Rus mediasında Aİ-nin 2.6 milyard yardımına unikal qiymət - Qazaxıstan və Belarusa baxanda Ermənistanı satın almaq daha asandır
“Ermənistanın Aİİ-də və KTMT-də təmsil olunmalarına rəğmən, Rusiyanı hər an satmağa hazırdırlar”
Ermənistana 2,6 milyard avroluq yardım paketi ayıran Avropa İttifaqının qəfil və gözlənilməz qərarı müzakirələrlə yanaşı, ortaya çoxlu suallar qoyub. Ermənistana bu yardımın nəyin müqabilində təqdim edildiyi və ya hansı işlər üçün nəzərdə tutulduğu düşündürücüdür.
Heç şübhəsiz bu, Qərbin ikili standartlar siyasətindən irəli gəlir. Sözügedən məsələdə təzad odur ki, bu pulları Avropa İttifaqı müharibədən sonra bütöv regionun bərpasına, işğaldan azad olunan ərazilərlə bağlı layihələrə deyil, məhz Ermənistana ayırır.
Bu arada, Rusiya mətbuatında Avropa İttifaqının Ermənistana 2,6 milyard avro ayırması sərt tənqid olunur, bunun pərdəarxası məqamlarına aydınlıq gətirilir. "Vestnik Kafkaza”yazır ki, Aİ-nin Ermənistana Gürcüstana 20 ildə ayırdığı vəsait qədər vəsait ayırması təsadüfü deyil: “Avropa İttifaqının özünün büdcəsi problemlərlə üzləşdiyi halda, Ermənistana bu həcmdə vəsait ayırır. Və belə olan halda, ortaya belə bir sual çıxır – bu, Avropa İttifaqının nəyinə lazımdır? Bu addım Rusiyaya qarşı yönəlib. Məqsəd bəllidir - Moskvanı müttəfiqlərindən məhrum etmək, NATO qoşunlarını onun sərhədlərinə doğru yaxınlaşdırmaq, perspektivdə isə Rusiyanı bütün mümkün istiqamətlərdə bloklamaq. Son nəticədə isə Rusiyanı daha çox zəiflətmək hədəflənib. Ermənistanın Avrasiya İqtisadi İttifaqı və KTMT üzvləri sırasında "daha tez alınması” (Belarus və Qazaxıstandan fərqli olaraq) realdır. Ermənistanı Qırğızıstan və Tacikistanla müqayisədə "almaq" effektivdir. Ermənistan Qırğızıstan və Tacikistandan fərqlənir. Orada da hakimiyyət puldan imtina etmir. Lakin anti-Rusiya razılaşmalarını həyata keçirmək istəməz. Ermənistan isə buna gedər”.
Belə görünür ki, Rusiya Ermənistanın əsl simasını get-gedə dərindən anlamağa başlayıb.
Məsələyə münasibət bildirən Yeni Yol Partiyasının sədri Ramil Hüseynovun sözlərinə görə, prinsipcə burada təəccüblü heç nə yoxdur: “O baxımdan ki, ermənilər tarix boyu satılmağa hazır olublar. Hansı tərəf güclü olubsa, ora sığınıblar. Seçkilərdən sonra müşahidə olunan tendensiya bir daha bunu sübut edir. Ermənistanı Rusiyaya bağlayan əsasən Qarabağ amilidir. Ermənistanın son vaxtlar apardığı siyasətin mahiyyəti ondan ibarətdir ki, Qərb müxtəlif formalarda regionda möhkəmlənsin və Rusiya bölgədən çıxarılsın. 20 iyun seçkilərinə qədər Azərbaycan-Ermənistan sərhədində və Qarabağda atəşkəs pozulmurdu. Məhz seçkilərdən və Aİ-nin məlum yardım paketini elan edəndən sonra bu cür hallar baş verməyə başladı. Hesab edirəm ki, bütün bunlar əsla təsadüfü deyil və Rusiya da bütün bunları yaxşı bilir. Ermənistan bir tərəfdən atəşkəsi pozur, o biri tərəfdən nəqliyyat və kommunikasiya xətlərinin açılması ilə bağlı sərsəm şərtlərlə çıxış edir. Bu, anormal haldır. Ağır məğlubiyyətə uğramış bir ölkənin bunu etməsi nə deməkdir? Bu, o deməkdir ki, Nikol Paşinyan cəsarəti Qərbdən alır. Ermənilər fikirləşir ki, pul çox şeyi həll edir. O səbəbdən dilənçi bir ölkəyə 2,6 milyard avroluq yardım paketi ermənilərin gözünü qamaşdırır. Bu isə o deməkdir ki, Ermənistanın Aİİ-də və KTMT-də təmsil olunmalarına rəğmən, Rusiyanı hər an satmağa hazırdırlar”.
Partiya sədri hesab edir ki, Ermənistan hakimiyyəti təhlükəli oyun oynayır.
Vidadi ORDAHALLI
