Konqres Azərbaycana qarşı ermənipərəst Pallone layihəsini 227 səslə qəbul etdi...

Abutalıb Səmədov: “Minsk qrupunu fəallaşdırmaqla bağlı ABŞ-ın göstərdiyi dəstəkdən hiss edilir ki, Vaşnqton ermənilərə daha yaxın mövqe sərgiləyir”

img

ABŞ Konqresinin Nümayəndələr Palatası Azərbaycana hərbi yardımın dayandırılmasını nəzədə tutan Pallone (təklifi Konqresmen Frenk pallone irəli sürüb) düzəlişini qəbul edib. Bu qərar erməni diasporu tərəfindən fəal şəkildə dəstəklənib.

Amerikalı vəkil və siyasətçi, Demokrat Partiyanın üzvü Frenk Pallone konfrans salonunda Azərbaycana maliyyə yardımının dayandırılması təklifini təqdim edib. Nümayəndələr Palatası isə Azərbaycana hərbi yardımı dayandıran Pallone düzəlişini təsdiqləyib. Ermənipərəst Konqresmen hətta qondarma “Artsax” sözünü işlətməkdən də çəkinməyib. Qeyd edək ki, erməni politoloq Suren Sarkisyan Facebook səhifəsində Bakının Vaşinqtondan son üç ildə təxminən 100 milyon dollar məbləğində hərbi yardım aldığını söyləyib. Lakin ABŞ-da heç də hər kəs pallonenin fikirləri ilə razı deyil, o cümlədən, erməni diasporasının maliyyəsindən istifadə edən bir sıra kütləvi informasiya vasitələri də budəfəki erməni “məzlumluğunu” qəbul etmirlər. Məsələn, məlum olub ki, Amerikanın nüfuzlu media qurumları ermənilərin guya Azərbaycanda terrorçuların onlara qarşı vuruşması barədə iddialarını qəbul etməyərək, onları hətta pul müqabilində dərc etməkdən imtina edirlər. Bu fakt isə bir daha sübut edir ki, artıq ermənilərin yalan maşınları işləmir. O cümlədən, əgər Pallone kimi konqresmenlər son cəhdlərini göstərsələr də belə.

Xatırladaq ki, Frank Pallone bu ilin mayında – Azərbaycanla Türkiyə Silahlı Qüvvələrinin birgə hərbi təlimlərinin keçirildiyi vaxtda Amerikanın erməni milli komitəsi ilə birgəABŞ-ın dövlət katibi Mayk Pompeoya və müdafiə naziri Mark Esperaya, eləcə də ATƏT-in Minsk qrupuna iki məktub göndərib. Ermənipərəst konqresmen və erməni lobbisi həmin məktublarında hərbi təlimlərin guya Cənubi Qafqazdakı təhlükəsizliyin destabilizə olunacağını iddia edərək həm ABŞ administrasiyasının, həm də ATƏT-in Minsk qrupunun keçirilən hərbi təlimləri qınamağa çağırmışdı.

Bu qərarın Azərbaycan-ABŞ münasibətlərinə nə kimi təsiri olacaq?

Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, may ayında ABŞ prezidenti 907-ci düzəlişin daha bir il  dondurulması ilə bağlı qərar vermişdi: “Bunun nəticəsində Azərbaycana hərbi yardım nəzərdə tutulurdu. Erməni lobbisi bunun çox  ciddi narazılıqla qarşıladı. Onlar yalnız narazılıq etmirdi, kifayət qədər iş də apardılar. İyun ayında  dövlət katibliyinə namizəd Blinken vəd vermişdi ki, bu məsələyə yenidən baxılacaq. Demişdi ki, ola bilsin Azərbaycana hərbi yardım kəsiləcək. Pallonenin bu təklifinin qəbul olunması çox cuzi  səs çoxluğu ilə qəbul edilib.  Bu ABŞ-ın Azərbaycana olan münasibətinin bir daha göstəricisidir. Hətta Pallone təklif edib ki, 2 milyon da Qarabağdakı ermənilərə minaların təmizlənməsi adı ilə  yardım edilsin. Azərbaycanın işğaldan azad edilən bütün əraziləri minalanıb, ancaq bizə yardım təklif edən yoxdur. Nəyə ümid etmək  olar? Bilirsiniz ki, senatdakı qüvvələr nisbəti demək olar  bərabərdi. Biz bir qədər də ciddi iş aparsaq, ola bilər ki, Senatdan keçməsin. Bütün bunlara baxmayaraq,  ABŞ-ın Azərbaycana olan ədalətsiz mövqeyi göz qabağındadır. Minsk qrupunu fəallaşdırmaqla bağlı ABŞ-ın göstərdiyi dəstəkdən hiss edilir ki, Vaşnqton ermənilərə daha yaxın mövqe sərgiləyir. Pallonenin gətirdiyi  arqument də gülməlidir. Deyir ki, Azərbaycan rejimi Ermənistandakı gənc demokratiyanı hədələyir. Hesab edirəm ki, bu cür hallar Azərbaycanla ABŞ arasındakı münasibətlərə mənfi təsirini göstərəcək. Bizim ölkəlrin əməkdaşlıq etdiyi sahələrdə soyuqluğun yaranmasına səbəb olacaq. Hər halda,  ABŞ onunla səmimi əməkdaşlıq edən bir ölkəyə qarşı belə qərəzli davranmamalıdır”.

Məhəmmədəli QƏRİBLİ

Son xəbərlər