Mandatı ləğv edilmiş deputatın diplomu ilə də bağlı iddialar var…

Elşən Həsənov: “Hesab edirəm ki, belə təsadüfi adamlar parlamentdə və məmurlar arasında az deyil”

img

Milli Məclisin son iclasında deputat Eldəniz Səlimovun toxunulmazlığı ləğv edilib. Baş prokurorun təqdimatına həmkarları tərəfindən müsbət rəy verilib. Bir neçə gündür ki, deputatın Xaçmazda polisi döyməsi hadisəsi ictimaiyyət arasında və sosial şəbəkələrdə ciddi müzakirə mövzusudur. Çoxu 45 yaşlı deputatı son törətdiyi hadisədən sonra tanıdıqlarını vurğulayır.

Buna səbəb isə iki dönəm seçkidə iştirak edib parlamentdə təmsil olunan deputatın 11 il ərzində fəallığı ilə fərqlənməməsidir. Belə ki, onun Milli Məclisin tribunasında, yaxud da mətbuatda ölkə gündəmində baş verən hadisələrlə bağlı çıxışlarına az-az rast gəlmək mümkündür.

Bundan əlavə, deputat bu ilin iyun ayında Xaçmaz rayonu, Köhnə Xudat bələdiyyəsi, Fərzəlioba kəndində yerləşən meşə fonduna məxsus ərazi ilə bağlı da gündəmə gəlmişdi. Belə ki, məlumata görə, ərazi saxta sənədlərlə bələdiyyəyə verildikdən sonra qanunsuz yolla onun tərəfindən alınıb və atası Adil Səlimovun adına sənədləşdirilib. Həmin meşə fondunun ərazisində yerləşən ağacların kəsilərək məhv edildiyi və yerində meyvə bağı salındığı qeyd edilmişdi. Deputatın yaşıllıqları məhv etməsi elə o zaman tənqidlə qarşılanmışdı.

E.Səlimovla bağlı sosial şəbəkələrdə ən çox müzakirə olunan detallardan biri də onun diplomu ilə bağlıdır. Belə ki, E.Səlimovun təhsili haqqında məlumatlarda 1993-1998-ci illərdə Dağıstan Dövlət Universitetində iqtisadiyyat ixtisası üzrə təhsil aldığı qeyd olunur. Maraqlı məqam isə Azərbaycanda sözügedən universitetin diplomlarının Təhsil Nazirliyi tərəfindən tanınmamasıdır. Bu halda deputatın saxta yolla diplom aldığı da iddia edilir.

Hətta ali təhsilliliyinin doğruluğu belə şübhə doğuran birinin bu səviyyəyə gəlib çatmasında hansı amillərin rolu olub?

Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, çox acınacaqlı hal yaranıb: “Təəssüflə qeyd etməliyik ki, bu cür adamlarla bağlı məlumatlar yalnız onların hansısa bədnam əməlinə görə ifşasından sonra ortaya çıxır. Eldəniz Səlimov 11 ildir deputatdır. Dəfələrlə onun sənədləri müxtəlif instansiyalara, hətta Mərkəzi Seçki Komissiyasına təqdim edilib. Niyə onda bütün bunlara irad tutulmayıb? Bəli, mən də razıyam ki, deuptatlar ən layiqli adamlar olmalıdır. Onların davranışı, keçdikləri həyat yolu, aldıqları təhsil digərlərinə nümunə olmalıdır. Biz nəyi görürük? Bu adam 11 ildir deputatdır və onu heç kim tanımır. Polisi döyəndən sonra tanınıb. Hətta aldığı ali təhsilin belə saxtalığı üzə çıxıb. Mən hesab edirəm ki, belə təsadüfi adamlar parlamentdə və məmurlar arasında az deyil. Onların tapılıb, saxtakarlığının üzə çıxarılması vacibdir. Biz hər şeyi dövlətin üzərinə atmamalıyıq. Hanı ictimai nəzarət? Belə faktları gərək QHT-lər, media tapıb ictimailəşdirsin. Hazırda bütün qurumların ictimai şuralarına seçkilər keçirilir. Elə ki seçildilər, sosial şəbəkələrdəki profillərinə hansı qurumun ictimai şurasında təmsil olunduqlarını fəxrlə yazırlar. Bununla da işlərini bitmiş sayırlar. Deyilən formadakı acınacaqlı halların ifşası mütləq lazımdır ki, gələcək faciələrdən, xoşagəlməz hallardan sığortalanaq. Biz elə etməliyik ki, növbəti Eldəniz Səlimovların tamaşasına seyrçi olmayaq. Belə neqativlikləri vaxtında tapıb ifşa etməliyik”.

Məhəmmədəli QƏRİBLİ

Son xəbərlər