İndidə Ernənistana gedən Rusiya turistləri kütləvi şəkildə təzyiqə məruz qalır. Rusiya mətbuatında bununla bağlı bir sıra məqalar yer alıb.
Belə ki, 31 yaşlı Anna adlı rusiyalı turist Ermənistana istirahətə yollansa da, oradan xoş xatirələrlə deyil, məyusluq içərisində geri dönüb: “Ermənistandakı rusiyalı turistlər mənfi münasibətlə qarşılaşırlar. Bizim Rusiyadan gəldiyimizi bilən kimi insanların əhval-ruhiyyəsi və baxışları kəskin şəkildə dəyişir. İki həftə dincəlməyə gəldik. Ölkəni görmək, yerli mətbəxi dadmaq istədik, amma hər addımımızda bir mənfiliklə qarşılaşdıq. Bütün bunların hamısı rus olduğumuza görə başımıza gəldi”.
Anna deyir ki, ünvanına tez-tez siyasi mövzularda qınaqlar eşidib: “Mənimlə müharibədən, siyasətdən niyə danışırlar anlamıram. İki uşağımla tətilə gəldim. Əvəzində Ermənistanda garson və dondurma satıcısı Rusiyanın müharibədə onlara kömək etmədiyindən danışdı. Mən axı bütün bunlara niyə qulaq asmalıyam”.
Rusiyadan Ermənistana istirahətə gələn digər turistlər də burada özlərinə qarşı qəbuledilməz münasibət sərgiləndiyini bildiriblər. Sankt-Peterburqdan olan Kseniya və Aleksandr cütlüyü yerli sakinlər tərəfindən anlaşılmaz ittihamlarla qarşılaşdıqlarını deyirlər: “Bu yayı Gürcüstan və Ermənistanda keçirməyi qərar verdik. Dostumuz Levon bizə Ermənistan haqqında çox şey danışdı və ora getməyimizi məsləhət gördü. Gürcüstanda ləzzətlə vaxt keçirsək də, Ermənistanda üç gündən çox qalmadıq. Təəssüf ki, Rusiyadan gəldiyimizi bilən hər kəs bizim haqqımızda xoşagəlməz fikirlər səsləndirdilər. Bizə qarşı insanların əhval-ruhiyyəsi və baxışları dəyişdi. Hər kəsdən yalnız bir şey eşitdik: “Ruslar bizə xəyanət etdi”, “Rusiya bizi atdı”, “müharibədə məğlub olmağımızda siz günahkarsınız”, “Putin bizi satdı””.
Ermənilərin Rusiyanın siyasi hakimiyyətini hədəf almaları azmış kimi, indi də rus turistlərini psixoloji olaraq linc edirlər. Bu isə bir daha onların necə məkirli bir millət olduğunu ortaya qoyur.
“Bir tərəfdən Kremlin İrəvana etibarı daha da azalacaq, digər tərəfdən...”
Məsələyə münasibət bildirən “Səs” media qrupunun rəhbəri, politoloq Bəhruz Quliyevin fikrincə, bütün bunlar ermənilərin necə bir nankor toplum olduğunu ortaya qoyur: “Zatən Paşinyan 2018-ci ildə hakimiyyətə gələndən sonra Rusiyaya münasibət mənfi mənada dəyişməyə başladı. Ermənistan Rusiyanın hesabına var olsa da mətbuatda, digər sahələrdə ruslara yönəlik materiallar yayıldı. Ermənistan-Rusiya münasibətləri təftiş edildi və s. Bütün bunlar erməni cəmiyyətinin ovqatına, ruslara münasibətin dəyişməsinə öz təsirini göstərməyə başladı. Yəni, bütün bunları təkcə 44 günlük müharibə dövründə Rusiyanın sərgilədiyi bitərəf mövqe ilə əlaqələndirmək doğru olmaz. Çünki Qərbin maraqlarından çıxış edən Paşinyan qızıl ortanı tapa bilmədi. Əksinə, hər vasitə ilə Rusiyanı qaraladı. Bütün bunlara baxmayaraq, Rusiya 44 günlük müharibə dövründə müəyyən vasitələrlə Ermənistana yardım etdi. Hətta mülki təyyarələrdə Ermənistana silah daşınmasına şərait yaradıld. Rusiya imkan vermədi ki, Qarabağı separatçılardan tam təmizləyək. Ancaq göründüyü kimi, ermənilər tarixən nankor toplum olduqlarından bütün bunları görməzdən gəlirlər. Onlar hesab edir ki, gərək Rusiya Azərbaycana bir qarış da olsa ərazisini işğaldan azad etməyə imkan verməyəydi. Ruslar ermənilərin yerinə Qarabağda döyüşsünlər və s. Ona görə də münasibət dəyişir. Əslində dövlət siyasəti səviyyəsində cəmiyyət Rusiyaya qarşı yönləndirilir. Bütün bunların nəticəsidir ki, Rusiya turistləri Ermənistanda psixoloji basqıya məruz qalırlar. Ancaq bu, perspektivdə Ermənistanın ziyanına işləyəcək. Bir tərəfdən Kremlin İrəvana etibarı daha da azalacaq. Digər tərəfdən, Ermənistana gedən rus turistlərin sayı daha da azalacaq və ölkə iqtisadiyyatı bundan itirəcək”.
Politoloq hesab edir ki, istənilən halda bu kampaniya Ermənistana yaxşı heç nə vəd etmir.
Vidadi ORDAHALLI
