Rusiya Liberal Partiyasının sədri Vladimir Jirinovski yenə də “kor atı minib göndələn çapır”. Adam o qədər sərsəmləyir ki, nə danışdığını bilmir. Deyəsən, Azərbaycanın 44 günlük Vətən müharibəsində qazandığı qələbə Jirinovskinin də qara planlarının üsündən tamamilə xətt çəkib. Bu adam o qədər çaşıb ki, nə danışdığını bilmir. Jirinovski deyib ki, Bayden istəsə, iki həftəyə İlham Əliyevi devirə bilər.
Xüsusən də 44 günlük Vətən müharibəsindən sonra İlham Əliyevin nüfuzu bu qədər qalxıbsa, hansısa xarici ölkənin onu devirməsinə Azərbaycan xalqı imkan verərmi?
- Rauf Qurbanov: “Biz sərsəm mövqeyə münasibət bildirməklə...”
Azərbaycan Kommunist Partiyasının sədri Rauf Qurbanov “Bakı-Xəbər”ə şərhində bildirdi ki, Jirinovski belə bir iddia irəli sürməklə böyük yanlışlığa yol verir. R.Qurbanov hesab edir ki, Jirinovski kimilərinə cavab vermək onu reklam etməyə xidmət edə bilər. Amma bununla belə, partiya sədri məsələyə bu şəkildə münasibət bildirdi: “Ümumiyyətlə, mən Jirinovski kimi siyasətçilərin fikirlərinə münasibət bildirmək istəməzdim. Hesab edirəm ki, bu tip siyasətlə məşğul olan insanların sərsəm açıqlamaları vətəndaşı olduğu ölkənin beynəlxalq nüfuzuna ciddi ziyan vurur. Peşəkar siyasətlə məşğul olan insanlar Jirinoski kimilərinin hansı qəbildən olduğunu yaxşı bilir və onun mövqeyi heç vaxt ciddi qəbul olunmur. Siyasətdə təlxəklik özünə hörmət edən insana başucalığı gətirməz.
O ki qaldı onun Azərbaycan Respublikası və Azərbaycan xalqı haqqında dediyi fikrə, hesab edirəm ki, heç bunu şərh etməyə dəyməz. Biz sərsəm mövqeyə münasibət bildirməklə hardasa Jirinovskini reklam etmiş oluruq. Hər atılan daşın arxasınca yüyürməzlər. İt hürər, karvan keçər.
Azərbaycan Respublikasında hakimiyyət xalqa məxsusdur. Kimin prezident olmasını isə demokratik seçkilərlə Azərbaycan xalqı müəyyənləşdirir”.
- Fərəc Quliyev: “Prezident haqqı olan bir etibarı qazanıb və xalq tərəfindən də çox ciddi şəkildə müdafiə olunur”
Milli Dirçəliş Hərəkatı Partiyasının sədri Fərəc Quliyevin fikrincə də, Jirinovskinin fikirləri cəfəngiyatdan başqa bir şey deyil. “Əlbəttə, bu cəfəngiyatdı və Azərbaycan hökməti, təbii ki, Ali Baş Komandan bu gün reytinqinin ən yüksək mərhələsini yaşayır. Yəni Prezident haqqı olan bir etibarı qazanıb və xalq tərəfindən də çox ciddi şəkildə müdafiə olunur. 30 ildən sonra Azərbaycan torpaqlarının azad olunması, ölkənin səfərbər olunması, birliyin yaradılması, ordumuzun çox doğru zamanlama ilə düşməni məhv etməsi, təbii ki, Ali Baş Komandanın birbaşa özünün layihəsidir, onun sənət əsəridir. Ona görə də çox yüksək reytinqə malikdirsə, belə bir halın olması mümkün deyil. Söhbət ondan gedir ki, bu gün Jirinovskinin çərənləmələrinə mətbuatda müxtəlif ictimai-siyasi xadimlər, tanınmış adamlar, deputatlar münasibət bildirir. Əslində, Jirinovski Rusiyanın boğazıdır, danışır, o icraçıdır...”
F.Quliyev hesab edir ki, müharibədən əvvəl də, müharibə dönməmində də, müharibədən sonra da Rusiyanın kifayət qədər xətaları olub, biz Rusiyanın müharibənin gedişində ermənilərə 900 ton silah-sursat verdiyinin fərqindəyik: “Rusiya özü də inkar etmir. Deyir ki, balansı saxlamaq üçün Ermənistanı silahlandırıb. Müharibənin gedişində onlara ballistik raketlər verdi. Bugünə qədər bizə cavab verməyiblər ki, “İsgəndər” raketlərini kim hardan, necə atıb”.
F.Quliyev deyir ki, Rusiya indiyə qədər bizə qarşı etdiklərinə aydınlıq gətirməyib, lakin gətirməlidir.
İradə SARIYEVA
