Ramil Məmmədli: “Kreml görür ki, Ermənistan vəziyyəti gərginləşdirməklə Fransa və ABŞ hərbi qüvvələrinin regiona yerləşməsini istəyir”
Rusiya Müdafiə Nazirliyi Ermənistanı hərbi qarşıdurmanı dayandırmağa və sərhədlərin delimitasiyası ilə bağlı danışıqlara başlamağa çağırıb.
Çox maraqlıdır ki, sözügedən çağrışda Ermənistana yönəlik xəbərdarlıq xarakterli cümlə yer alıb. Bununla bağlı deyilir: “Ermənistan yeni reallıqları qəbul etməlidir, əks halda Azərbaycan ərazi bütövlüyünü qorumaq üçün qəti tədbirlər görəcək”.
Məlumat üçün qeyd edək ki, iyulun 28-də gecə baş vermiş döyüşlərdə Ermənistan ordusu 3 hərbçisini itirdiyini açıqlayıb, 4 hərbçi yaralanıb. Azərbaycan tərəfi 2 hərbçisinin yaralandığını bildirir. Həmin istiqamətdə tərəflərin mövqeləri bir-birinə çox yaxındır və Ermənistan ordusu günlərdir ki, Kəlbəcər tərəfdə təxribatlara əl atır.
Görünən odur ki, ötən il 44 günlük müharibədə dəhşətli hərbi məğlubiyyət də Ermənistan hakimiyyətinə dərs olmadı. Son günlərdə baş verən hadisələrin də göstərdiyi kimi, Ermənistan höküməti reallıq hissini tamamilə itirib. Moskva formatında danışıqlara xələl gətirən Paşinyan yenə də keçmişdə Ermənistanı ağır məğlubiyyətə sürükləyən strategiya seçib.
Maraqlıdır, Rusiya Müdafiə Nazirliyindən Ermənistana yönəlik məlum xəbərdarlıq nə deməkdir?
- “O üzdən, bu cür xəbərdarlıq mesajı verilir ki, həddini bil”
Məsələyə münasibət bildirən hərbi ekspert Ramil Məmmədlinin sözlərinə görə, Rusiya MN-in Ermənistana bu cür xəbərdarlıq ünvanlaması gözlənilməz oldu: “Bəlli olduğu kimi, Rusiya zaman-zaman tərəflər arasında balans mövqeyindən çıxış edibv. Rus sülhməramlıları bir sıra hallarda erməni silahlı birləşmələrin bəzi destruktiv fəaliyyətini görməzdən gəlib. Artıq neçə vaxtdır ki, Ermənistan Azərbaycanla sərhəd ərazilərdə təxribat fəaliyyəti ilə məşğuldur. Seçkilərdən sonra Nikol Paşinyan kompromislərə getmək əvəzinə, əksinə pozucu açıqlamalarla çıxış edir və qeyri-real şərtlər irəli sürür. Bu isə, 10 noyabr və 11 yanvar razılaşmasından irəli gələn şərtlərin pozulması deməkdir. Məlum olduğu kimi, Ermənistanın Kəlbəcər istiqamətində təxribat fəaliyyəti uğrsuzluqla nəticələndi. Belə ki, 3 düşmən əsgəri məhv edilib, bir neçə postu dağıdıldı. Ermənistanın təxribatları həm də Rusiyanın vasitəçilik missiyasına qarşı yönəlib. Kreml görür ki, Ermənistan vəziyyəti gərginləşdirməklə Fransa və ABŞ hərbi qüvvələrinin regiona yerləşməsini istəyir. Bu isə Rusiyanın maraqlarının açıq təhdid edilməsi deməkdir. Nəzərə almaq lazımdır ki, Ermənistan KTMT-də təmsil olunur. O üzdən, Ermənistana bu cür xəbərdarlıq mesajı verilir ki, həddini bil”.
Hərbi ekspert onu da qeyd etdi ki, Ermənistan ciddi nəticə çıxarmasa bu ölkə üçün daha da pis olacaq.
Vidadi ORDAHALLI
.jpg)
