Ordumuz yenə erməniləri lərzəyə gətirdi

img

Ermənistanın mövqeyi üzündən sərhəddə hələ də gərgin vəziyyət hökm sürür. Lakin indi ermənilər özləri də etiraf edirlər ki, bu hal Ermənistana baha başa gələ bilər. Özü də o fonda ki, Azərbaycan, lazım gələrsə, Ermənistan ordusunu bu ölkə daxilində də darmadağın etməyə tam hazır olduğunu bildirir. Artıq bu məsələ erməni cəmiyyətində yeni ajiotaja səbəb olub.

Xatırladaq ki, bu günlərdə Mərkəzi Komanda Məntəqəsində keçirilən xidməti müşavirədə müdafiə naziri, general-polkovnik Zakir Həsənov döyüş planlarının dəqiqləşdirilməsi, intensiv təlim və məşqlər zamanı qoşunların yüksək döyüşə hazırolma səviyyəsinə gətirilməsi və yenidən qruplaşması üzrə tədbirlərin keçirilməsi barədə tapşırıqlar verib. Nazir, həmçinin, döyüş və maddi-texniki təminat məsələlərinə diqqətin artırılmasını da tələb edib. Bu məsələ artıq erməni cəmiyyətində də xüsusi diqqət mərkəzində yer alır. Burada hesab edilir ki, Azərbaycan erməni ordusuna yenidən sərt zərbələr vurmağa hazırlaşır. Indiki erməni ordusu isə bunun qarşısını almağa qabil deyil. Bu fonda yeni müdafiə naziri Arşak Karapetyan ciddi tənqid hədəfidir. Qeyd edək ki, Ermənistan prezidenti Armen Sarkisyan baş nazir Nikol Paşinyanın təklifi ilə bir sıra vəzifələrə yeni təyinatlarla bağlı fərman imzalayıb. Yeni təyinatlar arasında ən diqqət çəkəni Arşak Karapetyan olub. O, 2016-cı ilin aprel döyüşlərində rüsvayçı məğlubiyyətdən sonra Ermənistan Silahlı Qüvvələri Baş Qərargahının Kəşfiyyat İdarəsinin rəisi vəzifəsindən azad edilib. Daha sonra 2018-ci ildə Nikol Paşinyan Arşak Karapetyana yeni vəzifə verib və onu öz müşaviri təyin edib. Ermənistan mətbuatı generalın bu vəzifəyə 2008-ci ilin 1 mart hadisələri ilə bağlı ifadə verməyə razılaşdığı üçün gətirildiyini yazıb. Arşak Karapetyan 2021-ci ilin 6 aprelində bu vəzifədən azad edilib. Lakin generalın vəzifədən kənar qalması çox çəkməyib. O, 2021-ci ilin 13 aprelində Silahlı Qüvvələrin Baş Qərargah rəisinin birinci müavini təyin olunub. Arşak Karapetyan 2021-ci ilin 20 iyulunda Ermənistan müdafiə nazirinin birinci müavini vəzifəsinə gətirilib. Indi isə müdafiə naziridir. Erməni sosial şəbəkə istifadəçiləri qeyd edir ki, bu günlərdə azərbaycanlıların ələ keçirdiyi postla bağlı baş verənlər Arşak Karapetyanın əslində səriştəsiz biri olduğunu meydana qoyur: “Ermənistan ordusunda ratsiya aparatlarının necə işlədiyindən xəbəriniz varmı?. Hamımız xatırlayırıq ki, bir neçə gün əvvəl Vardenisdəki postumuz ələ keçirildi və döyüşçülərimiz nəticədə geriyə çəkildi. Azərbaycan hərbçiləri postumuzda olarkən, iki “Hytera” ratsiyası da daxil olmaqla, bütün sursatları və texniki avadanlıqları götürüblər. Normal bir orduda bütün batalyonun ratsiya kodları dərhal dəyişir. Lakin ordumuzda dəhşətli şeylər baş verir. Kodlar hələ dəyişdirilməyib və ümumiyyətlə, dəyişib-dəyişməyəcəyi bəlli deyil! Zabitlərin kodların niyə dəyişmədiyinə dair sualına “Ehtiyac yoxdur”  cavabı verməsinin səbəbi sadədir, görünür, orda Baş Qərargahdakı oğullarımızın azərbaycanlı hərbçilər tərəfindən dinlənilməsinə ehtiyac duyurlar. Yaxşı, heç nəyə təəccüblənmirik. Lakin ən maraqlısı budur ki, bütün bunlardan sonra orduya etimad göstərilməsini tələb edirlər”. Bu fonda hesab edilir ki, Arşak Karapetyan da orduda heç nəyi dəyişməyəcək və Azərbaycan istəyinə nail olacaq. Erməni politoloq Andrias Qukasyan bildirib ki, məhz buna görə də Ermənistan hökuməti başqa yolla getməyi, yəni ən vacib təhlükəsizlik məsələlərini Moskvaya təhvil verməyi üstün tutur. Rus politoloq, Cənubi Qafqaz məsələləri üzrə ekspert Andrey Areşinin də məsələyə münasibəti olduqca maraqlıdır: “Bu gün sərhəddə atışmalara birinci kimin başladığını müəyyənləşdirmək asan deyil, çünki tərəflər bir-birinə zidd bəyanatlar verir. Azərbaycan rəqibə, təkcə hərbi yox, hərtərəfli təzyiq göstərməyə çalışır. Azərbaycan Müdafiə Nazirliyi öz hesabatlarında rayonları Azərbaycan adları ilə adlandırır. Ermənilər isə tədricən bununla barışır və bilirlər ki, Azərbaycana müqavimət göstərə bilməyəcəklər”. Ermənistanın Şurnux kəndinin başçısı Hakob Arşakyan da hadisələrin inkişafından qorxanlar sırasındadır: “Azərbaycan hərbçiləri Sünik vilayətinin Şurnux kəndinin yerləşdikləri hissəsində aktiv mühəndis işlərini davam etdirirlər. Onlar mühəndis işləri məsələsində aktivdirlər, lakin nə inşa etdiklərini bilmirəm. Onların nəzarəti altında olan yüksəklik var, Şurnux kəndinin birbaşa qarşısıdır. Orada yenə post qurublar. Kənddə, nəzarətləri altına keçən hissələrdə işlər aparırlar, böyük bokslar inşa edirlər, mənə elə gəlir ki, texnikanın saxlanması üçün yer hazırlayırlar”.
Arşakyanın sözlərinə görə, hər gecə Azərbaycan maşınlarının karvanı Şurnux yaxınlığında yerləşən əraziyə daxil olur. O, mümkün savaş halında ermənilərin müqavimət üçün lazımı imkanlara malik olmadığını da etiraf edir.

Nahid SALAYEV

 

 

 

Son xəbərlər