Azərbaycan, Türkiyə və Pakistan parlamentlərinin üçtərəfli iclasının yekunu olaraq imzalan Bakı bəyannaməsinin məqsədi ilk növbədə üç qardaş ölkənin parlamentləri arasında münasibətləri inkişaf etdirməkdir.
Trend-in məlumatına görə, bu barədə Türkiyə Böyük Millət Məclisinin sədri Mustafa Şentop bu gün keçirdiyi mətbuat konfransında deyib. M.Şentop bildirib ki, bəyannamədə parlamentlər arası dialoqu, eləcə də ikitərəfli və çoxtərəfli əməkdaşlığı inkişaf etdirmək, ümumi maraq doğuran regional və qlobal məsələlər üzərində birgə işləmək nəzərdə tutulur: “Biz indiyə qədər də bu cür əməkdaşlıq edirdik. Sadəcə bu formatı yaratmaqla biz əməkdaşlığımızı müəyyən çərçivəyə saldıq”.
Zəngəzur dəhlizinin açılması ilə bağlı hər kəs öz sözünü tutmalıdır. Bu barədə Türkiyə Böyük Millət Məclisinin sədri Mustafa Şentop bu gün keçirdiyi mətbuat konfransında deyib.
M.Şentop bildirib ki, Zəngəzur dəhlizinin açılması həm Azərbaycan, həm Türkiyə üçün önəmlidir: “Zəngəzur dəhlizi vasitəsilə həm Azərbaycanın əsas hissəsi ilə Naxçıvan, həm Azərbaycanla Türkiyə arasında, həm də Türkiyə ilə Asiya ölkələri arasında quru yolu yaradılacaq. Məlumdur ki, bununla bağlı razılığa əldə olunub və hər kəs bu məsələdə öz sözünü tutmalı və dəhliz açılmalıdır”.
Türkiyə ilə Azərbaycan arasında iqtisadi əlaqələrin gücləndirilməsi üçün daim addımlar atılır və bu istiqamətdə yaxın zamanlarda yeniliklər gözlənilir. Bu barədə də Türkiyə Böyük Millət Məclisinin sədri Mustafa Şentop bu gün keçirdiyi mətbuat konfransında deyib.
M.Şentop bildirib ki, artıq Türkiyə vətəndaşları Azərbaycana, Azərbaycan vətəndaşları isə Türkiyəyə tək şəxsiyyət vəsiqəsi ilə gedib-gələ bilir:
“Bilirsiniz ki, Türkiyə ilə Azərbaycan arasında bu ilin mart ayında Preferensial Ticarət Sazişi təsdiq edilib. Hazırda Sərbəst Ticarət Sazişi üzərində iş aparılır və bu saziş təsdiq edildikdən sonra iqtisadi əlaqələrimiz daha da gücləndirəcək”.
Mustafa Şentop deyib ki, Ermənistanın Naxçıvana və Azərbaycanın digər sərhəd bölgələrinə hücumları regionda təhlükəsizliyə təhdiddir.
M.Şentop bildirib ki, bu hücumlar Ermənistanın bölgə müharibəsi çıxarmaq potensialı olduğunu göstərdi.
M.Şentop Türkiyə daim Azərbaycanın yanındadır: “Mən 44 günlük Vətən müharibəsi zamanı da Bakıya gəlmişdim, o zaman da Azərbaycanın yanında idik. Ermənistanın mülki insanlara qarşı cinayətlərinə diqqət çəkmək üçün Gəncəyə getdik, yaralıları da ziyarət etdik”.
M.Şentop deyib ki, Azərbaycan, Türkiyə və Pakistan parlamentlərinin üçtərəfli formatının növbəti görüşü 2022-ci ildə Pakistanda keçiriləcək. O qeyd edib ki, bu format üç qardaş ölkələr arasında münasibətləri daha da irəli aparacaq. O həmçinin Azərbaycan, Türkiyə və Pakistan dövlət başçıları arasında da üçlü formatın yaradıla biləcəyini diqqətə çatdırıb.
Hazırladı: Namiq QULİYEV
