Son dövrlər bu istiqamətdə görülən bir sıra işlər buna hesablanıb. Çünki türkdilli dövlətlərin böyük və çoxşaxəli potensialı var. Bu potensial imkan verir ki, bu dövlətlər güclü bir birlik yaratsınlar. Nəzərə almaq lazımdır ki, türkdilli dövlətlər həm təbii resurslarına görə zəngindir, həm də bu arealda mövcud olan dövlətlərin demoqrafik göstəriciləri üstün səviyyədədir. O baxımdan türkdilli dövlətlərin müxtəlif sahələrdə inteqrasiya olunmaları ciddi perspektiv vəd edir. Hesab edirəm ki, tütrk birliyinin iqtisadi göstəriciləri Avropa İttifaqından da üstün olacaq. Niyə? Ona görə ki, Avropa əhalisi qocalır. Bəzi Avropa ölkələrində əhalinin azalması prosesi gedir. Ancaq Avropadan fərqli olaraq, türkdilli dövlətlərin əhalisi artır. Mühüm nəqliyyat və enerji xəttləri bu coğrafiyadan keçir. Ona görə də Ermənistan bütün bunlardan ciddi nəticə çıxarıb, təcavüzkarlıq iddialarından əl çəkməlidir. Qonşu dövlətlərlə normal münasibətlər qurmalıdır”.

Partiya sədri hesab edir ki, əks təqdirdə Ermənistanın mövcudluğu sual altına düşəcək.

Vidadi ORDAHALLI

Son xəbərlər