Ermənistan-Azərbaycan sərhədində gərginliyin artdığı bir vaxtda düşmən ordusu ilə bağlı son durum yenə xüsusi maraq doğurur. Erməni mediasının yazdıqlarından belə bəlli olur ki, İkinci Qarabağ müharibəsində darmadağın edilən bu ordudan geri qalan hissədə yenə xaos və anarxiya hökm sürür. Məsələ ilə bağlı “razminfo” saytı yazır ki, 10 noyabr 2020 -ci il tarixində Ermənistan, Rusiya və Azərbaycan liderlərinin üçtərəfli bəyanatının qüvvəyə minməsindən sonra ən azı 66 erməni həyatını itirib.
Bunlardan 24-ü Azərbaycanla toqquşmalar, mina partlayışları zamanı qeydə alınan döyüş itkiləri olub. 42-si isə intihar, xəstəlik, avtomobil qəzaları, qətllər və silahlarla davranma qaydalarının pozulması daxil olmaqla qeyri-döyüş itkiləridir. Bununla yanaşı,3 hərbçi itkin düşüb. Onlardan biri olan çağırışçı Norik Mkrtçyan mayın 18 -də Vardenis hərbi hissəsini özbaşına tərk edib. Onun haqqında hələlik heç bir məlumat yoxdur. İyulun 14 -də Zəngəzur bölgəsinin Qara göl hissəsində hərbçilər A. Nalbandyan və A. Torozyan itkin düşüb.
Belə bir vaxtda daha bir məlumat yayılıb ki, Ermənistan ordusunda hökm sürən xaos, nizamnamədən kənar münasibətlər, özbaşınalıq, ruh düşkünlüyü səbəbindən son bir neçə gün ərzində hərbi qulluqçular arasında yeni özünəqəsd faktı qeydə alınıb. Yayılan məlumatlarda hərbi hissələrin birində postda xidmət edən hərbi qulluqçu Karen Ağacanyanın ona təhkim olunmuş silahdan atəş açaraq özünəqəsd etdiyi bildirilir. Ağır vəziyyətdə hərbi hospitala çatdırılan K.Ağacanyanın özünəqəsd etməsinin səbəbləri araşdırılır. Bundan başqa, son vaxtlar Ermənistan ordusunda adi hal alan faktlardan biri də rüşvətxorluqdur. Bu günlərdə hərbi hissələrin birində ortaya çıxan rüşvətxorluq faktı böyük narazılığa səbəb olub. Belə ki, Ararat vilayətinin Armaş qəsəbəsində yerləşən hərbi hissədə qulluq edən hərbçilər Edqar Zavtilyan, Artur Volodyan, Qriqori Qriqoryandan ordu sıralarından tərxis olunmaları üçün böyük miqdarda rüşvət tələb edildiyi bildirilib. Hərbi qulluqçular hələlik hüquq-mühafizə orqanlarına müraciət etməsələr də, yaxın vaxtlarda ehtiyata buraxılmasalar, rüşvət tələb edən şəxs barədə hərbi prokurorluğa ərizə yazacaqları haqda komandanlığı xəbərdar ediblər. Bundan əvvəl də Ermənistan ordusunun hərbi hissələrindən birində xidmət edən iki hərbi qulluqçunun rüşvət müqabilində məzuniyyətə getməsi faktının ortaya çıxması hərbçilərin valideynləri arasında böyük narazılıqlara səbəb olub. Biabırçı rüşvət faktı əsgərlərin məzuniyyətdən gec qayıtmalarının üstünün açılması zamanı müəyyən edilib. Belə ki, əsgər Nver Danielyan və İsxan Sarkisyan rüşvət verərək məzuniyyətə gediblər. Hərbi hissəyə qayıdarkən hərbi polis tərəfindən sənədlərin yoxlanılması zaman onların məzuniyyətdən bir neçə gün gec qayıtdıqları məlum olub. Hərbçilərin hərbi xidmətdən yayınmaları ilə bağlı məsələ qaldırılarkən, onların rüşvət müqabilində məzuniyyətə getdikləri aşkarlanıb.
Onu da qeyd edək ki, 44 günlük müharibədən sonra Ermənistan ordusundan təcili surətdə tərxis edilərək ölkədən çıxıb getmək istəyənlərin sayı gündən-günə artır. Bu, həm Azərbaycan ordusunun parlaq qələbəsi nəticəsində Ermənistan silahlı qüvvələrində yaranan xaos, hərc-mərclik, özbaşınalıq, ruh düşkünlüyü, həm də son vaxtlar Ermənistan tərəfinin sərhəd rayonlarında vəziyyəti gərginləşdirmək məqsədilə törətdiyi təxribatlarla əlaqədardır. Digər məlumata görə, hərbi həkimlərin səhlənkarlığı səbəbindən Ermənistan silahlı qüvvələrinin hərbi hissələrində COVID-19 virusuna yoluxma halları xeyli artıb. Koronavirusa yoluxan kiçik çavuş Q.Nersisyanın hərbi hissənin həkimi tərəfindən tibbi müayinədən keçdikdən sonra vəziyyətinin normal olduğu bəhanə edilərək xəstəxanaya göndərilmədiyi və bu barədə yuxarı komandanlığa məlumat verilmədiyi bildirilib. Bu səbəbdən də bir neçə gün ərzində bölüyün bütün şəxsi heyətinin COVID-19 virusuna yoluxduğu məlum olub. Hərbi qulluqçular yüksək hərarət və halsızlıqdan əziyyət çəkirlər. Hərbi hissə komandanlığı şəxsi heyətin yoluxma faktını hər vəchlə ört-basdır etməyə çalışır.
Ölkədə yaşanan demoqrafik problem səbəbindən ordunun şəxsi heyətlə təminatı isə indi daha sürətlə pisləşməkdə davam edir. Sərhədə göndərməyə artıq lazımi sayda resurs yoxdur. Artıq Ermənistan rəhbərliyi də yaxşı bilir ki, həqiqi hərbi xidmətlə bağlı tələb onlardakı silahlı qüvvələrin komplektləşməsini təmin etmir. Bu səbəbdən də Ermənistanda hələ ötən ildən “xalq ordusu” adlı bir formatın reallaşdırılmasına dair niyyət ortaya atılıb. Artıq ermənilər qanunvericilik bazasını buna uyğunlaşdırıblar. Digər tərəfdən, məqsəd dünyada yaşayan ermənilərin də hərbi xidmətə cəlb edilməsidir. Bunun başlıca səbəbi isə çağırışçıların Ermənistan ordusunda xidmət etmək istəməməsilə bağlıdır. Amma 44 günlük müharibənin nəticələri “xalq ordusu” ideyasının da iflasa uğramasına səbəb olub. Digər tərəfdən, orduda yaranan xaos səbəbindən gənclərin silahlı qüvvələrdə xidmətdən yayınması adi xarakter daşıyır. Belə vəziyyətdə ordudan yayınanların sayının artması bu xüsusda qaldırılan cinayət işlərinin də sayını çoxaldır.
Tahir TAĞIYEV
