Zaman-zaman ABŞ Konqresindəki ermənipərəst konqresmenlər Azərbaycanı hədəf almaqla gündəmdə olublar. Eyni zamanda, sözügedən konqresmenlər Türkiyəyə qarşı müxtəlif təşəbbüslərlə çıxış ediblər və bir sıra hallarda istəklərinə nail ola biliblər. Maraqlıdır ki, indi də onlar açıq formada Rusiyanı hədəf alıblar. Bu baxımdan Nümayəndələr Palatasının üzvü Adam Şiffin açıqlamaları diqqəti cəlb edir.
A.Şiff Rusiyanın Cənubi Qafqazdakı roluna toxunaraq, bununla bağlı bir sıra çağrışlar edib: “ABŞ Nümayəndələr Palatasının Azərbaycanı hərbi yardımdan məhrum etmək haqqında qəbul etdiyi qanun layihəsi qələbədir. Lakin qanun layihəsi hələ də bir neçə mərhələdən keçməlidir. Rusiya hər zaman öz maraqlarını güdür. Əgər atəşkəsə ehtiyac varsa və bu onun maraqlarına uyğundursa, o zaman barışıq olacaq, münaqişəni dondurmaq lazımdırsa, əmin olun ki, ATƏT -in Minsk Qrupu heç vaxt uğur qazana bilməz. Biz görürük ki, Ermənistan Rusiyadan asılıdır, ona görə də Ermənistan-Amerika münasibətlərini gücləndirmək lazımdır ki, Ermənistan həm iqtisadi cəhətdən, həm də təhlükəsizlik baxımından daha müstəqil olsun”.
Bütün bunlar təsadüfə oxşamır. Görünən odur ki, ermənipərəst konqresmenlərə yeni missiya həvalə olunub. Son vaxtlar Qərbin Paşinyana verdiyi dəstək fonunda əsas məqsəd Ermənistanı Rusiyanın təsir dairəsindən çıxarmaqdır. O üzdən ermənipərəst konqresmenlər bu cür çağrışlarla çıxış edirlər.
Maraqlıdır, bəs ekspertlər bütün bunları necə dəyərləndirir?
“Yenə ikili standartlara üstünlük verəcəksə, o zaman Vaşinqtonun Ermənistan siyasəti də fiaskoya uğrayacaq”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu: “ABŞ konqresmenlərinin Rusiyaya qarşı bu mesaj və tənqidləri müəyyən məqsədlərə hesablanıb. Niyə məhz indi onların bu yöndə fəallaşması təsadüfü deyil. Bu, Rusiyanın Ermənistanda mövqelərinin zəiflədilməsinə və Paşinyana dəstək verilməsinə hesablanıb. Bütün bunlar onu göstərir ki, Ermənistan uğrunda Rusuya və ABŞ mütləq toqquşacaq. Birləşmiş Ştatlar Ermənistanda öz maraqlarını təmin etməyə çalışır. Bu istiqamətdə ermənipərəst konqresmenləri ortaya salır və onlardan bir alət kimi istifadə edir. Düşünürəm ki, ABŞ-ın regiondakı siyasəti Rusiya üçün müəyyən baş ağrısı olacaq. Hesab edirəm, ABŞ bu siyasətində obyektivliyə üstünlük verəcəksə, müəyyən üstünlüklərə nail olacaq. Yox, yenə ikili standartlara üstünlük verəcəksə, o zaman Vaşinqtonun Ermənistan siyasəti də fiaskoya uğrayacaq. Hesab edirəm ki, ABŞ Rusiyanı Ermənistandan sıxışdıra bilsə, o zaman regionda xeyli güclənəcək. Ancaq indidən Vaşinqtonun öz məqsədlərinə nail ola biləcəyini proqnozlaşdırmaq çətindir”.
Politoloq hesab edir ki, Paşinyan seçkilərdə qalib gəldiyi üçün ABŞ Rusiyanı sıxışdırmaqdan ötrü səylərini daha da artıracaq.
Vidadi ORDAHALLI
