Hörmətlimi deyim, hörmətsizmi deyə müraciət edim ,həqiqətən bilmirəm. Çünki millət vəkili olan bir adama özünün belə hörmət qoymadığı statusuna Dövlətini, Vətənini sevən bir şəxs kimi cavab verməyi özümə borc bildim. Etibar bəy, siz burda, butün Azərbaycan xalqını "təhsil eksperti"adı ilə mənasız statuslarınızla bezdirəndə, mən əlimdəki qələmi yerə qoyub, silaha sarılıb yaşımın keçməsinə baxmayaraq könüllü olaraq bu Vətənin müdafiəsinə yollanıb Füzulidən Şuşaya qədər döyüş yolu keçmişəm.
Mən bu Vətənçün ölməyi gözə alanda siz harda idiniz? Sizin verdiyiniz təklifin qeyri-səmimiliyi elə burdan görünür. Ən azından mən Vətən Müharibəsinin Qazisi kimi sizdən bu primitiv hörməti gözləyirdim. Ama artiq yanıldığımın fərqindəyəm. Qaldı ki, jurnalistikaya aidiyyatıma, mən 2005 -ci ildən erməni terrorundan məqalələr yazanda siz təhsil sözü ilə ekspert sözünün anlamlarını araşdırırdınız ki, bunları bitişdirəndə görəsən nə effekt verəcək. Mən uzun illər "Respublika Xatirə Kitabı"redaksiyasında Dövlət Təhlükəsizlik Xidmətinin birbaşa dəstəyi və arxivlərdə araşdırma aparmaq üçün verdiyi icazə ilə I Qarabağ Müharibəsində əsir və girov götürülmüş, itkin düşmüş şəxlərin adlarının araşdırmasını aparıb onu "Xüsusi cild"lər şəklində tariximizin bir parçasına çevirəndə, "Bakı-xəbər" qəzetinin səhifələrində Qarabağ mövzusunda, daxili və xarici siyasət haqqında yazdığım yazılar Prezident kitabxanasının arxivlərinə yığılanda, siz seçkilərdə hansısa əcaib formada qalib gəldiyiniz, yaşca sizdən dəfələrlə balaca olan siyasi opponentinizin qabağından qorxaqcasına qaçmaqla məşğul idiniz. Özünüzə hörmət qoymadığınızı bilirəm, amma ən azından daşıdığınız statusa hörmət qoymağı sizdən istəyə bilərəm. Çünki istəsək də, istəməsək də seçiciniz bizlərik. Ən azından secməyimizdən ,yaxud seçməməyimizdən asılı olmayaraq Millət Vəkili statusunun mahiyyətini bilirik. Qaldı ev məsələsinə, mənim ev almaq kimi bir istəyim yoxdu. Baxmayaraq ki, həm jurnalistəm , həm də bütün ömrüm boyu müharibədə bir hissəsini itirdiyim sağlamlıqla yaşamağa məcburam. Mən sizdən fərqli olaraq öz mənliyimi, əqidəmi hec vaxt maddiyyata , hansısa ev haqqında xəyallara və fantaziyalara satmamışam və belə fikrim də yoxdur. Mən hətta Vətən Savaşında əlini, ayağını, sağlamlığını daha ağır formada itirmiş döyüş yoldaşlarıma daha çox diqqət ayrılsın deyə Yaşat fondunun təklif etdiyi köməyi qəbul etməmişəm. Siz adımı hallandırarkən ən azından mənə, olmasa belə ,özünüzə hörmətlə yanaşın. Çünki ən azından ölümü, şəhadəti gözə alıb Vətənçun canından keçməyə hazır olan, sağlamlığını itirsə də, sizdən fərqli olaraq sağlam düşüncə tərzini itirməyən Vətən Müharibəsi Qazisinin adını hallandırdığınızın fərqinə varıb azacıq səmimi olmağa çalışın. Mən sizə Mehman Hüseynovun dediyi kimi müraciət etmirəmsə, siz də özünüzü buna uyğun aparmağa çalışın. Çünki şərəfsiz erməninin atdiğı mərmiyə, gülləyə, qoyduğu minalara fikir vermədən, ölümü heçə sayan, onu bu torpaqlardan Cənab Prezident demiş "iti qovan kimi"qovan Vətən Müharibəsi Qazisinə sizin atdığınız replikaların o atılan mərmidən və güllədən qəti fərqi yoxdur.
Nahid Salayev jurnalist, Vətən Savaşı Qazisi.
