Müstəqil Azərbaycanın yeni gənc nəsli Qarabağı azad etmiş həlledici qüvvə kimi...

img

30 yaşlı müstəqil Azərbaycanın sahib olduğu gənc nəsil ölkəmizin firavanlığı, xoşbəxt gələcəyi üçün tarixlərə sığmayan, əbədi olaraq yaşayacaq, nümunə olacaq böyük bir qəhrəmanlıq örnəyi ortaya qoyublar. Əlbəttə, hər bir xalq və dövlət üçün milli mənlik şüuruna malik, vətənpərvər gənclər ordusu yetişdirmək böyük üstünlükdür. Vətənpərvərlik tərbiyəsinin yaranmasında heç şübhəsiz milli mənlik şüurunun əsaslarının təbliğ edilməsi müstəsna yer tutur.

Vaxtilə ümummilli lider Heydər Əliyev gənc nəslə xitabən deyirdi:“Hər bir Azərbaycan gənci hər şeydən çox, hər şeydən artıq müstəqil Azərbaycanın bugünü, gələcəyi haqqında düşünməlidir”. Azərbaycan gənci buna əməl etdi və Azərbaycan dövlətinin ərazibütövlüyünün təmin edilməsi istiqamətində mücadilələr verdi. 44 günlük Vətən müharibəsində  Azərbaycan gəncinin şücaəti, qoçaqlığı bütün dünyada dastan oldu. Bu gün qürur hissi ilə deyə bilərik ki, Azərbaycan gənci Qarabağ zəfərinin  əsas müəllifinə çevirildi. Qarabağı işğaldan azad edən Azərbaycan əsgəridir, zabitidir, Azərbaycan gəncidir.

Prezident İlham Əliyev qeyd edirdi: “Bizim gənclər milli ruhda tərbiyə almalıdırlar. Bilməlidirlər ki, Azərbaycanın bundan sonra da müstəqil ölkə kimi yaşaması üçün onların hər biri vətənpərvər olmalıdır”

  • 44 günlük Vətən müharibəsində Azərbaycan gənclərinin qəhrəmanlığı bir vətənpərvərlik məktəbidir...

Şübhəsiz ki, Azərbaycan gəncləri yalnız öz intellektləri, savadları, bilik və bacarıqları ilə deyil, həm də örnək vətənpərvərlik tərbiyəsinə malik olmaqları ilə seçilirlər.

27 sentyabr 2020-ci ildə başlanan Vətən müharibəsində bütün Azərbaycan gəncləri ayağa qalxdı və hər kəs düşmənə həddini bildirmək üçün ön cəbhədə olmaq istəyini ortaya qoydu. Milli maraqları, torpaqlarımızın düşmən işğalından azad edilməsini hər şeydən üstün tutan gənclərimiz öz arzularına nail oldular.  

İctimai xadimlər də, alimlər də, hərb sahəsinə bələd olan şəxslər də birmənalı olaraq bildirirlər ki, 44 günlük Vətən müharibəsində Azərbaycan gənclərinin qəhrəmanlığı bir vətənpərvərlik məktəbidir. Bu məktəb sözün həqiqi mənasında özündə yüz minlərlə gənci birləşdirir.

  • “Gənclərimiz Qarabağ zəfərini bizə bəxş etməklə sübut etdilər ki...”

Filologioya üzrə fəlsəfə doktoru Qiymət Məhərrəmli bizimlə söhbətində bildirdi ki, Azərbaycan gənclərinin misilsiz qərəmanlığı tariximizdə yeni şanlı səhifələr açdı. “Azərbaycan gənclərində milli mənlik şüurunun formalaşmasında, vətənpərvərlik hisslərinin tərbiyə edilməsi sahəsində görülən işlər öz bəhrəsini verdi. Gənclərin vətənpərvərlik ruhunda yetişdirilməsi üçün  həm dövlət, həm elmi ictimaiyyət, həm də mətbuat uzun illər idi ki, böyük təbliğat aparıb. Bu gün də vətənpərvərlik ruhunun qorunub saxlanılması üçün işlər davam etdirilir. Bu illər ərzində bu istiqamətdə həyata keçirilən tədbirlər faydasız qalmadı, gənclərin həyatında mühüm rol oynadı. Gənclərimiz Qarabağ zəfərini bizə bəxş etməklə sübut etdilər ki, onlar qəhrəmandılar”.

  • “Bütün dünya bizim qəhrəmanlardan danışır”

Q.Məhərrəmlinin sözlərinə görə, 2016-cı ilin aprel hadisələri zamanı da xalqımız Azərbaycan gəncliyinin vətənpərvərlik ruhunun şahidi oldu. “Azərbaycan gəncliyi aprel hadisələri zamanı da böyük həmrəylik, şücaət nümunəsi sərgilədilər. Gənclərimizin göstərdiyi qəhrəmanlıqlar əsrlər boyu unudulmayacaq. Çünki Azərbaycan gənclərinin şücaəti nəticəsində üç rəngli bayrağımız Şuşa qalasında, digər müqəddəs torpaqlarımızda dalğalanır. Məhz bunları bizə gənclərimiz qazandırıb. Burada diqqət çəkən mühüm bir məqam ondan ibarətdir ki, 27 sentyabrda bütün sahələrdə təmsil olunan gənclərin hamısı silaha sarılmaq istədi. Çağırış məntəqlərinin qarşısında on minlərlə, yüz minlərlə gənclər vardı, hamı müharibəyə getmək istəyirdi. Azərbaycan gəncliyi könüllü olaraq vətənin bir parçasının düşmən işğalından azad edilməsində iştirak etmək istəyirdi. Nə qədər ailənin tək övladı müharibəyə gedib, düşmənə qarşı vuruşub şəhidlik zirvəsinə ucalıb, qazi adını qazanıb.  Bütün dünya bizim qəhrəmanlarımızdan danışır. Şuşanın düşmən işğalından azad edilməsi müasir hərb tarixində analoqu, bənzəri olmayan bir hadisədir. Bu hadisənin müəllifi Azərbaycan gəncləridir. Azərbaycan gəncliyi göstərdi ki, hər zaman öz missiyasını layiqincə yerinə yetirib. Dövlət başçısı tərəfindən Azərbaycan gəncliyinin qəhrəmanlığı, şücaəti layiqincə dəyərləndirlir. Vətənin müdafiəsində iştirak edən on minlərlə gənc Vətən müharibəsindəki xidmətlərinə görə orden və medallarla təltif ediliblər”.

44 günlük Vətən müharibəsinin nəticəsi olaraq qazandığımız Qarabağ zəfərinə qiymət verərkən Azərbaycan gənclərinin misilsiz qəhrəmanlığına Ali Baş Komandan, Prezident İlham Əliyev gənclərimizin şücaəti haqqında geniş danışıb: “Mən çox şadam ki, son illər ərzində Azərbaycanda vətənpərvər, güclü, milli ruhda tərbiyə almış gənc nəsil yetişib. On yeddi ildir ki, mən Azərbaycanın rəhbəriyəm. Bu illər ərzində yetişən insanlar bu torpaqları azad etdilər. Bütün nəsillərdən olan vətəndaşlarımızın bu Qələbədə böyük zəhməti var, payı var. Ancaq onu da bildirməliyəm ki, əsas yükü, əsas vəzifəni gənc nəsil yerinə yetirdi. 2003-cü ildə 10 yaşı, 15 yaşı olanların bu gün  27-32 yaşı var. Onların məhz vətənpərvərlik ruhunda tərbiyə alması, düşmənə nifrət hissi bizi Qələbəyə apardı və Azərbaycan tarixi ədaləti bərpa etdi”

Ölkə başçısının gənc nəslin sahib olduğu vətənpərvərlik tərbiyəsinə verdiyi böyük dəyər onların gələcəkdə də bu yolda irəliləyəcəyini şərtləndirir. Azərbaycan yüksək vətənpərvərlik hissinə malik gənclər ordusuna sahibdir, belə gəncliyi olan dövlət isə əbədiyyətə qədər öz müstəqilliyini, bağımsızlığını qorumağa qadirdir.

İradə SARIYEVA

Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.

Son xəbərlər