Türkiyədə güclü meşə yanğınları hələ də davam edir. Yanğınlar ilk olaraq iyulun 28-i Antalyada başlasa da, daha sonradan 7 ayrı əyalətə keçib. Yanğınların miqyası onun qəsdən törədilməsi ehtimalını günü-gündən artırır.
Belə ki, bu yanğın bir-birindən əlaqəsiz əyalətdə baş verir və yay aylarında isti havanın təsirindən baş verən yanğına bənzəmir. Sosial şəbəkələrin Türkiyə seqmentində yanğınların kim tərəfindən törədilməsi ilə bağlı geniş müzakirələr aparılır. Bu müzakirələrin mərkəzində yanğının PKK terror qruplaşmasının nümayəndələri tərəfindən törədildiyi yer alır. Keçmişdə özlərini “Atəşin övladları” adlandıran terrorçular Qara dəniz, İç Anadolu və Ağ dəniz bölgəsində yanğınlar törətmişdi. İndi də bir-birindən kilometrlərlə uzaqda baş verən yanğınların yenidən bu terrorçular tərəfindən törədilməsi ilə bağlı şübhələr artıb. Bununla bağlı başqa versiyalar da irəli sürülür. Yanğınların törədilməsində Yunanıstanın və ermənilərin də əlinin ola bilməsinə dair versiyalar səsləndirilir. Qeyd edək ki, hər iki ölkənin Türkiyə ilə gərgin münasibətləri var. Artıq PKK terror təşkilatının “Atəşin övladları” adlı qruplaşması yanğınla bağlı məsuliyyəti öz üzərinə götürüb. Qeyd etmək lazımdır ki, PKK terrorçuları daha əvvəllər də onlara qarşı həyata keçirilən əməliyyatlara cavab olaraq təxribat və s. bu tipli cinayət əməllərinə əl atıblar.
Ölkənin kənd təsərrüfatı və meşə naziri Bekir Pakdemirli yanğınlarla bağlı danışarkən bunun təxribat ola biləcəyi ehtimalını da istisna etməyib.
Antalyadan 500 km aralıda olan Ankarada yanğın törətməyə çalışan bir nəfər saxlanılıb. Məlumata əsasən, Polatlı adlı qəsəbədə bir nəfər otları yandırıb qaçmağa çalışarkən sakinlər tərəfindən saxlanılıb və polisə təslim edilib. Bəzi ekspertlər hesab edir ki, Türkiyənin hərbi-siyasi sahədə, üstəlik geopolitik anlamda dəyərinin artması bir çox ölkəni narahat edir. Bu baxımdan PKK-nın bunu, xüsusilə turizm mövsümündə, turizmin vəziyyətinin normala qayıtdığı bir dövrdə etməsi diqqət çəkir. Yanğınların geniş formada yayılması onu göstərir ki, burada PKK-dan başqa marağı olan digər qüvvələr də var. Türkiyə ilə maraqları üst-üstə düşməyən ölkələr bu məsələdə PKK-ya köməklik göstərə bilərlər. Həmin bölgələrin hədəf seçilməsində məqsəd bəllidir. Çünki Türkiyə iqtisadiyyatının əsas gəlir mənbələrindən biri turizm sektorudur. Ölkəyə xarici valyuta axınında da turizmin payı yüksəkdir.
Politoloq Əhəd Məmmədli “Bakı-Xəbər”ə açıqlamasında bildirdi ki, əvvəl versiyalar çox səslənirdi, şübhələr də müxtəlif istiqamətlərə gedirdi: “Artıq PKK terror təşkilatının bir qolu yanğınların törədilməsilə bağlı məsuliyyəti öz üzərinə götürüb. Türkiyədə analoji fəaliyyətlə PKK bundan əvvəl də məşğul olub. Yanğının həcminin böyüməsi isə hava və iqlim şəraitilə bağlıdır. Buna görə də, Türkiyəyə ciddi ziyan dəyib. Artıq Türkiyə qərar verdi ki, Şimali İraqda yeni antiterror əməliyyatı aparsın. Ordakı terror yuvaları bombalanacaq. Bu hadisənin bədəlini Türkiyə PKK-ya ödədəcək. Yanğınlar başqa Avropa ölkələrini də əhatə edir. Yunanıstan və İtaliyada da yanğınlar törədilib. İtaliyanlar bunu mafiyanın üzərinə atır. İstənilən halda, burada ABŞ-ın barmağı görünür. Çünki italiyan mafiyası İkinci Dünya müharibəsində ABŞ kəşfiyyatının nəzarətində olub. ABŞ bölgəyə təsirini mafiya, PKK vasitəsilə həyata keçirə bilər. Bu versiyanı daha inandırıcı sayıram. Türkiyəyə gələn turistlər arasında ruslar daha çox üstünlük təşkil edir. Rus gənclərinin ən çox istirahət etdiyi turistik məkan Alanyadır. Bu ərazi hər iki tərəfdən yanğınla əhatə olunub. Rus mətbuatı məlumat yayıb ki, bu, Rusiya-Türkiyə əməkdaşlığına qarşı törədilmiş təxribat ola bilər. Türkiyəyə turist səfərinə hazırlaşan insanlar üçün də narahatlıq yarada bilər. Bu səbəbdən, Türkiyənin turizm sektoruna nə qədər ziyan dəyməsi barədə dəqiq proqnoz qoymaq, hələ ki, mümkün deyil. İstənilən halda, böyük ziyan dəyib. Rusiya ilə Türkiyənin əlaqələrinin zəifləməsinə yönələn addım ABŞ-ın marağında olan məsələdir”.
Məhəmmədəli QƏRİBLİ
