Erməni mediası yazır ki, Avropa İttifaqı tərəfindən Ermənistana verilən 2.6 milyard avroluq dəstək Ermənistan-İran münasibətlərinə təsir edə bilər.
Bunu onunla əsaslandırırlar ki, sözügedən vəsaitin 600 milyon avrosu Şimal-Cənub magistralının Ermənistanın cənub hissəsində inşa edilməsi üçün xərclənəcək. İrəvan rəsmiləri və ekspert dairələri yolun inşası ilə bağlı manipulyasiyalar yaratmağa çalışır. Qeyd olunu ki, İran məhsulları bu yoldan istifadə edə və bu yolla Gürcüstana, daha sonra başqa ölkələrə çıxa bilər.
Ermənilərin iddiası ondan ibarətdir ki, Rusiya İranın Avropa bazarlarına çıxmasında maraqlı deyil. Çünki bu, Avropa bazarlarda onsuz da getdikcə mövqeləri zəifləyən Moskva üçün xüsusi təhlükələr yaradır. Rusiya sanksiyalardan azad olan İranın Avropaya qaytarılmasına imkan verməmək niyyətindədir. Başqa bir tərəfdən iddia edilir ki, bu layihənin reallaşması guya Azərbaycandan keçəcək Şimal-Cənub Nəqliyyat Dəhlizinin rentabelliyini sual altında qoyacaq. Qeyd edək ki, Şimal-Cənub Nəqliyyat Dəhlizini 13 ölkə (Azərbaycan, Belarus, Bolqarıstan, Ermənistan, Hindistan, İran, Qazaxıstan, Qırğızıstan, Oman Sultanlığı, Rusiya, Tacikistan, Türkiyə, Ukrayna) ratifikasiya ediblər.
Maraqlıdır, Ermənistandan çəkilməsi nəzərdə tutulan magistralın belə bir imkanı ola bilərmi?
“Heç bir alda Ermənistandan keçəcək magistral yol Şimal-Cənub Nəqliyyat Dəhlizinin rentabelliyini aşağı sala bilməz”
Məsələyə münasibət bildirən ekspert Azər Allahverənov bunu istisna etdi. Onun fikrincə, Ermənistandan çəkiləcək magistralın Şimal-Cənub Nəqliyyat Dəhlizinə ciddi alternativ olacağı ilə bağlı deyilənlərin iqtisadi əsası yoxdur: “Ermənistanla İran arasında belə bir logistik dəhlizin qurulmasının heç bir perspektivi yoxdur. Ən azından ona görə ki, bu, avtomobil magistralıdır. Azərbaycandan keçən magistral isə dəmir yoludur. Başqa bir tərəfdən, Ermənistanın başqa ölkələrə çıxışı çox aşağı səviyyədədir. Ermənistan üzərindən daşımalar həyata keçiriləcəksə, bu, Zəngəzur dəhlizi hesabına ola bilər. Yalnız bundan sonra, sözügedən layihə müəyyən səmərə verə bilər. Ancaq heç bir alda Ermənistandan keçəcək magistral yol Şimal-Cənub Nəqliyyat Dəhlizinin rentabelliyini aşağı sala bilməz. Çünki Azərbaycanda bir neçə nəqliyyat dəhlizləri kəsişir və ölkəmiz bu baxımdan olduqca əlverişli coğrafi məkanda yerləşir. Skandinaviyadan Hindistana qədər yükdaşımalar Azərbaycan üzərindən həyata keçiriləcək. Bu nöqteyi-nəzərdən hesab edirəm ki, erməni mediasında yazılanlar manipulyasiyadır. Bütün bunlar Azərbaycanda reallaşmaqda olan beynəlxalq yükdaşımalar dəhlizləri ilə bağlı həyata keçirilən dövlət trategiyasının əleyhinə yönəlmiş bir siyasətdir. Erməni tərəfi bununla istəyir ki, beynəlxalq yükdaşımalar sistemində hansısa bir çaşqınlıq yaratsın. Reallıqda isə həmin deyilənlərin heç bir əsası yoxdur. Belə olduğu təqdirdə həmin deyilən fikirlər yalnız söz olaraq qalacaq. Əslində erməni tərəfi zaman-zaman belə uydurmalarla çıxış edib. Bu da onun bir tərkib hissəsidir”.
Ekspert onu da qeyd etdi ki, nəqliyyat dəhlizləri ilə bağlı gedən proseslər Azərbaycanın xeyrinə işləyir.
Vidadi ORDAHALLI
