Elşən Mustafayev: “Kaspirşikin fəaliyyəti Riçard Hoqlandın dediyi “restoran diplomatiyası”ndan o tərəfə keçə bilməyib”
ATƏT-in Minsk Qrupu Azərbaycan - Ermənistan sərhədindəki gərginliklə bağlı bəyanat yayıb. Bəyanat ATƏT-in rəsmi saytında yer alıb. Bəyanatda bildirilir ki, həmsədrlər (Fransa -Stefani Viskonti, ABŞ-Endryu Şofer, Rusiya-İqor Kovayev) Ermənistan-Azərbaycan sərhədində baş verən son hadisələri, o cümlədən itkilər və insan tələfatı ilə bağlı məlumatları narahatlıqla izləyir. Həmsədrlər Ermənistanı və Azərbaycanı vəziyyətin dərhal deeskalasiyasına, təxribatçı ritorikadan və hərəkətlərdən çəkinməyə və 9 Noyabr bəyanatı, eləcə də digər razılaşdırılmış atəşkəs sazişləri çərçivəsində götürdükləri öhdəlikləri tam şəkildə yerinə yetirməyə çağırır.
Bəyanatda həmsədrlər ATƏT-in fəaliyyətdə olan sədrinin şəxsi nümayəndəsinin və onun komandasının davamlı səylərini dəstəklədiklərini bir daha təsdiqləyirlər.
Göründüyü kimi, Minsk qrupu yenə də ənənəvi mövqeyinə sadiq qalaraq, mənasız bir bəyanat verib. ATƏT-in fəaliyyətdə olan sədrinin şəxsi nümayəndəsinin və onun komandasının davamlı səyləri deyəndə, nə nəzərdə tutulur?
Politoloq Elşən Mustafayev “Bakı-Xəbər”ə açıqlamasında bildirdi ki, Minsk qrupu öz aktuallığını itirib və onlarlıq bir iş qalmayıb:
"Çünki onlar 30 il mənasız danışıqlar aparıblar, heç bir nəticə olmayıb. Dağlıq Qarabağ termini də artıq yoxdur, Qarabağ, Şərqi Zəngəzur termini var. İndi Rusiya vasitəçilik edir və onun vasitəçiliyi ilə müəyyən məsələlər həll oluna bilər, üçtərəfli komissiya da var. Ancaq bu məsələyə yenə Fransa və ABŞ-ı qatmağın heç bir mənası yoxdur. Minsk qrupunda ABŞ-ı təmsil etmiş Riçard Hoqland öz fəaliyyətlərinə ətraflı izah verib. Onun sözlərinə görə, münaqişədən əvvəl həmsədrlərin işi hər 6 həftədən bir regionu gəzib yüksək səviyyədə görüşlər keçirmək və beş ulduzlu otellərdə qalmaq, ən yaxşı restoranlara getməkdən o yana keçə bilməyib. Hazırda Minsk qrupunun canlanmasında maraqlı olan tərəf Ermənistandır. ATƏT-in Minsk qrupunun vasitəçiliyini Ermənistana cazibədar göstərən onun hazırladığı, amma icra edə bilmədiyi Madrid prinsipləridir. Bu layihədə ərazi bütövlüyü ilə yanaşı xalqların öz müqəddaratını həll etmək müddəası da öz əksini tapıb. Azərbaycan üçün, Prezident Əliyevin dediyinə görə, Qarabağın statusu məsələsi mövcud deyil, Ermənistanın siyasi rəhbərliyi isə Dağlıq Qarabağın statusu məsələsində israr edəcəyini deyir. Baş nazir səlahiyyətlərini həyata keçirən Nikol Paşinyan bir müddət öncə Qarabağ seperatçılarının lideri Arayik Arutyunyanla görüşündə deyib ki, onların qarşısında duran ən vacib məsələ Dağlıq Qarabağın statusunun müəyyənləşməsidir və bu, ATƏT-in Minsk qrupunun gündəliyindədir.
Amma ötən payız baş vermiş və 44 gün davam etmiş müharibə müddətində və ondan sonra da Azərbaycan rəhbərliyi Minsk qrupunun fəaliyyətini tənqid edib. Prezident İlham Əliyev ötən ilin dekabrında ölkəyə gəlmiş ATƏT-in Minsk qrupunun həmsədrlərini və ATƏT-in fəaliyyətdə olan sədrinin şəxsi nümayəndəsi Anji Kaspşiki qəbul edərkən onlara demişdi ki, Minsk qrupu münaqişənin həllində heç bir rol oynamayıb və Ermənistanı Azərbaycan ərazilərindən çıxmağa vadar edə bilməyib.Azərbaycan Xarici İşlər Nazirliyinin son bəyanatlarından birində isə vurğulanıb ki, ATƏT-in Minks qrupu üçtərəfli bəyanatların icrasını dəstəkləməklə bölgədə sülh və inkişafın təmin olunmasına töhfə verə bilər. Ancaq biz görürük ki, Minsk qrupu tam başqa işlərlə məşğul olmaq istəyir. Minsk qrupunun özü nə iş görüb ki, şəxsi nümayəndənin hansısa səylərindən danışır. Kaspirşikin fəaliyyəti Riçard Hoqlandın dediyi restoran diplomatiyasından o tərəfə keçə bilməyib”.
Məhəmmədəli QƏRİBLİ
