“Zəngəzur dəhlizinə gəldikdə, mən cənab Putinə bildirdim ki, bizdə olan məlumata görə, Ermənistan bu məsələ ilə bağlı yenə də özünü səmimi aparmır”.
Bunu Prezident İlham Əliyev bu günlərdə Azərbaycan Televiziyasına müsahibəsində deyib.
Ölkə başçısının sözlərinə görə, Ermənistan Zəngəzur dəhlizi ilə bağlı öhtəliklərini yerinə yetirmək istəmir: “Mən cənab Şarl Mişellə mətbuat konfransında dedim ki, bütün yollar paralel şəkildə açılmalıdır və selektiv yanaşma olmamalıdır, yəni ayrı-seçkilik olmamalıdır. Amma biz görürük ki, Ermənistan burada da növbəti dəfə hansısa oyun oynamaq istəyir. Dəmir yolunun Zəngəzur dəhlizindən keçməsinə razılıq verib, halbuki müharibədən dərhal sonra buna etiraz edirdi. Mən deyirdim ki, biz onları məcbur edəcəyik, bəziləri bunu təhdid kimi qəbul edirdi. Amma mən nəzərdə tuturdum ki, biz onları o mənada inandıracağıq. Ancaq avtomobil yolunun çəkilişinə etiraz edir. Bu da 10 noyabr tarixində imzalanmış Bəyannaməyə ziddir. Çünki orada 9-cu maddədə göstərilir: yollar açılır - dəmir yolu, avtomobil yolları. Necə ola bilər dəmir yolu açılsın ki, Ermənistan İranla, Rusiya ilə dəmir yoluna malik olsun, amma biz avtomobillə Naxçıvana gedə bilməyək? Belə şey olar? Belə şey ola bilməz. Bu məsələ ilə bağlı Rusiya Prezidenti ilə fikir mübadiləsi apardıq və hesab edirəm ki, növbəti mərhələdə İrəvandan daha ümidverici xəbərlər gələcək. Hər halda bizim mövqeyimiz dəyişməz olaraq qalır və Zəngəzur dəhlizi mütləq açılmalıdır”.
Görünən odur ki, Prezident bununla açıq və cəsarətli mövqe ortaya qoydu.
“Təəssüflər olsun ki, 10 noyabr razılaşmasının moderatoru olan Rusiya bununla bağlı İrəvana təzyiq göstərmir”
Məsələyə münasibət bildirən AMİP funksioneri Əli Orucovun sözlərinə görə, Ermənistan hər vasitə ilə Zəngəzur dəhlizini açmaqdan yayınır: “Bunu görməmək mümkün deyil. Hansı ki, Zəngəzur dəhlizi açılmadan digər nəqliyyat xəttlərinin açılmasından söhbət gedə bilməz. Təəssüflər olsun ki, 10 noyabr razılaşmasının moderatoru olan Rusiya bununla bağlı İrəvana təzyiq göstərmir. Halbuki, 10 noyabrdan sonra Rusiyanın bu yöndə imkanları birəon xeyli artıb. Moskva Zəngəzur dəhlizi məsələsində Ermənistanı ram edə bilər. Ancaq biz görürük ki, Zəngəzur dəhlizi ilə bağlı Paşinyanın həyasızlığı azalmaq əvəzinə, əksinə daha da artır. Son aylar bir neçə dəfə Nikol Paşinyan həyasızcasına bəyan edib ki, 10 noyabır razılaşmasında Zəngəzur dəhlizindən söhbət getmir. Bu, nə deməkdir? Bu, o deməkdir ki, Ermənistan məqsədyönlü şəkildə bu yöndə gedən prosesi pozur. Təəssüf doğuran məqam odur ki, Qərbin Ermənistana yönəlik reveransları artdıqca, İrəvan sözügedən dəhlizlə bağlı ritorikanı daha da sərtləşdirir. Nəqliyyat xəttlərinin açılması Avropa İttifaqının maraqlarına uyğun olsa da, Avroittifaqın bu yöndə Ermənistana hər hansı təzyiqi müşahidə edilmir. Bütün bunlar isə proseslərin yubanmasına öz təsirini göstərir. Hesab edirəm ki, Ermənistan bu cür pozucu siyasətini davam etdirəcəksə, o zaman Laçın dəhlizi bağlanmalıdır. Yalnız o halda Ermənistanı ram etmək mümkün olacaq”.
Partiya funksioneri hesab edir ki, bu yöndə Ermənistana hərtərəfli təzyiqlər olmalıdır.
Vidadi ORDAHALLI
