Avropa İttifaqının məlum yardımı, Fransanın canfəşanlığı Ermənistanda anti-Rusiya təbliğatını bir az da gücləndirir. Son vaxtlar ölkədə Rusiyaya qarşı çağrışlar səslənməklə yanaşı, Fransanın hərbi baxımdan Ermənistanda iştirakı ilə bağlı istəklər səslənir.
Sözügedən məsələ ilə bağlı erməni mediası yazır ki, Moskvanın hərbi mövcudluğunu genişləndirmək cəhdlərinə baxmayaraq Rusiyanın Ermənistana təsiri tədricən azalır: “Fransa bu gün də Ermənistana hərbi yardım göstərməyə hazırdır. Beynəlxalq vəziyyət bizim tərəfimizdə olduğu üçün Rusiya Ermənistanı “sıxışdırıb” əllərini qaldırmağa məcbur edə bilməyəcək. Başa düşmək lazımdır ki, keçən ilin noyabrından bəri Ermənistanın sərhədləri Ermənistanın özü deyil, Qərb tərəfdaşları tərəfindən qorunur. Hazırda Ermənistanda Qərb ölkələrinin, ilk növbədə Fransanın hərbi varlığı məsələsi müzakirə olunur. Rusiya buna qəti şəkildə qarşı çıxsa, Ermənistanda polyaklar da (Moskvaya qarşı xoşagəlməz münasibətdə olanlar) görünə bilər. Eyni zamanda Rusiyanın belə proseslərə müqavimət göstərməyə gücü çatmır”.
O da qeyd edilib ki, Paşinyan Fransadan Ermənistana dəstək nümayiş etdirmək üçün bir neçə Rafale döyüşçüsü göndərməsini istəsəydi, müharibənin nəticəsi fərqli ola bilərdi: “Fransa indi də Ermənistana hərbi yardım göstərməyə hazırdır, amma rus çəkməsinin altından çıxmalıyıq. Hər şey İrəvan rəhbərliyindən asılıdır”.
Görünən odur ki, ermənilər daha da həyasızlaşaraq gündəmə Fransanın hərbi baxımdan Ermənistanda iştirak etməsinin vacibliyini gətirirlər. O baxımdan bütün bu çağrışların perspektivini ekspertlər necə dəyərləndirir?
“Son aylar rəsmi Parisin aşırı ermənipərəst mövqe sərgiləməsi Makronun seçki planlarından irəli gəlir”
Sözügedən məsələ ilə bağlı fikirlərini “Bakı-Xəbər”lə bölüşən hərbi ekspert İbrahim Rüstəmli Fransanın hərbi baxımdan Ermənistanda iştirakını istisna etdi: “Bəli, Fransanın tarixən Ermənistanla yaxın ənənəvi münasibətləri olub. Ancaq bu o demək deyil ki, ermənilərin hər istədiklərini etmək mümkün olacaq. Ermənilər çox şey istəyə bilər, amma bu, o demək deyil ki, hər istədikləri reallaşacaq. Avropa İttifaqının 2,6 milyard avro ayırması o demək deyil ki, Fransa ordusu Ermənistana yerləşməlidir. Ən azından bu, ona görə mümkün deyil ki, Fransa və Ermənistan fərqli hərbi bloklarda təmsil olunurlar. Fransa NATO blokunda, Ermənistan isə KTMT-də təmsil olunur. Özü də bu bloklar rəqibdilər. Belə olan halda Fransa ordusu Ermənistanda necə yerləşə bilər? Nəzərə almaq lazımdır ki, Ermənistanın açıq dənizlərə çıxışı yoxdur. Digər tərəfdən, bunun baş verməsi üçün Ermənistan KTMT-dən çıxmalıdır. Bunu isə Rusiya heç vaxt Erməənistana bağışlamayacaq. Rusiyanın bu ölkəyə çoxsaylı təsir rıçaqlarının olduğunu nəzərə alsaq Ermənistanda çox ciddi kataklizmlər yaşanacaq. Ən nəhayət son aylar rəsmi Parisin aşırı ermənipərəst mövqe sərgiləməsi Makronun seçki planlarından irəli gəlir. O, növbəti seçkilərdə erməni lobbisinin dəstəyini almaqdan ötrü bu cür oyunlara gedir”.
Hərbi ekspert onu da qeyd etdi ki, Fransa Azərbaycana təzyiq etmək gücündə deyil. Çünki bizim Türkiyə kimi müttəfiqimiz var.
Vidadi ORDAHALLI
