ABŞ-ın Yerevandakı səfiri Linn Treysi bu gün Azərbaycan-Ermənistan dövlət sərhədinin son günlər intensiv atışmaların baş verdiyi Kəlbəcər rayonu istiqamətinə-Geqarkunik vilayətinə səfər edib. Və dövlət sərhədi boyu Azərbaycan ordusunun mövqelərinin müşahidəsini aparıb, diplomatı ABŞ səfirliyinin hərbi attaşesi və Ermənistan Müdafiə Nazirliyinin nümayəndələri müşaiyət edib.
Səfir Treysi ABŞ-ın Ermənistan-Azərbaycan sərhədindəki hadisələrdən narahatlığını bir daha diqqətə çatdıraraq rəsmi Vaşinqtonun sərhəd demarkasiyası zamanı güc tətbiqini rədd etdiyini vurğulayıb.
Eyni zamanda, Linn Treysinin sözlərinə görə, ABŞ tərəfləri ən qısa zamanda Minsk Qrupu həmsədrlərinin vasitəçiliyi ilə danışıqlara qayıtmağa çağırır. Qeyd edək ki, bundan bir neçə gün əvvəl Fransanın Ermənistandakı səfiri də həddini aşaraq, Fransanın Azərbaycandakı səfirinin adından da bəyanat səsləndirmişdi. Həmin səfir də Qarabağın status ilə bağlı müzakirələrin vacibliyini vurğulamışdı. Həmsədr ölkələrin Ermənistandakı səfirlərinin hərəkətləri diplomatic etiket normalarına uyğundurmu?
Politoloq Yeganə Hacıyeva qəzetimizə açıqlamasında bildirdi ki, Minsk qrupu ölkələrinin Ermənistandakı səfirləri özlərini tam başqa çərçivədə aparırlar: “Sanki bir ölkənin səfiri kimi deyil, Cənubi Qafqazdakı nümayəndəsi kimi görünürlər.Verdikləri mesajlar isə sanki ATƏT-in Minsk qrupunun həmsədrlərinin dilindən səslənir kimi görünür. Bunun bir səbəbi də onların Azərbaycandakı səfirlərlə müqayisədə mediaya daha açıq olmalarıdır. Ermənistan mediası da onlara qarşı çox tələbkardırlar. Özlərinə lazım olan ifadələri də onların dilindən qoparmaq istəyirlər. Daha çox yönlədilmiş sual verirlər. Bizim ölkədəki səfirlər məhdud sayda media nümunələri ilə əməkdaşlıq edirlər. Əsasən də özlərinin fondları tərəfindən maliyyələşən media ilə əməkdaşlığa üstünlük verirlər. Biz bir çox vaxta ABŞ-ın Qarabağla bağlı mövqeyini buradakı səfirdən deyil, Ermənistandakı səfirin dilindən eşidirik. İstənilən səfirlik istəyir ki, az sayda media ilə əməkdaşlıq etsin. Ancaq jurnalistlərimiz də buradakı səfirləri danışmağa məcbur etməlidir. Ermənistandakı ABŞ səfirinin Qarabağın gələcək status ilə bağlı səsləndiridiyi fikirlərin heç bir əsası yoxdur. Məsələ burdadır ki, 10 noyabr razılaşmasının heç bir bəndində Qarabağdakı ermənilərə statusun verilməsilə bağlı bənd yoxdur. Minsk qrupu həmin bəyanatın ərsəyə gəlməsində işləməyib. ATƏT-in Misk qrupu formatı həmsədr ölkələrin qərəzli mövqeyinə görə öz etimadını zədələyib. Bu da bizə əsas verir ki, həmin formata ciddi etibar etməyək”.
Məhəmmədəli QƏRİBLİ
