Yadigar Məmmədli: “Azərbaycanın beynəlxalq müstəvidə media sahəsində apardığı siyasət artıq öz bəhrəsini verir”
Polşanın ictimai kanalı olan "TVP"-də Dağlıq Qarabağ münaqişəsinin başa çatmasından sonra Azərbaycan üçün yaranmış çətinliklər haqqında reportaj yayımlanıb.
"Sülhə gedən çətin yol" adlı verilişdə qeyd edilir ki, keçmiş Dağlıq Qarabağ münaqişəsi təxminən bir il əvvəl başa çatsa da, hələ də Azərbaycanın geri qaytardığı ərazilərdə normal həyat bərpa olunmayıb. Region isə dünya gücləri arasında rəqabət meydanına çevrilib. Polşa telekanalının, media orqanlarının Qarabağla bağlı bir sıra həqiqətləri dilə gətirməsi Ermənistan cəmiyyətində ciddi məyusluq yaradıb. Ziyalılar, siyasət və media adamları "TVP" kanalının İrəvanın maraqlarına zidd davranışından təəccübləndiklərini bildirirlər.
Erməni mediası yazır ki, bir zamanlar Polşa mediasında sahib olduqları üstünlükləri sürətlə itirirlər: “Polşa İctimai Televiziyası əsas xəbər proqramı zamanı Ermənistan əleyhinə xüsusi bir reportaj yayımladı. Bir neçə il əvvəl bu telekompaniya Ermənistanın İctimai Televiziyası ilə əməkdaşlıq memorandumu imzalamışdı və bunun nəticəsində Qarabağ problemindən bəhs edən filmlər çəkildi. Əvvəllər biz bu hal ilə qürur duyurduq. Azərbaycanlılar isə etiraz əlaməti kimi səs-küy salırdılar. İndi hər şey tam əksinədir. Get-gedə Ermənistan əvvəl media sahəsində sahib olduğu üstünlükləri bir-bir itirir. Nəinki ölkə, hətta diplomatiyamız belə məhv edilməsəydi, indiki hadisələr baş verməzdi”.
Görünən odur ki, daha ermənilər əvvəlki kimi bir sıra Avropa ölkələrində Qarabağla bağlı yalan üzərində qurulan kampaniya apara bilmirlər. Bu isə artıq postmüharibə dövründə sözügedən məsələdə reallıqların dəyişməsindən xəbər verir.
- “Nəinki Polşada, bütövlükdə bir sıra digər Avropa ölkələrinin media orqanlarında...”
Məsələyə münasibət bildirən media üzrə ekspert, Demokratik Jurnalistlər Liqasının sədri Yadigar Məmmədli Azərbaycanın bu sahədə üstünlüyü ələ ala bilməsini bir sıra amillərlə əlaqələndirdi: “Nəinki Polşada, bütövlükdə bir sıra digər Avropa ölkələrinin media orqanlarında Qarabağ həqiqətlərinin obyektiv işıqlandırılması halları artıb. Əvvəlki illərdəki kimi ermənilərin maraqlarına hesablanmış birtərəfli materiallara elə də yer verilmir. Qarşı tərəfin mövqeyi də işıqlandırılır. Məsələ ondadır ki, 44 günlük Vətən müharibəsindən sonra dünya və qlobal media Azərbaycan həqiqətlərini müəyyən qədər həqiqətəuyğun işıqlandırır. Bunun bir sıra səbəbləri var. Əvvəla, Vətən müharibəsi dövründə Prezident İlham Əliyev çox mükəmməl səviyyədə 30-a yaxın dünya media qurumuna müsahibələr verdi. Nüfuzlu media qurumlarının sözügedən müsahibələri dünyanın hər tərəfinə yayması çox önəmli hadisə idi. Nəticədə dünya ictimaiyyəti Qarabağ həqiqətləri ilə bağlı obyektiv informasiya aldı. Bir sıra məsələlərə yanaşma dəyişdi. Məlum oldu ki, Ermənistanın ötən illər ərzində apardığı siyasət işğala söykənib. Azərbaycanın ortaya ciddi faktlar qoyması dünya mediasını bunları yaymağa məcbur etdi. Bu çox ciddi məsələdir. Nəticədə beynəlxaq ictimai rəy dəyişməyə başladı. Baxmayaraq ki, bir sıra ölkələrin media qurumlarında çoxsaylı erməni kökənli şəxslər var, amma onlar bu həqiqətlərin yayılmasını önləyə bilmədilər. Bu baxımdan Polşa mediasında Qarabağ həqiqətlərinin obyektiv işıqlandırılması önəmli hadisədir. Hətta Rusiyanın özündə belə, media orqanlarında Azərbaycanla bağlı ciddi və həqiqətəuyğun materiallar gedir. Bir neçə il əvvəl bunu demək mümkün deyildi. Bütün bunlar onu göstərir ki, Azərbaycanın beynəlxalq müstəvidə media sahəsində apardığı siyasət artıq öz bəhrəsini verir”.
Media eksperti hesab edir ki, bu siyasəti davam etdirmək lazımdır.
Vidadi ORDAHALLI
