Azərbaycan Qarabağ probleminin mövcud olduğu dönəmdə uzun illər dözümlülük nümayiş etdirdi ki, Minsk Qrupu məsələni sülh yolu ilə həll etsin. Prezident Aprel döyüşlərindən sonra demişdi ki, Azərbaycanla Ermənistanı təkbətək qoysalar, Ordumuz qısa bir zamanda işğalçı qüvvələri darmadağın edib, ərazi bütövlüyümüzü təmin edə bilər.
Bəlkə də Aprel döyüşləri Vətən Müharibəsinin sınaqdan keçirilməsi idi. Bizi hansı maneələr, risklər gözlədiyini müəyyənləşdirdik. Bu riskləri minimuma endirmək çox böyük müdriklik, siyasətdə təcrübə, nüfuz tələb edirdi. Prezident bu riskləri müəyyənləşdirdi və aradan qaldırdı. Tovuz hadisələrindən sonra Prezident İlham Əliyev açıq hücum diplomatiyasına keçdi. Ölkə başçısı bildirmişdi ki, mən bilirəm, nə vaxt nə etmək lazımdır. Biz doğurdan da onu gördük. Prezident məqamı gözlədi və yetişdirdi.
Yaxşı fikirləşsinlər, sonra gec ola bilər…
Prezident İlham Əliyev iyulun 14-də Bakının Binəqədi rayonunun Xocasən qəsəbəsində şəhid ailələri və müharibə əlilləri ilə görüşdə çıxışında növbəti dəfə Ermənistana sülh çağırışı etdi. Dövlət başçısı vurğuladı ki, biz Ermənistanla sülh müqaviləsini imzalamağa hazırıq. Lakin ölkə rəhbəri bəyan etdi ki, Ermənistan tərəfdən buna rəsmi reaksiya yoxdur: “Qeyri-rəsmi kanallarla bizə çatan məlumat budur ki, Ermənistan buna hazır deyil. Bu, çox böyük səhv olacaq. Bizim təklifimiz real vəziyyətə əsaslanır. Hesab edirik ki, məsələ həll olunub, Ermənistan və Azərbaycan arasında sülh müqaviləsi olmalıdır. Bir-birinin ərazi bütövlüyünün tanınması olmalıdır, sərhədlərin tanınması olmalıdır, delimitasiya işlərinə start verilməlidir. Onu da bildirməliyəm ki, delimitasiya işləri ilə bağlı indi beynəlxalq təşkilatlar da müsbət reaksiya verirlər. Əgər Ermənistan bunu etmək istəmirsə, özü bilər, ancaq yaxşı fikirləşsinlər, sonra gec ola bilər”.
İddialarından əl çəkib Dağlıq Qarabağ sözünü, ümumiyyətlə, leksikondan çıxarmalıdırlar
Qalib və diktə edən bir dövlətin başçısı olaraq Prezident İlham Əliyev dünyaya nümayiş etdirdi ki, biz öz gücümüz hesabına istədiyimizə nail olmuşuq və bizim üçün indi yeni dövr – quruculuq və torpaqlarımızın bərpası dövrü başlanıb. Azərbaycan özü onsuz da həm Qərb, həm də Şərq bazarlarına münasibətdə hərəkət imkanlarına malikdir, bütün istiqamətlərə ən azı iki alternativi var, Ermənistan isə dalandadır. Keçmiş təcavüzkar niyyətinə baxmayaraq, biz erməni xalqına bu dalandan çıxmaqda kömək edə bilərik. Lakin bunun üçün erməni dövləti və toplumu, habelə Ermənistanın havadarları artıq münaqişənin başa çatdığını qəbul etməli, heç bir hüquqa və imkana əsaslanmayan ərazi iddialarından əl çəkib Dağlıq Qarabağ sözünü, ümumiyyətlə, leksikondan çıxararaq, qonşularla normal münasibətlər qurmağa çalışmalıdır. Qarabağ Azərbaycan Respublikasının ərazisi vahiddir, toxunulmazdır və bölünməzdir.
44 günlük müharibə erməni vandallığını, vəhşiliyini və yırtıcılığını bütün dünyaya nümayiş etdirdi
44 günlük müharibə həm də erməni vəhşiliyini üzə çıxardı. Millət vəkili Fəzail Ağamalının sözlərinə görə, Azərbaycan Ordusunun Şuşanı işğaldan azad etməsinin ardından ermənilər təslimçilik bəyanatına imza atdılar. Ali Baş Komandanın siyasi diplomatik qətiyyəti nəticəsində 3 rayonun qan tökülmədən işğaldan azad edilməsinə nail olunduq: “44 günlük müharibə erməni vandallığını, vəhşiliyini və yırtıcılığını bütün dünyaya nümayiş etdirdi. Onların əsl mahiyyəti üzə çıxdı. İşğaldan azad edilən Cəbrayıl, Füzuli, Qubadlı, Zəngilan rayonunun yaşayış məntəqələri, kəndlərimiz barbarlıqla dağıdılıb, tarixi abidələrimiz yerlə-yeksan edilib. Bu vəhşi tayfa hətta dini dəyərlərə belə hörmət göstərməyib, dini abidələri təhqir edib. Erməni faşizmi bütün bəşəriyyətə ləkədir. Qeyri-qanuni şəkildə Kəlbəcərdə, Ağdamda məskunlaşan və oranı məcburi tərk edənlər vəhşicəsinə evləri, meşələri yandırmaqla öz kimliklərini ortaya qoyurlar. Onların mahiyyəti budur. Artıq işğal olunmuş torpaqlarımız boşaldıldı və tarixi ədalət bərpa olundu”.
Bütün dünya erməni vandalizm aktlarının şahidi oldu. İşğal edilmiş bütün ərazilərdə evlər dağıdıb, bütün infrastruktur dağıdıb, bir dənə də salamat bina yoxdur. Sanki bu torpaqlardan bir vəhşi qəbilə keçib. Bununla Azərbaycanın mədəni, tarixi, dini irsi silmək istəyiblər. Azərbaycanın Qələbəsi eyni zamanda erməni miflərinin sonu deməkdir. “Ermənistanın güclü ordusu var”, “erməni xalqı döyüşkən xalqdır”, “Azərbaycan xalqı döyüşə bilmir” kimi miflərə son qoyuldu. Rəsmi İrəvan törətdiyi vandalizmə görə cavab verməlidir. İnsaniyyətə və bəşəriyyətə qarşı törədilmiş cinayətlərə görə Ermənistan məsuliyyət daşımalıdır.
Məhəmmədəli QƏRİBLİ
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
