Kəlbəcərdə erməni təcavüzü Rusiya Təhlükəsizlik Şurasının müzakirəsində - Rusiya niyə narahatdır?...

img

Rusiya Təhlükəsizlik Şurasının növbəti iclası keçirilib. Bunu Rusiya Prezidenti Vladimir Putinin mətbuat katibi Dmitri Peskov bildirib. Onun sözlərinə görə, V.Putinin sədrliyi ilə keçirilən toplantıda Rusiyanın sosial-iqtisadi inkişafı ilə bağlı məsələlər müzakirə olunub.Şuranın iclasında eyni zamanda, Azərbaycan və Ermənistan sərhədində baş verən son hadisələr, Əfqanıstandakı durum və beynəlxalq gündəmin digər aktual məsələləri müzakirə edilib.

Xatırladaq ki, Kəlbəcər istiqamətində erməni tərəfinin atəşkəsi kobud pozması nəticəsində Ordumuzun 2 hərbi qulluqçusu yaralanmışdı. Maraqlıdır, Rusiya niyə Kəlbəcər ətrafında baş verən prosesləri öz Təhlükəsizlik Şurasında müzakirə edir və rəsmi Moskvanın bu yöndəki narahatlığı nədən ibarət ola bilər?

  • Elşad Musayev: “Yaxın zamanlarda gərginlik olan sahələrdə Rusiya hərbçilərini görsək, təəccüblənmərik”

Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, Rusiya TŞ-də keçirilən müzakirələr  sırasına bizim sərhədimizdə baş verən hadisənin niyə müzakirə olunduğu  bizim üçün maraq kəsb etməyə bilməz:  “Rusiya bu bölgədə qarant ölkə kimi çıxış edir. Ona görə də, sərhəddə baş verən hadisələr onun da diqqətindədir. Ermənistan Rusiya ilə müttəfiq olsa da, onun başının üstündə iş çevirmək istəyir. İrəvan bölgəyə yeni oyunçular cəlb etməyə çalışır. Xüsusilə də Fransa və ABŞ-ı həmsədr adı ilə bura səsləyir. Ermənistan  rəsmən də  bəyan edir ki, həmin ölkələri prosesdə görmək istəyir. Təbiidir ki, Ermənistanın bu istəyi Rusiyanın marağında deyil. Buna görə də, Təhlükəsizlik Şurasında bu məsələyə öz prioriteti kimi yer verib. Hesab edirəm ki, Rusiya sərhəddə baş verən gərginliyə öz “töhfəsini” vermək istəyir. Yaxın zamanlarda gərginlik olan sahələrdə Rusiya hərbçilərini görsək, təəccüblənmərik”.

Partiya sədrinin sözlərinə görə, Paşinyanın ABŞ və  Fransa ilə daha sıx yaxınlaşması Kremldə qıcıq yaradır, bunu aydın sezmək olar:

“Görünən odur ki, Azərbaycanın hərbi üstünlüyünü artırmaq üçün şans var – amma biz daha ağıllı oynamalıylq, eyforiyaya qapılmamalı, populistik addımlardan çəkinməli, Kremlin heç bir oynuna gəlməməliyik. Bizə indi sülh lazımdır, dayanıqlı sülh, sərhədlərin tanınması, əlaqələrin açılması prioritet olmalıdır. Biz Zəngəzura, Göyçəyə, İrəvana tank-topla qayıtmaq kimi populist yanaşmanı kənara qoyub, o qədim torpaqlara güclü iqtisadiyyatla, artan demoqrafik üstünlüklə, hüquqi dövlət qurmaqla dönməliyik. Bunun yolu uzundur, amma dayanıqlı və ağıllı yoldur”.

  • Əziz Əlibəyli: “Hesab edirəm ki, bu proses Ermənistanın cəzalandırılması ilə başa çatacaq”

Siyasi şərhçi Əziz Əlibəyli isə hesab edir ki, hazırda sərhəddə baş verənlər əslində Ermənistanın cəzalandırılmasıdır:

“Rusiya maraqlıdır ki, kommunikasiyalar açılsın, Ermənistan verdiyi vədlərə əməl etsin. Fransanın hadisələrə ciddi müdaxiləsi, Fransa səfirinin Ermənistan ordusuna komandanlıq etməsinin, ABŞ səfirinin sərhədə gəlib baxış keçirməsinin şahidi olduq. Paşinyanı verdiyi sözlərdən daşındırmaq, Qərbə dartmaq, Minsk qrupunu diriltmək cəhdləri Rusiyanın xoşuna gəlmir.

Müharibə olacaqmı? İndi əhali arasında bu sualı hər kəs verir. Müharibənin olması üçün düşmən tərəfinin ordusu olmalıdır, ordusunun 30 faizini Qarabağda itirdi, yenidən toparlanıb savaşa girməsi üçün zaman lazımdır və bu zamanda biz də sakit oturmayacağıq. Belə bir müharibənin necə nəticələnəcəyini hamı bilir. Böyük miqyaslı müharibə anlayışı olmayacaq. Antiterror əməliyyatlarının aparıla biləcəyini dəfələrlə bəyan etmişik. Hazırki proses Rusiyanı da incidir və hesab edirəm ki, bu proses Ermənistanın cəzalandırılması ilə başa çatacaq. Necə ki, seçkilərdə qalib gəldikdən sonra Paşinyan həm müxalifətə, həm Rusiyaya diş atırdı, Putin də bu baş verənləri yaxşı izləyir və onun burnundan gətirməsi üçün tədbir görəcək. Bizim fəaliyyət istiqamətimiz sərhəd xətlərinin dəqiqləşdirilməsidir. Bunun dinc yolla olmasını istəyirdik. Lakin Ermənistan tərəfi dinc durmursa, bu bizə də sərf edir. Hərbi əməliyyatlarla özümüzə aid olan ərazilərdə məskunlaşmaq yaxşı bir variantdır. Rusiya Ermənistanın cəzalanmasını istəyir və buna görə KTMT məsələyə qarışmır”.

Məhəmmədəli QƏRİBLİ

Son xəbərlər