Azərbaycan və Ermənistan arasında sərhədlərin delimitasiyası və demarkasiyası, iki ölkə arasında sülh müqaviləsinin imzalanması mühüm əhəmiyyət kəsb etsə də bu xüsusda Bakının təkliflərinə İrəvan hələ də müsbət cavab vermir. Elə bu da sərhəddə indi daha intensiv xarakter alan gərginliklərin yaranmasına gətirib çıxarır. Bu hal sərhədin Kəlbəcər istiqamətində indi özünü daha qabarıq büruzə verir.
Qeyd edək ki, Azərbaycan Müdafiə Nazirliyi iyulun 28-ə gecə saat 00:50 radələrindən başlayaraq Ermənistan silahlı qüvvələrinin bölmələrinin Basarkeçər rayonu ərazisindəki müxtəlif istiqamətlərdə yerləşən döyüş mövqelərindən Azərbaycan ordusunun Kəlbəcər rayonu ərazisindəki mövqelərini atıcı silahlar və qumbaraatanlardan növbəti dəfə intensiv atəşə tutduğunu açıqlayıb. Qarşı tərəfdən açılan atəş nəticəsində iki hərbi qulluqçumuz - Əliyev Sadiq Nizami oğlu və İmranlı İmran Dilqəm oğlu yaralanıb. Yaralılara ilkin tibbi yardım göstərilib, onların həyatları üçün təhlükə yoxdur. Azərbaycan Ordusunun bu istiqamətdə yerləşən bölmələri tərəfindən adekvat cavab tədbirləri görülür. Müdafiə Nazirliyi qeyd edir ki, bölmələrimiz tərəfindən qarşı tərəfin atəş nöqtələrinin neytrallaşdırılması istiqamətində zəruri addımlar atılıb: "Ermənistan ərazisində guya mülki obyektlərə zərərin yetirilməsi barədə xəbərlər yalandır və sırf dezinformasiya məqsədi daşıyır. Ermənistan hərbi-siyasi rəhbərliyi ənənələrinə sadiq olaraq Ermənistan ictimaiyyətini və beynəlxalq aləmi çaşdırmaq üçün yalan məlumatlar yaymaqda davam edir. Ermənistanın hərbi-siyasi rəhbərliyini iki ölkənin dövlət sərhədində hərbi avantüra məqsədi daşıyan təxribatlar və vəziyyəti qəsdən gərginləşdirmək əməllərindən çəkinməyə və sivil qaydada dövlət sərhədinin delimitasiyası üzrə danışıqlara başlamağa çağırırıq. Bir daha bildiririk ki, Ermənistan-Azərbaycan dövlət sərhədində vəziyyətin gərginləşdirilməsinə görə məsuliyyət tam olaraq Ermənistanın hərbi-siyasi rəhbərliyinin üzərinə düşür. Hazırda bu istiqamətdə əməliyyat şəraiti bölmələrimizin nəzarəti altındadır. Azərbaycan sərhədlərinin toxunulmazlığını təmin etmək üçün Ermənistanın bütün təxribatlarının qarşısı bundan sonra da qətiyyətlə alınacaqdır".
Müdafiə Nazirliyi onu da qeyd edib ki, Ermənistan-Azərbaycan dövlət sərhədində Bakı vaxtı ilə saat 10:00-dan etibarən atəşkəsin elan olunması ilə bağlı Rusiya tərəfinin təşəbbüsü tərəfimizdən qəbul edilib. Lakin buna baxmayaraq Ermənistan tərəfi əlavə olaraq tank və 120 millimetrlik minaatanlardan istifadə etməklə vəziyyəti gərginləşdirməkdə və mövqelərimizi atəşə tutmaqda davam edir. Ermənistan Müdafiə Nazirliyi isə bildirib ki, Ermənistan – Azərbaycan sərhədində baş verən silahlı atışma nəticəsində 3 erməni hərbi qulluqçu ölüb, 2-si yaralanıb. “Mirotvorets” teleqram kanalı isə əslində Ermənistan tərəfinin itkilərlə bağlı yaydığı məlumatın həqiqəti əks etdirmədiyini, ölü sayının 3 deyil, 4 olduğunu, yaralıların isə 3 nəfər olduğunu yazıb. Eyni zamanda ermənilərin bir hərbi postdan qovulduğunu da sosial şəbəkə istifadəçiləri qeyd edirlər. Teleqram kanalları isə digər iki əsgərin taleyinə aydınlıq gətirilmədiyini bildirir. Erməni mediası belə məlumat da yayıb ki, Azərbaycan, Rusiya və Ermənistan müdafiə nazirlərinin Moskvada görüşü olacaq. Lakin rəsmi Bakı bunu təkzib edib.Qeyd edək ki, 26 iyulda Rusiya müdafiə naziri Sergey Şoyqu Ermənistan müdafiə naziri əvəzi, müdafiə nazirinin birinci müavini Arşak Karapetyanla telefonla danışmışdı. Bundan sonra isə A.Karapetyan S.Şoyqu ilə görüş üçün Moskvaya getmişdi. Baş verənləri şərh edən ehtiyatda olan polkovnik Şair Ramaldanov bildirir ki, Azərbaycan tərəfi törədilmiş təxribatlara qarşı adekvat addımlar atır. Atəşkəsin pozulmasına görə bütün məsuliyyəti Ermənistan dövləti daşıyır. Hərbi ekspert qeyd edib ki, Azərbaycan ordusu atəş açan mövqeləri cavab atəşi ilə susdurur: "Bu cür hadisələr Azərbaycanın öz sərhədini bərpa etməyinə qarşı atılmış addımdır. Özlərinə xas olan formada sərhəddə gərginlik yaradırlar. Həm beynəlxalq qurumların, həm də Kollektiv Təhlükəsizlik Müqaviləsi Təşkilatının (KTMT) üzvlərinin diqqətini cəlb etmək istəyirlər. Vətən müharibəsindən əvvəl sərhəd yox idi, çünki işğal etmişdilər. İndi isə Azərbaycan ərazi bütövlüyünü bərpa edib və 1976-ci ildə tərtib edilmiş xəritə əsasında coğrafi sərhədlərini müəyyənləşdirir. Azərbaycanın bir hissəsi işğal altında olduğu üçün o ərazilərdə dövlət sərhədi qura bilməmişdik. İndi biz həmin o sərhədi qururuq. Ancaq Ermənistan hər zaman olduğu kimi bu prosesə mane olmaq istəyir. Ermənistan dövləti hakimiyyətdə kimin olmağından aslı olmayaraq, fərqli ölkələrin aləti olub. Hər zaman həmin təsir qüvvələrinin sifarişini yerinə yetiriblər. Bütün proseslər Azərbaycan Ordusunun nəzarəti altındadır və ordumuz bütün vəzifələrini yerinə yetirir. Dövlət sərhədimizi həm qoruyur, həm də yenidən qururlar”. Ş.Ramaldanov bildirib ki, ermənilər bu cür təxribatlar yaratmaqla öz başlarına bəla yaradırlar: "Azərbaycan bütün bu təxribatlara cavab verəcək gücdədir. Azərbaycanın tək fikri qonşu dövlətlər ilə sülh içində yaşamaqdır. Biz erməniləri öz torpaqlarımızdan qovsaq da, onlar öz çirkin niyyətlərindən əl çəkmir. Bundan sonra atəşkəsin pozulması halları istisna olunmur. Azərbaycan ordusunun bölmələri hər şeyi nəzarətdə saxlayır və adekvat cavab tədbirləri görür. Təəssüflər olsun ki, bu təxribatlar nəticəsində şəhidlərimiz də olur. Bundan sonra sərhəddə təhlükəsizlik məsələlərinə daha çox diqqət ediləcək. Ordumuz istənilən təxribatın cavabını verir və bundan sonra da bu cür çirkin halların qarşısını alacaq. Ermənistan tərəfi belə təxribatlar törətməyə davam edərsə, bundan sonra da itkilər verəcək”.
Ramil QULİYEV
