Bu günlərdə Ermənistanın hakim Vətəndaş Müqaviləsi Partiyasının mərkəzi ofisində baş nazir vəzifəsini icra edən Nikol Paşinyanın partiyanın yeni seçilən deputatları ilə görüşü baş tutub. Görüş zamanı onlar 44 günlük müharibənin detallarını araşdıran komissiya yaratmaq qərarına gəliblər. Bu komissiyaya parlamentdən kənar qüvvələr də daxil ediləcək.
Məsələ ilə bağlı “Joğovurd” nəşri qeyd edir ki, bu mərhələdə bənzər qərar qəbul etmək və bu barədə cəmiyyətə açıq bildirmək özlüyündə diqqətçəkicidir, çünki 44 günlük müharibə ilə bağlı komissiya yaratmaq haqqında həm artıq keçmiş, həm də yeni seçilmiş qüvvələr danışıblar. Məlumata görə, “Mənim addımım” fraksiyasının bəzi üzvləri Onik Qasparyanın fəaliyyət üslubu ilə bağlı açıqlamalar etməyi, onun işində hansısa bir mənfi şey tapmağı və qüsurların məsuliyyətini onun üzərinə atmağı bu komissiyanın işinin əsasında nəzərdən keçirmək məsələsini müzakirə ediblər. Bu da o deməkdir ki, eks-prezident Robert Köçəryanın yaxın adamları sırasında yer alan Onik Qasparyan da tezliklə həbsə atılacaq. Xatırladaq ki, parlament seçkilərindən əvvəl Qasparyan Paşinyanın istefasını tələb edən generalların siyasına başçılıq edirdi. Daha sonra o, parlament seçkiləri zamanı Robert Köçəryanın yanında yer alıb. Elə o vaxtdan Paşinyan ona qarşı çıxan generallaral haqq-hesab çəkməyə başlayıb. Məsələn, bir müddət əvvəl Ermənistan ordusunun generalı Qriqori Xaçaturov ordudan qovulub. Hakimiyyət Xaçaturovla müqaviləni uzatmayıb və erməni general ordudan tərxis olunub. Qeyd edək ki, Xaçaturov Ermənistan ordusunun Azərbaycanın Qazax-Tovuz bölgəsilə həmsərhəd ərazilərə cavabdeh olan 3-cü ordu korpusuna rəhbərlik edib. O, Ermənistan Silahlı Qüvvələri Baş Qərargahının keçmiş rəisi, Kollektiv Təhlükəsizlik Müqaviləsi Təşkilatının keçmiş baş katibi Yuri Xaçaturovun oğludur. Yuri Xaçaturov qurumun baş katibi olduğu vaxt vəzifəsindən kənarlaşdırılmış və həbs edilmişdi. Bu proses ciddi ajiotaj yaratmışdı. Çünki indiyədək oxşar hadisə yaşanmayıb.
Bu dəfə növbə Onik Qasparyana çatıb və 44 günlük müharibə ilə bağlı komissiya yaratmaq məsələsi də buna hesablanıb. Paşinyan iddia edir ki, Onik Qasparyan müharibə ilə bağlı daim onu yanlış məlumatlandırıb. Müxalifət isə komissiyanın yaradılmasını növbəti repressiya kimi qiymətləndirir. Ermənistan Respublika Partiyasının mətbuat katibi Eduard Şarmazanov bu xüsusda bildirir: “Kapitulyantlar tərəfindən 44 günlük müharibə ilə bağlı istintaq komissiyasının yaradılması Beriya və ya Yejovun repressiyaları araşdıran komissiya yaratması ilə demək olar eyni şeydir. Kapitulyasiyanın əsas cavabdehinin və günahkarının komanda yoldaşları hələ günahkar axtarırlar? Pişik öz çiyninizdə olduqda qaranlıq otaqda qara pişik axtarmayın”.
Onu da qeyd edək ki, Paşinyan hazırda ona sadiq olan generallarla işbirliyinə xüsusi diqqət edir. Bu günlərdə Ermənistanın müdafiə naziri səlahiyyətlərini icra edən Vaqarşak Arutyunyan istefa verib. Arutyunyan istefasından sonra Nikol Paşinyanın sərəncamı ilə nazirlikdə kadr dəyişikliyi baş verib. Bildirilir ki, Arşak Karapetyan Ermənistan müdafiə nazirinin birinci müavini təyin edilib. O, yeni təyinata kimi nazir vəzifəsini icra edəcək. Karapetyan bu vaxta kimi Baş Qərargah rəisinin birinci müavini vəzifəsini daşıyırdı. Xatırldaq ki, Vaqarşak Arutyunyan Ermənistanın 1999-2000-ci illərdə nazir postunu tutub və Robert Köçəryan onu bu vəzifədən ağır ittihamlarla qovub. Paşinyan 2020-ci ildə Arutyunyana rütbəsini qaytararaq, onu özünə hərbi müşavir vəzifəsinə təyin edib. Müharibədə məğlubiyyətdən sonra isə Arutyunyan nazir təyin edildi. O vaxtlar fikirlər səslənirdi ki, Arutyunyan qiyamçı Onik Qasparyanın kreslosunu boşaltmaqda Paşinyana yardım etdi və bununla hərbi çevrilişin qarşısını aldı. Lakin son vaxtlar bəzi məsələlərdə Vaqarşak Arutyunyan Paşinyanla razılaşmır. Bu, xüsusən sərhəd məsələsinə aiddir. Məlumdur ki, müharibəddən sonra Azərbaycan Ermənistanla sərhədə nəzarəti gücləndirib və hər atəşə daha artıq zərbələrlə cavab verir. Bundan irəli gəlir ki, Ermənistan ordusu Azərbaycan sərhədçilərini Qaragöldən uzaqlaşdırmağa risk etmədi, növbəti toqquşmadan qorxdu. Bu fonda Vaqarşak Arutyunyan özü bacarmadığını Rusiya hərbçilərinin əli ilə etməyə çalışdı, ancaq bu da alınmadı, Moskva sərhədin müəyyənləşməsinə qarışmaq istəmədi. Paşinyan isə sərhədə Qərb qüvvələrinin gəlməsini istəyir və bu məsələdə Vaqarşak Arutyunyanın onunla mövqeyi ziddiyyət təşkil edir. Məhz bu vəziyyətdə Vaqarşak Arutyunyan istefaya üstünlük verdi. Qeyd edək ki, Paşinyan müdafiə nazirinin müavini Suren Saakyanı da işdən çıxarıb. Daha əvvəl Ermənistan prezidenti Armen Sarkisyan baş qərargah rəisinin müavini general-leytenant Karen Abramyanı vəzifəsindən azad edib. O, Nikol Paşinyanın təqdimatı ilə işdən çıxarılıb. Abramyan 2020-ci ilin fevralına qədər qondarma “Dağlıq Qarabağ Respublikası”nın “müdafiə naziri” olub. Həmin ilin iyununda Ermənistan silahlı qüvvələri baş qərargah rəisinin müavini təyin edilib. Lakin Paşinyan idarəçiliyinə qarşı çıxanlar sırasında yer alıb. Paşinyana qarşı çıxan digər generallara qarşı da müxtəlif ittihamlar irəli sürülür. Müxalifət bildirir ki, Paşinyan inzibati yollarla ona qarşı çıxanları neytrallaşdırmağa çalışır.
Ramil QULİYEV
