Əmək Nazirliyi hətta Prezidentin medal verdiyi baş redaktora da qazi kimi hörmət qoymadı...

img

Əmək və əhalinin sosial müdafiəsi naziri Sahil Babayev Vətən Müharibəsində iştirak edən jurnalistləri qəbul edib. 22 İyul Milli Mətbuat Günü münasibətilə keçirilən görüş media cameəsində birmənalı qarşılanmayıb. Müharibə iştirakçısı olan bəzi jurnalistlərin görüşə dəvət edilməməsi narazılıq yaradıb. "Bakı-Xəbər" qəzetinin əməkdaşı Nahid Salayevin və Cumhuriyyet.az saytının və "Yeni Cumhuriyyət" qəzetinin baş redaktoru Nəsimi Şərəfxanlının tədbirdə olmaması haqda sosial şəbəkələrdə məlumat verilib. 

“Bakı-Xəbər” qəzetinin əməkdaşı Nahid Salayev şəxsinə olan diqqətsizliklə bağlı bunları deyib: “Mən bu Vətəni Sahil Babayevə görə sevib könüllü müharibəyə getməmişəm ki, onun və onun kimilərin göstərə bilmədiyi diqqətə görə də fikrim dəyişə. Mən bu Vətən üçün ölməyə, öldürməyə ona görə getmişəm ki, bu Vətənin çətinlikləri Sahil Babayev və onun kimilərin öhdəsinə qalmasın. Buna görə onun göstərdiyi və göstərə bilmədiyi diqqət elə onun öz intellektindən və mövqeyindən uzağa getmir. Bir sözlə, bizim  gördüyümüz kəndə bələdçi gərək deyil. Məhz belələrinin hesabına cəmiyyət dövlətin xoşməramlı idarəetmə formasını da əksinə anlayır və görür”.

Jurnalist Nəsimi Şərəfxanlı isə “Bakı-Xəbər”ə açıqlamasında bildirdi ki, o, Prezident İlham Əliyev tərəfindən Cəbrayılın, Qubadlının azad olunması medalları ilə təltif edilib: “Mənim Sahil Babayevlə heç bir şəxsi qərəzim yoxdur. Düşünmürəm ki, nazir mənim adımı məxsusi olaraq siyahıdan çıxarıb. Bu dəvət Mətbuat Şurasının müəyyənləşdirdiyi siyahı əsasında baş tutmayıb. MŞ-da müharibədə iştirak edən jurnalistlərin dəqiq siyahısı var. Görünür bu iş qurumun mətbuat xidmətinin öhdəsinə buraxılıb, onlar da yarıtmaz nəticə ortaya qoyublar. Mən istərdim ki, Sahil Babayev yalnız müharibə iştirakçısı olan  jurnalistləri xüsusi qayğı ilə əhatə etməsin. Yaxşı olar ki, mediada işıqlandırılan qazilərin, şəhid ailələrinin problemini həll etsin. Hesab edirəm ki, müharibə iştirakçısı olan jurnalistlərlə bağlı dəqiq siyahı MŞ-da var. Yoxsa, kim kimdən xoşu gəlmirsə, onu çağırmayaq prinsipi ilə iş olmur”.

Məhəmmədəli QƏRİBLİ

Son xəbərlər