Ermənistan ara-sıra sərhəd pozuntularını davamlı "sərhəd müharibələrinə" çevirir...

İbrahim Rüstəmli: “Ermənilərin bu addımları başı kəsilmiş ordunun ora-bura çırpılması cəhdinə bənzəyir”

img

İyulun 23-ü saat 16:00 radələrində Ermənistan silahlı qüvvələrinin bölmələri Basarkeçər rayonu ərazisindəki mövqelərindən Azərbaycan Ordusunun Ermənistan-Azərbaycan dövlət sərhədinin Kəlbəcər rayonu sahəsindəki mövqelərini atəşə tutub. Bu barədə Müdafiə Nazirliyi məlumat yayıb.

Qarşı tərəfdən açılan snayper atəşi nəticəsində hərbi qulluqçumuz gizir Yaqublu Fərman Telman oğlu şəhid olub.

Hazırda qeyd olunan istiqamətdə yerləşən Azərbaycan Ordusunun bölmələri tərəfindən cavab tədbirləri həyata keçirilir.

Ermənistan tərəfi bu kimi təxribat yolu ilə qəsdən iki ölkənin dövlət sərhədində vəziyyəti gərginləşdirmək məqsədi güdür.

Baş vermiş təxribata görə bütün məsuliyyət tam şəkildə Ermənistanın üzərinə düşür.

Maraqlıdır, Ermənistan niyə hərbi eskalasiyanın dövlət sərhədinə keçməsində maraqlıdır?

Hərbi-siyasi ekspert, istefada olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, bütün dünyadakı müharibələrin tarixində belə hadisələr olub və bundan sonra da olacaq: “İstər birinci, istərsə də ikinci Dünya müharibələrindən sonra lokal müqavimətlər hər zaman baş verib. Bu müharibənin xarakterlərinə uyğundur. Ermənilərin bu addımları başı kəsilmiş ordunun ora-bura çırpılması cəhdinə bənzəyir. Biz bunların hamısına lazımi cavab verəcəyik, lazım gəlsə irəli də gedəcəyik. Prezident çıxışlarından birində dedi ki, biz nəinki 21-ci əsrin, ümumiyyətlə 22-ci əsrin də müharibəsinə hazır olmalıyıq. Əgər Ermənistan bu mövqeyində qalıb, təxribatlara davam edərsə, tərəfimizdən ciddi şəkildə cəzalandırılacaq. Keçən 30 il ərzində biz sülhü dəstəkləmişik.  Bu gün də sülhün tərəfindəyik. Ancaq Ermənistan buna mane olur. Ermənistan bu cür təzyiq vasitələri ilə nəyəsə nail ola bilməyəcək. Burada həm də psixoloji məqam var. 30 il ərzində Ermənistan özünü güclü orduya sahib ölkə kimi təqdim edirdi. Son hadisələr göstərdi ki, Azərbaycan  44 gün ərzində təriflənən ordunu məhv etdi. Psixoloji cəhətdən bu məğlubiyyəti həzm edə bilmədikləri üçün belə təxribatlara əl atırlar. İstənilən halda, bütün bu cəhdlər nəticə verməyəcək, əksinə, Ermənistanın ziyanına işləyəcək”.

Məhəmmədəli QƏRİBLİ

Son xəbərlər