Mətbuatın verdiyi məlumata görə, rus bloqer Sergey Vasilyev öz dostu ilə Rusiya pasportu ilə Qarabağa keçə bilib. Azərbaycandan icazəsiz Qarabağa gələn rus bloger dostu ilə həyata keçirdiyi səfərini əvvəldən sona qədər lentə alıb və öz yutub kanalında yerləşdirib, deyib ki, Qarabağda sərbəst dolaşıb heç kes ona mane olmayib.
Görüntülərdən görünən odur ki, Vasilyev yol boyu ermənilərlə söhbət apararaq Qarabağa kimlərin buraxıldığını soruşub. O bildirib ki, rus sülhməramlıların olduğu ilk yoxlanış məntəqəsinə çatdıqda Rusiya şəxsiyyət vəsiqəsi ilə buraxılacağını düşünmürdü. Lakin ona heç bir problem yaratmadan buraxıblar. Daha sonra səfərini davam etdirən S. Vasilyev ikinci məntəqəyə çatdıqda onlara xaricilərin buraxılmadığını desələr də, sonradan buraxıblar.
Bloqerin lentə aldığı kadrlardan bir erməninin maşınında Şuşa şəhərinə qədər gəldiyini, daha sonradan Xankəndinə getdiyini görmək mümkündür.
O, rus sülhməramlıların olduğu bütün məntəqələrdən keçdiyini və Xankəndinə qədər gəldiyini deyir. Bütün video boyu rus bloqer Qarabağda sərbəst şəkildə hərəkət edir.
Xarici blogerlerin Azərbaycanın icazəsi olmadan Qarabağa buraxılmasına görə kim məsuliyyət daşımalıdır?
“Rus bolgerini və onun dostunu qanunsuz olaraq Qarabağa buraxmaqla rus sülhməramlıları bir daha özbaşınalıq etdiklərini ortaya qoydular”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə bildirdi ki, Azərbaycan işğaldan azad edilən ərazilərinə, Qarabağın istənilən nöqtəsinə Laçın dəhlizi vasitəsilə və digər yollarla gəlmək istəyən istənilən xarici ölkənin vətəndaşlarının səfərləri yalnız Azərbaycan hökümətinin icazəsi ilə ola bilər. “Bu hər bir ölkənin vətəndaşlarına aiddir, o cümlədən Rusiya vətəndaşlarına. Bəlkə də Rusiya vətəndaşlarına daha çox aiddir. Biz Rusiya sülhməramlılarının regiona gəlməsinə razılıq verdik ki, regionda müəyyən funksiyanı yerinə yetirsinlər. Rusiya sülhməramlılarının regiona gəlməsinə razılıq verməyimiz o demək deyil ki, onlar burda nə istəyirlər etməlidirlər. Bu o demək deyil ki, Rusiya gəlib regionda “mütləq hakim” olacaq. Rusiya Qarabağa sülhməramlı statusunda gəlib, o Azərbaycan hökümətinin razılığı olmadan heç bir xarici vətəndaşı Laçın dəhlizindən keçib Azərbaycan ərazilərinə daxil olmasına icazə verməməlidir. Bu yalnız Azərbaycan hökümətinin razılığı ilə baş verə bilər. Rus bolgerini və onun dostunu qanunsuz olaraq Qarabağa buraxmaqla rus sülhməramlıları bir daha özbaşnalıq etdiklərini ortaya qoydular. Onlar özbaşnalığını, Azərbaycanla “hesablaşmadığı”nı göstərmək istəyir. Burada məsuliyyət rus sülhməramlılarının üzərinə düşür.
Ona görə də hesab edirik ki, Azərbaycan məsələyə tam ciddi şəkildə yanaşmalıdır, sərt şəkildə etirazını bildirməlidir, Azərbaycan Xarici İşlər Nazirliyin Qarabağa qanunsuz səfərlər edənlərlə bağlı qara siyahısı daha da sərt şəkildə yenidən bərpa olunmalıdır, həmin şəxlər də qara siyahıya salınmalıdır. Rusiyanın Azərbaycandakı səfiri XİN-ə çağırılmalıdır və qanunsuz hərəkətlərə görə ondan cavab tələb olunmalıdır, ona nota təqdim edlməlidir. Eyni zamanda istənilən xaricio ölkədən, o cümlədən də Rusiyadan qanunsuz şəkildə Azərbaycan ərazisinə gələn şəxslərə qarşı cinayət işi qaldırılmalıdır və həmin şəxslər beynəlxalq axtarışa verilməlidir”.
A.Nağı deyir ki, Azərbaycanın buna tam haqqı çatır və dövlətimiz bu cür sərt mövqe ortaya qoymalıdır. Ekspertin sözlərinə görə, heç kəsə, o cümlədən də Rusiya vətəndaşlarına imkan verilməməlidir ki, qanunsuz səfərlər etsin. A.Nağının bildirdiyinə görə, o ərazilər 10 noyabr və 11 yanvar bəyanatlarında da Azərbaycan ərazisi olaraq qeyd edilir, tanınır, qəbul edilir, buna Rusiya rəhbərliyi də, Ermənistan rəhbərliyi də imza atıb razılaşıb: “Həmin ərazilərə azərbaycanlıların qayıtması və orada Azərbaycan hakimiyyətinin bərpa olunması prosesi gedir. Bu zaman bu cür qanunsuz səfər təşkil olunursa, Rusiya özünü orada sərbəst aparırsa demək bu prosesə Rusiya maneçilik törədir. Rusiya razılaşmadan kənara çıxır. Təbii, bu ermənilərin maraqlarına uyğundur ki, belə qanunsuz səfərlərlə həmin ərazilərin Azərbaycana aid olmadığını göstərsinlər, başqa ölkələrin vətəndaşlarının ora icazəsiz olaraq sərbəst gəlib getdiyini təqdim etsinlər. Buna qətiyyəyən yol vermək olmaz, prinsipial bir məsələ kimi Azərbaycan mövqeyini ortaya qoymalıdır. Ora gələnlər nədən yazırlar, nədən danışırlar, çəkilişlərində nələri təqdim etməyə çalışırlar? Bu da vacib bir məsələdi”.
A.Nağı hesab edir ki, bütün məsələlər dövlətimiz tərəfindən ciddi nəzarətə götürülməli və məsələyə sərt yanaşılmalıdır.
İradə SARIYEVA
