Soros İrəvanda Rusiyanın varlığını sarsıtmaq planını rəsmən işə saldı - ATƏT və BMT-yə iki müraciət…

Rəşad Bayramov: “Ermənistan hakimiyyəti bu addımı ilə bölgəyə üçüncü qüvvəni cəlb etməyə səy göstərir”

img

Ermənistandakı Soros Fondu və onun tərəfindən maliyyələşən QHT-lər Ermənistan hakimiyyətini təcili surətdə BMT Təhlükəsizlik Şurasına müraciət etməyə çağıran birgə bəyanat yayıb:

“Azərbaycan tərəfindən Ermənistanın ərazi bütövlüyünün pozulması və mütəmadi hərbi təxribatları nəzərə alaraq Ermənistan hakimiyyətini təcili surətdə BMT Təhlükəsizlik Şurasına müraciət etməyə çağırırıq”.

Corc Sorosun başçılıq etdiyi Fond başda olmaqla Ermənistan QHT-ləri eyni zamanda rəsmi İrəvanı ATƏT-ə müraciət edərək “vəziyyətin obyektiv monitorinqi üçün missiya göndərməyi” tələb etməyə çağırıblar: “Azərbaycan artıq neçə aydır beynəlxalq hüquq normalarını pozaraq Ermənistan ərazisinə soxulub. Belə bir tədbir sərhədyanı kəndlərin təhlükəsizliyinin təminatına kömək edəcək və hökumətin təhlükəsizliyi təmin etməsinə dəstək verəcək”.

Qeyd edək ki, Azərbaycan əleyhinə ədalətsiz bəyanatı imzalayanlar arasında Ermənistan Açıq Cəmiyyət İnstitutundan (Soros Fondu) əlavə, “Transparency İnternational” Anti-Korrupsiya Mərkəzi və “Asparez” Jurnalistlər Klubu, “Sülh dialoqu” ictimai təşkilatı kimi tanınmış Ermənistan QHT-ləri var.

Sorosun bu planı Rusiyanın bölgədəki nüfuzunu zəiflətmək və regiona başqa dövlətlərin müdaxiləsinə şərait yaratmağa uyğundurmu?

Politoloq Rəşad Bayramov “Bakı-Xəbər”ə bildirdi ki, Ermənistan 44 günlük müharibədə aldıqları zərbənin təsirini azaltmaq, erməni ictimaiyyətinin başını qatmaq üçün Azərbaycanla sərhəddə atəşkəsi pozur: “Ermənistan ordusunun mövcudluğu görüntüsünü yaratmağa cəhd göstərir. Nəzərə almaq lazımdır ki, iyul ayı ərzində sistematik şəkildə Ermənistan Azərbaycan Silahlı Qüvvələrinin Naxçıvan, Laçın, Kəlbəcər, Tovuz, Gədəbəy istiqamətlərində mövqelərini intensiv şəkildə atəşə tutmaqla təxribatlar həyata keçirib. Əslində, Ermənistan hakimiyyəti bu addımı ilə bölgəyə üçüncü qüvvəni cəlb etməyə səy göstərir. Onsuz da ötən illər ərzində Ermənistan ərazisini Rusiya qoruyub. Görünür, Rusiyanın Ermənistana yardımı azlıq etdiyindən, yaxud Moskvanı ölkədən sıxışdırıb çıxarmaq məqsədilə rəsmi İrəvan ölkəyə başqa qüvvələri yeritməyə çalışır.

Qeyd edək ki, Ermənistan hakimiyyəti və siyasiləri 44 günlük müharibə zamanı üçüncü qüvvəni, ilk növbədə Kollektiv Təhlükəsizlik Müqaviləsi Təşkilatını döyüşlərə cəlb etməyə çalışmışdı. Ancaq bütün bu cəhdlər uğursuzluğa düçar oldu.  Rəsmi İrəvan 10 noyabr bəyanatının üzərinə götürdüyü öhdəliklərinə əməl etməmək üçün də müxtəlif təxribatlar yaradır. Beləliklə, rəsmi İrəvan sərhəddə təxribat törətməklə beynəlxalq ictimaiyyəti yenə aldatmağa çalışır. Ermənistanda hazırda hakimiyyətdə olanlar Sorosun “uşaqlarıdır”. İmza atan QHT-lər hakimiyyətə yaxınlığı ilə seçilir. Bununla Paşinyan Rusiyanın təsirini neytrallaşdırmağı düşünür. Ancaq heç bir səmərəsi olmayacaq təklifdir. Çünki  Azərbaycanın özü də sərhədlərin BMT-nin tanıdığı ərazi bütövlüyü çərçivəsində təmin olunmasını istəyir”.

Məhəmmədəli QƏRİBLİ

Son xəbərlər